ഒന്നാം റാങ്കിലും ഒന്നിച്ച് ഇരട്ട സഹോദരിമാർ

ഇരട്ട സഹോദരങ്ങളായ ഹരിതയ്ക്കും ഹരിശ്രീക്കും ഒന്നാം റാങ്കിന്റെ തിളക്കം. കണ്ണൂർ സർവകലാശാല പ്ലാന്റ് സയൻസ്, സ്റ്റാറ്റിസ്റ്റിക്സ് ബിരുദ വിഷയങ്ങളിലാണ് ഇരട്ടകളായ ഹരിതയും ഹരിശ്രീയും ഒരേ മാർക്കോടെ ഒന്നാം റാങ്ക് നേടിയത്. കുഞ്ഞിപാറ കുന്നും കിണറ്റുകരയിലെ ശങ്കരൻ നമ്പൂതിരി (ഹരി) യുടെയും ഉഷാകുമാരിയുടെയും 3 മക്കളിൽ ഇരട്ടകളായ ഇവർക്ക് വിജയത്തിലെ ഒരുമ പുതുമയല്ല.

 

കുഞ്ഞിപാറ ഗവ. വെൽഫെയർ യുപി സ്കൂളിലെ പ്രാഥമിക വിദ്യാഭ്യാസം മുതൽ ഏകദേശം ഒരേ മാർക്കോടെയാണ് ഇരുവരും വിജയിച്ചത്. കൊടക്കാട് കേളപ്പജി ഹൈസ്ക്കൂളിൽനിന്ന് എസ്.എസ്.എൽ.സി പരീക്ഷ വിജയിച്ചപ്പോൾ രണ്ട് പേർക്കും എല്ലാ വിഷയത്തിലും എ പ്ലസ്.

 

ചീമേനി ഗവ.ഹയർസെക്കൻഡറി സ്കൂളിൽ നിന്ന് പ്ലസ്ടു വിജയിച്ചപ്പോഴും രണ്ടു പേർക്കും 94% മാർക്ക്. ഡിഗ്രിക്ക് 95.55% മാർക്ക് നേടി ഹരിതയും 95.56% മാർക്ക് നേടി ഹരിശ്രീയും ഒന്നാം റാങ്കോടെ വിജയം ആവർത്തിക്കുകയായിരുന്നു.

കാഞ്ഞങ്ങാട് നെഹ്റു കോളജിലായിരുന്നു ഇവരുടെ ബിരുദപഠനം.