കേരളത്തില്‍ 2 ഗവണ്മെന്റ് നഴ്‌സിംഗ് കോളജുകൾക്ക് അനുമതി

By: 600021 On: Jul 14, 2022, 3:28 PM

കേരളത്തിൽ രണ്ട് പുതിയ നഴ്‌സിംഗ് കോളജുകൾ ആരംഭിക്കാന്‍ മന്ത്രിസഭായോഗത്തിന്റെ അനുമതി ലഭിച്ചതായി ആരോഗ്യ വകുപ്പ് മന്ത്രി വീണാ ജോര്‍ജ് അറിയിച്ചു. കൊല്ലം, മഞ്ചേരി മെഡിക്കല്‍ കോളജുകളോട് അനുബന്ധിച്ചാണ് നഴ്‌സിംഗ് കോളജ് ആരംഭിക്കുന്നത്. നഴ്‌സിംഗ് കോളജ് ആരംഭിക്കുന്നതിനാവശ്യമായ തസ്തികകള്‍ സൃഷ്ടിക്കാനും അനുമതി ലഭിച്ചു. ഓരോ നഴ്‌സിംഗ് കോളജിനും 18 വീതം ആകെ 36 തസ്തികകള്‍ സൃഷ്ടിക്കാനാണ് അനുമതി ലഭിച്ചിരിക്കുന്നത്. 2022-23 അധ്യയന വര്‍ഷത്തില്‍ ക്ലാസുകള്‍ ആരംഭിക്കാനുള്ള നടപടികള്‍ സ്വീകരിക്കുമെന്നും മന്ത്രി വ്യക്തമാക്കി.
 
രണ്ട് മെഡിക്കല്‍ കോളജുകളിലും നഴ്‌സിംഗ് കോളജുകള്‍ ആരംഭിക്കുന്നതിന് അനുയോജ്യമായ സ്ഥലവും താത്ക്കാലിക കെട്ടിടവും ലഭ്യമാണ്. ഒന്നാം അധ്യയന വര്‍ഷത്തേയ്ക്കുള്ള തസ്തികകളാണ് സൃഷ്ടിച്ചത്. പ്രിന്‍സിപ്പല്‍, പ്രൊഫസര്‍, അസി.പ്രൊഫസര്‍, അഡ്മിനിസ്‌ട്രേറ്റീവ് അസിസ്റ്റന്റ്, സീനിയര്‍ സൂപ്രണ്ട്, സീനിയര്‍ ക്ലാര്‍ക്ക്, ക്ലാര്‍ക്ക്, ഓഫീസ് അറ്റന്‍ഡന്റ്, ലൈബ്രേറിയന്‍ ഗ്രേഡ് വണ്‍, ഹൗസ് കീപ്പര്‍, ഫുള്‍ടൈം സ്വീപ്പര്‍, ഡ്രൈവര്‍ കം അറ്റന്‍ഡന്റ്, വാച്ച്മാന്‍ എന്നിങ്ങനെയാണ് തസ്തികകള്‍ സൃഷ്ടിച്ചിരിക്കുന്നത്.