ഒന്റാരിയോയിലും ക്യുബെക്കിലും അഞ്ച് വയസ്സ് വരെയുള്ള കുട്ടികൾക്കുള്ള കോവിഡ് വാക്‌സിൻ വിതരണം അടുത്തയാഴ്ച് മുതൽ 

ഒന്റാരിയോയിലും ക്യുബെക്കിലും ആറ് മാസം മുതൽ അഞ്ച് വയസ്സ് വരെയുള്ള കുട്ടികൾക്കുള്ള കോവിഡ് വാക്‌സിൻ വിതരണം അടുത്തയാഴ്ച് മുതൽ ആരംഭിക്കും. ക്യുബെക്കിൽ കുട്ടികൾക്കായുള്ള മോഡേണയുടെ സ്‌പൈക്‌വാക്‌സ് എംആർഎൻഎ കോവിഡ്-19 വാക്‌സിൻ വിതരണം തിങ്കളാഴ്ച മുതൽ ആരംഭിക്കുമെന്ന്  പബ്ലിക് ഹെൽത്ത് ഡയറക്ടർ ഡോ. ലൂക് ബോയ്‌ലോ അറിയിച്ചു. ഒന്റാരിയോയിൽ വ്യാഴാഴ്ച രാവിലെ 8:00 മണി മുതൽ വാക്‌സിനായുള്ള അപ്പോയ്ന്റ്മെന്റുകൾ ആരംഭിക്കുമെന്ന് ഒന്റാരിയോ മിനിസ്ട്രി ഓഫ് ഹെൽത്ത് അറിയിച്ചു.

കഴിഞ്ഞയാഴ്‌ചയാണ് ശിശുക്കൾക്കും പ്രീസ്‌കൂൾ കുട്ടികൾക്കുമായി മോഡേണയുടെ കോവിഡ് വാക്‌സിന് 
ഹെൽത്ത് കാനഡ അംഗീകാരം നൽകിയത്. കാനഡയിൽ ഈ പ്രായത്തിലുള്ള കുട്ടികൾക്ക് വേണ്ടിയുള്ള അംഗീകാരം ലഭിക്കുന്ന ആദ്യ വാക്‌സിനാണ് മോഡേണയുടേത്‌. മുതിർന്നവർക്ക് നൽകുന്നതിന്റെ  നാലിലൊന്ന് അളവിലാണ് കുട്ടികൾക്ക് മോഡേണ വാക്സിൻ നൽകുക. ഏകദേശം നാലാഴ്ചത്തെ ഇടവേളയിൽ രണ്ട് ഡോസുകളാണ് കുട്ടികൾക്ക് നൽകുക.