ഹൂസ്റ്റണില്‍ അഞ്ചു വയസ്സുകാരന്‍ കാറിലിരുന്ന് ചൂടേറ്റു മരിച്ചു

By: 600084 On: Jun 21, 2022, 4:44 PM

പി പി ചെറിയാൻ, ഡാളസ്

ഹാരിസ്‌കൗണ്ടി(ഹൂസ്റ്റണ്‍): മൂന്നു മണിക്കൂറുകളോളം കാറിനകത്ത്‌പെട്ടുപോയ അഞ്ചുവയസ്സുകാരന് സൂര്യന്റെ കഠിന ചൂടേറ്റ ദാരുണാന്ത്യം.

ഹാരിസ്‌കൗണ്ടി ബ്ലെയര്‍ ഹില്‍ 13700 ബ്ലോക്കിലായിരുന്നു സംഭവമെന്ന് കൗണ്ടി ഷെറിഫ് ഗൊണ്‍സാലോസ് പറഞ്ഞു. ഉച്ചക്ക് 3 മണിയോടെയായിരുന്നു കുട്ടി കാറിനകത്ത് അകപ്പെട്ടത്.

അഞ്ചു വയസ്സുക്കാരന്റെ മാതാവും, എട്ട് വയസുള്ള സഹോദരിയും ജന്മദിനാഘോഷങ്ങള്‍ക്കുള്ള സാധനങ്ങള്‍ വാങ്ങുന്നതിനാണ് കടയില്‍ പോയത്. എല്ലാം വാങ്ങിയശേഷം തിരിച്ചു വീട്ടില്‍ എത്തി. ധൃതഗതിയില്‍ ഒരുക്കങ്ങള്‍ നടത്തുന്നതിന് മുന്‍സീറ്റിലുണ്ടായിരുന്ന മകളേയും കൂട്ടി മാതാവ് പുറത്തിറങ്ങി. പുറകിലുള്ള അഞ്ചു വയസ്സുക്കാരന്‍ സീറ്റ് ബെല്‍റ്റ് ഊരി പുറത്തുവരുമെന്നാണ് മാതാവ് കരുതിയതെന്ന് പോലീസ് പറഞ്ഞു. അങ്ങനെ സാധാരണ ചെയ്യാറുണ്ടെന്നും മാതാവ് പറഞ്ഞു. എന്നാല്‍ കാര്‍ വാടകയ്‌ക്കെടുത്തതായിരുന്നു. അതിന്റെ ഓട്ടോമാറ്റിക്ക് ഡോര്‍സിസ്റ്റം തകരാറിലായിരുന്നുവെന്ന് മാതാവിനറിയില്ലായിരുന്നു. രണ്ടുമൂന്നു മണിക്കൂര്‍ കഴിഞ്ഞിട്ടും മകനെ കാണാത്തതിനാല്‍ അന്വേഷിച്ചിറങ്ങിയപ്പോഴായിരുന്നു കാറിലിരുന്ന് ചൂടേറ്റു മരിച്ച വിവരം പുറത്തറിയുന്നത്.

അപകടമരണമായിരുന്നുവെന്നും, മാതാവിനെതിരെ കേസ്സെടുക്കണമോ എന്നതു തീരുമാനിച്ചിട്ടില്ലെന്നും കൗണ്ടി ഷെറിഫ് ഗൊണ്‍സാലോസ് പറഞ്ഞു. ജന്മദിനം ആഘോഷിക്കുവാന്‍ തയ്യാറായ കുടുംബത്തിന്റെ ദുഃഖം ഹൃദയഭേദകമായിരുന്നുവെന്നും പോലീസ് കൂട്ടിചേര്‍ത്തു. കാറില്‍ കുട്ടികളുമായി സഞ്ചരിക്കുന്നവര്‍ പ്രത്യേകം ശ്ര്ദ്ധിക്കണമെന്നും പോലീസ് മുന്നറിയിപ്പു നല്‍കി.