വിദ്യാഭ്യാസ വകുപ്പിന് കീഴില് സ്വന്തമായി സ്പോര്ട്സ് കോംപ്ലക്സ് പരിഗണനയിലുണ്ടെന്നും ഒളിമ്പിക്സ് മാതൃകയിൽ കേരള സ്കൂൾ ഒളിമ്പിക്സ് നടത്താനാവുമോ എന്ന് പരിശോധിക്കുമെന്നും മന്ത്രി വി. ശിവന്കുട്ടി പറഞ്ഞു. സ്കൂള്തല കായികോത്സവങ്ങള് വിപുലമായി നടത്തുബോൾ നീന്തല് ഉള്പ്പെടെയുള്ള കായിക ഇനങ്ങള്ക്ക് പ്രത്യേക പരിഗണന നല്കുമെന്നും വടുവന്ചാല് ജി.എച്ച്.എസ്.എസിൽ നൈപുണ്യവികസന പദ്ധതി ഉദ്ഘാടനം ചെയ്ത് സംസാരിക്കവേ അദ്ദേഹം പറഞ്ഞു. വിദ്യാലയങ്ങളുടെ അടിസ്ഥാന സൗകര്യവികസനം അത്യന്താപേക്ഷിതമാണ്. എന്നാല് സ്കൂള് മൈതാനങ്ങളെ കവര്ന്നുകൊണ്ടുള്ള കെട്ടിട നിര്മ്മാണങ്ങള് ശരിയായ പ്രവണതയല്ലെന്നും കായികവും മാനസികവുമായ വളര്ച്ചയ്ക്ക് നിദാനമായ കളിമൈതാനങ്ങളെ നിലനിര്ത്തി വേണം കെട്ടിട നിര്മ്മാണത്തിന് സ്ഥലം കണ്ടെത്താനെന്നും അദ്ദേഹം ഓർമിപ്പിച്ചു. കൊവിഡ് മഹാമാരിയുടെ കാലത്ത് നിര്ത്തിവച്ചിരുന്ന, പാഠ്യേതര വിഷയങ്ങളില് മികവ് പുലര്ത്തുന്ന വിദ്യാര്ത്ഥികള്ക്കുള്ള ഗ്രേസ് മാര്ക്ക് ആനുകൂല്യം അടുത്ത അധ്യയന വര്ഷം മുതല് പുനഃസ്ഥാപിക്കുമെന്നും അദ്ദേഹം പറഞ്ഞു.