പ്രവാസി ക്ഷേമ ബോര്‍ഡ് സംഘടിപ്പിക്കുന്ന അന്താരാഷ്ട്ര ഫോട്ടോഗ്രഫി മത്സരത്തിലേക്ക് എൻട്രികൾ അയയ്ക്കാം
By: 600021 On: Jul 25, 2022, 12:15 PMഓഗസ്റ്റ് 19 ലോക ഫോട്ടോഗ്രഫി ദിനത്തോടനുബന്ധിച്ച് കേരള പ്രവാസി ക്ഷേമ ബോര്‍ഡ് നടത്തുന്ന അന്താരാഷ്ട്ര ഫോട്ടോഗ്രഫി മത്സരത്തിലേക്ക് ഇപ്പോൾ എൻട്രികൾ സമർപ്പിക്കാം. 'പ്രവാസ ജീവിതവും കാഴ്ചകളും ' എന്ന വിഷയത്തിലാണ് ഫോട്ടോഗ്രഫി മത്സരം സഘടിപ്പിക്കുന്നത്. ഈ മാസം 21 മുതൽ അടുത്ത മാസം 10 വരെയുള്ള 21 ദിവസങ്ങളിലായാണ് മത്സരങ്ങൾ നടക്കുന്നത്. ലോകഫോട്ടോഗ്രഫി ദിനത്തിൽ വിജയിയെ പ്രഖ്യാപിക്കും.
25,000 രൂപയാണ് ഒന്നാം സമ്മാനം. രണ്ടാം സമ്മാനം 15,000 രൂപയും മൂന്നാം സമ്മാനം 10,000 രൂപയുമാണ്. കൂടാതെ മത്സരത്തില്‍ പങ്കെടുക്കുന്ന എല്ലാവര്‍ക്കും പ്രവാസി ക്ഷേമ ബോര്‍ഡ് ഓണ്‍ലൈനായി സര്‍ട്ടിഫിക്കറ്റും നല്‍കും.
സ്വയം പകര്‍ത്തിയ ഫോട്ടോകള്‍ ആയിരിക്കണം മത്സരത്തിന് അയക്കേണ്ടത്. ഫോട്ടോഗ്രാഫുകള്‍ സ്വയം പകര്‍ത്തിയതാണെന്നും മത്സരത്തിന്റെ എല്ലാ നിയമാവലികളും അംഗീകരിക്കുന്നുവെന്നും സ്വന്തമായി സാക്ഷ്യപ്പെടുത്തിയ സാക്ഷ്യപത്രം എന്‍ട്രിയുടെ കൂടെ അയക്കേണ്ടതാണ്. സാക്ഷ്യപത്രം ഇല്ലാത്ത എന്‍ട്രികള്‍ മത്സരത്തില്‍ പരിഗണിക്കുന്നതല്ല. മത്സരാര്‍ത്ഥി അയക്കുന്ന ഫോട്ടോയ്ക്ക് കോപ്പിറൈറ്റ് ആക്ട് സ്‌ട്രൈക്ക് വന്നാല്‍ കേരള പ്രവാസി ക്ഷേമ ബോര്‍ഡിന് ഉത്തരവാദിത്വം ഉണ്ടായിരിക്കുന്നതല്ല.
2022 ജനുവരി 1ന് ശേഷം എടുത്ത ഫോട്ടോ ആയിരിക്കണം മത്സരത്തിന് അയക്കേണ്ടത്. മത്സരത്തില്‍ പങ്കെടുക്കുന്നവര്‍ നിര്‍ബന്ധമായും പ്രവാസി കേരളീയരോ, നിയമാവലി (5)നു വിധേയമായി പ്രവാസജീവിതത്തില്‍നിന്ന് കേരളത്തിലേക്ക് തിരികെ വന്നവരോ ആയിരിക്കണം.ഫോട്ടോഗ്രാഫുകള്‍ JPEG ഫോര്‍മാറ്റില്‍ ആയിരിക്കണം.ബ്ലാക്ക് ആന്‍ഡ് വൈറ്റ് ചിത്രങ്ങള്‍ അനുവദനീയമാണ്. എന്നാൽ എഡിറ്റ് ചെയ്ത ഫോട്ടോഗ്രാഫുകള്‍ പരിഗണിക്കില്ല.
ഫോട്ടോഗ്രാഫില്‍ വാട്ടര്‍മാര്‍ക്ക്, ബോര്‍ഡര്‍, ഒപ്പ് എന്നിവ അനുവദനീയമല്ല. ക്യാമറ സ്‌പെസിഫിക്കേഷന്‍സ്, ലെന്‍സ് ഡീറ്റെയില്‍സ്, EXIF ഡാറ്റാ എന്നിവ ആവശ്യപ്പെട്ടാല്‍ നല്‍കണം. മത്സരവുമായി ബന്ധപ്പെട്ട് കേരള പ്രവാസി ക്ഷേമ ബോര്‍ഡ് ആവശ്യപ്പെടുന്ന രേഖകള്‍ ഹാജരാക്കേണ്ടതാണ്. ലഭിക്കുന്ന എല്ലാ ഫോട്ടോകളുടെയും ഉടമസ്ഥാവകാശം കേരള പ്രവാസി ക്ഷേമ ബോര്‍ഡില്‍ നിക്ഷിപ്തമായിരിക്കും.
കേരള പ്രവാസി ക്ഷേമ ബോര്‍ഡ് തീരുമാനിക്കുന്ന ജൂറിയായിരിക്കും വിജയികളെ കണ്ടെത്തുന്നത്. മത്സരവുമായി ബന്ധപ്പെട്ട് ജൂറിയുടെ തീരുമാനം അന്തിമമായിരിക്കും. വിജയിയെ ഓഗസ്റ്റ് 19നു പ്രഖ്യാപിക്കും.
എന്‍ട്രികള്‍ അയക്കേണ്ട ഇ മെയില്‍ അഡ്രസ്: kpwbmediacell@gmail.com