ജോഷിമഠ്-ൽ ഭൂമി ഇടിഞ്ഞുതാഴുന്ന സംഭവത്തിൽ പ്രധാന മന്ത്രിയുടെ ഇടപെടൽ; കേന്ദ്ര സമിതി പരിശോധനക്കെത്തി 

ജോഷിമഠിൽ കെട്ടിടങ്ങൾ തകർന്നു വീഴുകയും, ഭൂമിക്കടിയിൽ നിന്ന് വീടുകളിലേക്ക് വെള്ളം കയറുകയും ചെയ്യുന്ന സംഭവങ്ങൾ ആവർത്തിക്കുന്ന സാഹചര്യത്തിൽ പ്രധാനമന്ത്രി നരേന്ദ്ര മോദിയുടെ ഇടപെടൽ. സ്ഥിതി പഠിക്കാൻ കേന്ദ്രം നിയോഗിച്ച സമിതി ജോഷിമഠിലെത്തി. പ്രധാനമന്ത്രിയുടെ അധ്യക്ഷതയിൽ  ചേരുന്ന ഉന്നത തല യോഗത്തിൽ  ഉത്തരാഖണ്ഡിലെ മുതിർന്ന സർക്കാർ ഉദ്യോഗസ്ഥരും ജോഷിമഠ് ജില്ലാ ഭരണകൂട ഉദ്യോഗസ്ഥരും വീഡിയോ കോൺഫറൻസിലൂടെ പങ്കെടുക്കും. അതേസമയം, തൊട്ടടുത്തുള്ള ജ്യോതിർമഠിലും കെട്ടിടങ്ങളിൽ വിള്ളൽ കണ്ട് തുടങ്ങിയ സാഹചര്യത്തിൽ  ജോഷിമഠിലും പരിസരത്തുമുള്ള എല്ലാ നിർമ്മാണ പ്രവർത്തനങ്ങളും നിർത്തിവെക്കാൻ ജില്ലാഭരണകൂടം ഉത്തരവിട്ടു. സംസ്ഥാന സർക്കാറിൻ്റെ നേതൃത്വത്തിൽ തുടരുന്ന  ഒഴിപ്പിക്കൽ നടപടിയുടെ ആദ്യ ഘട്ടത്തിൽ 600 കുടുംബങ്ങളെ  മാറ്റി പാർപ്പിച്ചു.