ശബരിമല- മകരവിളക്കിന് കൂടുതല്‍ സുരക്ഷ സംവിധാനങ്ങൾ ഏർപ്പെടുത്തും
By: 600021 On: Jan 3, 2023, 7:28 PMമകരവിളക്ക് മഹോത്സവത്തോടനുബന്ധിച്ച് ശബരിമല സന്നിധാനത്ത് കൂടുതല്‍ സൗകര്യങ്ങള്‍ ഒരുക്കാൻ തീരുമാനം.എ ഡി എം പി വിഷ്ണുരാജിന്‍റെ അധ്യക്ഷതയില്‍ ചേര്‍ന്ന ഉന്നതതല യോഗത്തിലാണ് തീരുമാനം. തീപിടുത്തം തടയാന്‍ കാടിന്‍റെ പരിസരത്തുള്ള പാചകം തടയും. പാചകം ചെയ്യാനുള്ള പാത്രങ്ങള്‍ സന്നിധാനത്തേക്ക് കൊണ്ടുവരുന്നതിനും വിൽപ്പന നടത്തുന്നതിനും വിലക്ക് ഏർപ്പെടുത്തി. മകരവിളക്കിന് ഉണ്ടാകുന്ന തിരക്ക് പരിഗണിച്ച് മെഡിക്കല്‍ സംവിധാനം വിപുലീകരിക്കും. ഒരേസമയം കൂടുതല്‍ പേര്‍ക്ക് അടിയന്തര ചികിത്സ നല്‍കാനുള്ള സാഹചര്യം ഉണ്ടാക്കും. സന്നിധാനത്തെ വെടിപ്പുരകളിലെ വെടിവഴിപാട് നടത്തിപ്പുകാര്‍ക്ക് സ്ഫോടക വസ്തുക്കള്‍ ഉപയോഗിക്കുമ്പോള്‍ സ്വീകരിക്കേണ്ട മുന്‍കരുതലുകള്‍ കര്‍ശമായി പാലിക്കാന്‍ നിര്‍ദേശം നല്‍കി. ഒരു കിലോയിലയധികം വെടിമരുന്ന് ഇവിടെ സൂക്ഷിക്കുന്നതിനും വിലക്ക് ഏർപ്പെടുത്തി. ഹോട്ടലുകളില്‍ അഞ്ചിലധികം ഗ്യാസ് സിലിണ്ടറുകള്‍ അനുവദിക്കില്ല. സ്‌ഫോടകവസ്തു നിയമ പ്രകാരമുള്ള മാനദണ്ഡങ്ങള്‍ ലംഘിച്ചതായി കണ്ടെത്തിയാല്‍ കട അടപ്പിക്കും. തീപ്പിടുത്തം ഒഴിവാക്കാന്‍ ഫയര്‍ഫോഴ്സ് ഉദ്യോഗസ്ഥര്‍ പരിശീലനം നല്‍കുകയും മാര്‍ഗ നിര്‍ദേശങ്ങള്‍ പാചകപ്പുരകളില്‍ പ്രദര്‍ശിപ്പിക്കുകയും ചെയ്യും.