ഓക്‌സിജന്‍ ക്ഷാമമുള്ള പ്രദേശങ്ങളുടെ അറ്റ്‌ലസ് തയാറാക്കി ഗവേഷകര്‍
By: 600021 On: Dec 28, 2021, 6:38 PM
കിഴക്കന്‍ പസഫിക് സമുദ്രത്തില്‍ ഓക്‌സിജന്‍ ക്ഷാമമുള്ള പ്രദേശങ്ങളുടെ തോത് വര്‍ധിക്കുകയാണ്. പസഫിക് സമുദ്രത്തിന്റെ ഒരു ശതമാനം പ്രദേശത്ത് മാത്രമേ ഓക്‌സിജന്‍ ക്ഷാമം ഉള്ളുവെങ്കിലും ഇത് സുപ്രധാന മാറ്റങ്ങള്‍ക്ക് കാരണമാകും. ഒരു ശതമാനം വരുന്ന പ്രദേശം ഹരിതഗൃഹ വാതകമായ നൈട്രസ് ഓക്‌സൈഡിന്റെ ഉറവിടമാണ്. ലോകത്താകെയുള്ള നൈട്രസ് ഓക്‌സൈഡ് ബഹിര്‍ഗമനത്തിന്റെ 25 ശതമാനവും പുറന്തള്ളുന്നത് സമുദ്രങ്ങളാണ്.
ഓക്‌സിജന്‍ ക്ഷാമമുള്ള പ്രദേശങ്ങളെക്കുറിച്ച് വിശദമായി പഠിക്കാന്‍ ഇത്തരത്തിലുള്ള പ്രദേശങ്ങളുടെ അറ്റ്‌ലസ് തയ്യാറാക്കിയിരിക്കുകയാണ് ഗവേഷകര്‍. ത്രിമാനാകൃതിയിലാണ് അറ്റ്‌ലസ്. റോബോട്ടുകളുടെയും മറ്റ് ക്രൂയിസുകളുടെയും സഹായത്തോടെ ശേഖരിച്ച 40 വര്‍ഷത്തെ സമുദ്ര പഠന റിപ്പോര്‍ട്ടും ഗവേഷണത്തിനായി സംഘം ഉപയോഗിച്ചു. അറ്റ്‌ലസ് തയാറാക്കിയത് ഈ പ്രദേശങ്ങളിലെ മാറ്റങ്ങള്‍ വിലയിരുത്താനും മറ്റും ഉപകരിക്കും. ശരാശരി 4,000 മീറ്റര്‍ ആഴമുള്ള സമുദ്രങ്ങളുടെ 35 മുതല്‍ 1,000 മീറ്റര്‍ വരുന്ന പ്രദേശത്താണ് ഇത്തരത്തില്‍ ഓക്‌സിജന്റെ അസാന്നിധ്യം അനുഭവപ്പെടുക.
എം.ഐ.ടിയുടെ ഡിപ്പാര്‍ട്ട്‌മെന്റ് ഓഫ് എര്‍ത്ത്, അറ്റ്‌മോസ്ഫറിക് ആന്‍ഡ് പ്ലാനെറ്ററിയുടെ നേതൃത്വത്തിലുള്ള സംഘമാണ് പഠനം നടത്തിയത്. പഠന റിപ്പോര്‍ട്ട് ഗ്ലോബല്‍ ബയോജിയോകെമിക്കല്‍ സൈക്ലിസ് എന്ന ജേണലില്‍ പ്രസിദ്ധീകരിച്ചിട്ടുണ്ട്. പരിസരത്തുള്ള ഓക്‌സിജന്‍ മുഴുവന്‍ മറൈന്‍ മൈക്രോബുകള്‍ വലിച്ചെടുക്കുന്നതിന്റെ പ്രത്യാഘാതമാണ് സമുദ്രങ്ങളിലെ ഓക്‌സിജന്റെ അസാന്നിധ്യം.
Content Highlights: researchers created atlas which depicts oxgyen depleting zones