അമേരിക്കന്‍ കുടിയേറ്റം: ചരിത്രവും നിയമവഴികളും 

Sunny Maliakel,  Texas

 

കേരളത്തിന്റെ മണ്ണില്‍ നിന്ന് ആയിരക്കണക്കിന് മൈലുകള്‍ അകലെ, അവസരങ്ങളുടെ മഹാഭൂമികയായ അമേരിക്കയിലേക്ക് മലയാളികള്‍ ചേക്കേറിയ ചരിത്രത്തിന് അരനൂറ്റാണ്ടിലേറെ പഴക്കമുണ്ട്. ലോകത്തിന്റെ വിവിധകോണുകളിലേക്ക് ജോലിക്കും  ജീവനോപാധിക്കും  വേണ്ടി കാല്‍നടയായി നടന്നു , പായി കപ്പലില്‍ കയറിയും പോയ പരമ്പരാഗത രീതിയില്‍ നിന്ന് വ്യത്യസ്തമായി, തികച്ചും നിയമപരമായ കുടിയേറ്റ നിയമങ്ങളുടെയും തൊഴില്‍പരമായ ആവശ്യകതകളുടെയും പശ്ചാത്തലത്തിലാണ് അമേരിക്കയിലേക്കുള്ള മലയാളി കുടിയേറ്റം വേരുറപ്പിച്ചത്.അമേരിക്കന്‍ സംസ്‌കാരം ഓരോ വ്യക്തിയുടെയും വ്യക്തിപരമായ സ്വാതന്ത്ര്യത്തിനും സ്വകാര്യതയ്ക്കും വലിയ പ്രാധാന്യം നല്‍കുന്നു. മറ്റുള്ളവരുടെ കാര്യങ്ങളില്‍ അനാവശ്യമായി ഇടപെടാത്ത ഒരു സാമൂഹിക വ്യവസ്ഥ ഇവിടെയുണ്ട്. ഒരാള്‍ക്ക് തനിക്കിഷ്ടമുള്ള രീതിയില്‍ ജീവിക്കാനും, അഭിപ്രായങ്ങള്‍ പ്രകടിപ്പിക്കാനുമുള്ള പൂര്‍ണ്ണ സ്വാതന്ത്ര്യം ഇത് ഉറപ്പുനല്‍കുന്നു.

രാജ്യത്ത് ശക്തമായ നിയമവാഴ്ച നിലനില്‍ക്കുന്നുണ്ട്. സാധാരണക്കാരന്റെ അവകാശങ്ങള്‍ സംരക്ഷിക്കപ്പെടുന്നതിലും, നിയമത്തിന് മുന്നില്‍ എല്ലാവരും തുല്യരാണെന്ന ബോധത്തിലും ജനങ്ങള്‍ക്ക് വലിയ വിശ്വാസമുണ്ട്. കുറ്റകൃത്യങ്ങള്‍ തടയുന്നതിനും പൊതു സുരക്ഷ ഉറപ്പാക്കുന്നതിനും പൊലീസും സംവിധാനങ്ങളും കര്‍ശനമായ മാര്‍ഗ്ഗങ്ങള്‍ സ്വീകരിക്കുന്നു.കഴിവുകള്‍ക്കും കഠിനാധ്വാനത്തിനും അര്‍ഹമായ അംഗീകാരവും പ്രതിഫലവും ലഭിക്കുന്ന തൊഴിലിടങ്ങളാണ് അമേരിക്കയിലുള്ളത്. പശ്ചാത്തലമോ മുന്‍കാലങ്ങളോ നോക്കാതെ, ആര്‍ക്കും സ്വന്തം പ്രയത്‌നം കൊണ്ട് മുന്നേറാനും സാമ്പത്തിക സുരക്ഷിതത്വം നേടാനും സാധിക്കുന്ന തുല്യ അവസരങ്ങള്‍ ഇവിടെ ലഭ്യമാണ്.

അമേരിക്കന്‍ കുടിയേറ്റ ചരിത്രത്തിലെ  നിര്‍ണ്ണായകമായ ഏട് തുറക്കപ്പെടുന്നത് 1965-ലെ 'ഇമിഗ്രേഷന്‍ ആന്‍ഡ് നാഷണാലിറ്റി ആക്ട്' (Immigration and Nationality Act of 1965) പ്രാബല്യത്തില്‍ വന്നതോടുകൂടിയാണ്. അതുവരെ ഏഷ്യന്‍ രാജ്യങ്ങളില്‍ നിന്നുള്ളവര്‍ക്ക് അമേരിക്കയിലേക്ക് പ്രവേശനം നല്‍കിയിരുന്ന കര്‍ശനമായ ക്വാട്ട സമ്പ്രദായങ്ങള്‍ ഈ നിയമത്തിലൂടെ ലഘൂകരിക്കപ്പെട്ടു. അമേരിക്കന്‍ പൗരന്മാരുടെ ബന്ധുക്കള്‍ക്കും, രാജ്യത്തിന് ആവശ്യമായ വിദഗ്ദ്ധ തൊഴിലുകളുള്ളവര്‍ക്കും കുടിയേറ്റത്തിനുള്ള പുതിയ വാതിലുകള്‍ തുറക്കപ്പെട്ടു. ഈ നിയമപരമായ മാറ്റമാണ് കേരളത്തില്‍ നിന്നുള്ള വിദഗ്ദ്ധരുടെ കുടിയേറ്റത്തിന് അടിത്തറ പാകിയത്.

ആദ്യകാലത്ത്, അതായത് 1950-കളിലും 60-കളുടെ തുടക്കത്തിലും, ചുരുക്കം ചില മലയാളി വൈദികരും ദൈവശാസ്ത്ര വിദ്യാര്‍ത്ഥികളും (Theology Students) ഉപരിപഠനാര്‍ത്ഥം അമേരിക്കയിലെ സെമിനാരികളില്‍ എത്തിയതായിരുന്നു തുടക്കം. എന്നാല്‍, ജനസംഖ്യാടിസ്ഥാനത്തിലുള്ള വലിയ കുടിയേറ്റ തരംഗത്തിന് തിരികൊളുത്തിയത് നഴ്‌സിംഗ് രംഗമാണ്.

1960-കളുടെ അവസാനത്തിലും 1970-കളില്‍ അമേരിക്കന്‍ ആശുപത്രികളില്‍ നഴ്‌സുമാരുടെ രൂക്ഷമായ ക്ഷാമം അനുഭവപ്പെട്ടു. അക്കാലത്ത് കേരളത്തില്‍ മികച്ച ഇംഗ്ലീഷ് വിദ്യാഭ്യാസവും ക്രിസ്ത്യന്‍ മിഷനറിമാരുടെ നേതൃത്വത്തിലുള്ള മികച്ച നഴ്‌സിംഗ് സ്‌കൂളുകളും നിലവിലുണ്ടായിരുന്നു. അമേരിക്കന്‍ ആശുപത്രി മാനേജ്‌മെന്റുകള്‍ കേരളത്തിലും ഡല്‍ഹിയിലും മറ്റും  റിക്രൂട്ട്‌മെന്റ് നടത്തി. അങ്ങനെ അമേരിക്കയിലേക്ക് കൂട്ടമായി കുടിയേറിയ ആദ്യത്തെ മലയാളി സംഘം നഴ്‌സുമാരായിരുന്നു. ഇത് കേരളത്തിലെ യുവതലമുറയ്ക്ക് പുതിയൊരു കരിയര്‍ പാത വെട്ടിത്തുറന്നു കൊടുത്തു.

തുടക്കത്തില്‍ എത്തിയ നഴ്‌സുമാരും പ്രൊഫഷണലുകളും അമേരിക്കയിലെ പ്രധാന മെട്രോ നഗരങ്ങളായ ന്യൂയോര്‍ക്ക്, ചിക്കാഗോ, ഹൂസ്റ്റണ്‍, ഡാളസ്, ലോസ് ഏഞ്ചല്‍സ് തുടങ്ങിയ സ്ഥലങ്ങളിലാണ് കേന്ദ്രീകരിച്ചത്. വലിയ ആശുപത്രികളും തൊഴിലവസരങ്ങളും നിലനിന്നിരുന്ന ഈ മെട്രോ സിറ്റികളാണ് മലയാളികളുടെ ആദ്യകാല ആസ്ഥാനങ്ങളായി മാറിയത്.

തുടര്‍ന്ന് വന്ന നിയമപരമായ 'കുടുംബ പുനരേകീകരണ' (Family Reunification) വ്യവസ്ഥകള്‍ പ്രകാരം, അമേരിക്കയില്‍ സ്ഥിരതാമസമാക്കിയവര്‍ക്ക് തങ്ങളുടെ മാതാപിതാക്കളെയും സഹോദരങ്ങളെയും കുട്ടികളെയും നിയമപരമായി രാജ്യത്തേക്ക് കൊണ്ടുവരാന്‍ സാധിച്ചു. ഇത് 'ചെയിന്‍ മൈഗ്രേഷന്' (Chain Migration) വഴിയൊരുക്കി. ഒരു കുടുംബത്തില്‍ നിന്ന് ഒരാള്‍ വഴിതുറന്നപ്പോള്‍, പിന്നീട് ബന്ധുക്കളും സുഹൃത്തുക്കളും ആ വഴിയിലൂടെ ഒഴുകിയെത്തി. കേരളത്തിന് പുറത്ത് മലയാളികള്‍ക്ക് സാംസ്‌കാരികമായും സാമൂഹികമായും വലിയ സ്വാധീനമുള്ള ഒരു 'അഞ്ചാം പ്രവിശ്യ' പോലെയാണ് ഇന്ന് അമേരിക്കയിലെ മലയാളി സമൂഹം വളര്‍ന്നു പന്തലിച്ചിരിക്കുന്നത്.

തൊഴില്‍ തേടി എത്തിയ ആദ്യ തലമുറയുടെ കഠിനാധ്വാനം ഇന്ന് അമേരിക്കന്‍ സമൂഹത്തിന്റെ ഉന്നത ശ്രേണികളില്‍ മലയാളികള്‍ തിളങ്ങിനില്‍ക്കുന്നു. ന്യൂജേഴ്‌സിയിലെ ടീനക്ക്  നഗരത്തിന്റെ മേയറായി സേവനമനുഷ്ഠിച്ച മലയാളി, ജോണ്‍ എബ്രഹാമിന്റെ കാലാവധി 1992 മുതല്‍ 1993 വരെ ആയിരുന്നു. അമേരിക്കയില്‍ ഒരു പ്രധാന നഗരത്തിന്റെ മേയര്‍ പദവിയിലെത്തുന്ന ആദ്യത്തെ ഇന്ത്യന്‍-അമേരിക്കന്‍ വംശജരില്‍ ഒരാളാണ് അദ്ദേഹം. സാങ്കേതികവിദ്യ, വൈദ്യശാസ്ത്രം, വിദ്യാഭ്യാസം, പൊതുരംഗം തുടങ്ങി എല്ലാ മേഖലകളിലും തങ്ങളുടേതായ വ്യക്തിമുദ്ര പതിപ്പിക്കാന്‍ മലയാളിക്ക് സാധിച്ചിട്ടുണ്ട്. നിയമത്തിന്റെ വഴിയിലൂടെ ആരംഭിച്ച്, കുടുംബബന്ധങ്ങളുടെ ദൃഢതയിലൂടെയും കൂട്ടായ്മയിലൂടെയും വളര്‍ന്ന ഈ കുടിയേറ്റ ചരിത്രം ഏതൊരു പ്രവാസി മലയാളി സമൂഹത്തിനും അഭിമാനകരമായ ഒരു ഏടാണ്.

തുടക്കകാലത്ത് ഔദ്യോഗിക തൊഴില്‍ വിസകളിലൂടെയും കുടുംബബന്ധങ്ങളിലൂടെയും മാത്രം ഒഴുകിയെത്തിയ കുടിയേറ്റ പ്രവാഹത്തില്‍ പിന്നീട് ചില വ്യതിചലനങ്ങള്‍ ഉണ്ടായെന്നത് യാഥാര്‍ത്ഥ്യമാണ്. തൊഴില്‍-നഴ്‌സിംഗ് വിസകള്‍ക്ക് പുറമെ സ്റ്റുഡന്റ് വിസകളിലൂടെയും വിസിറ്റിംഗ് വിസകളിലൂടെയും അമേരിക്കയില്‍ എത്തി പിന്നീട് അനുയോജ്യമായ രേഖകളില്ലാതെ തുടരേണ്ടി വന്ന സാഹചര്യങ്ങള്‍ മുന്‍കാലങ്ങളില്‍ ഉണ്ടായിട്ടുണ്ട്.

എങ്കിലും, അമേരിക്കന്‍ ഭരണകൂടം വിവിധ കാലഘട്ടങ്ങളില്‍ നടപ്പിലാക്കിയ ചരിത്രപരമായ പൊതുമാപ്പുകള്‍ (അാിലേെശല)െ ഇതിനൊരു പരിഹാരമായി. 1986-ല്‍ റൊണാള്‍ഡ് റീഗന്‍ പ്രസിഡന്റായിരുന്ന കാലത്ത് പാസാക്കിയ 'ഇമിഗ്രേഷന്‍ റിഫോം ആന്‍ഡ് കണ്‍ട്രോള്‍ ആക്ട്' (IRCA) ഉള്‍പ്പെടെയുള്ള നിയമങ്ങളും, പിന്നീട് 1990-കളില്‍ നടപ്പിലാക്കിയ സെക്ഷന്‍ 245(i) പോലുള്ള വ്യവസ്ഥകളും ആയിരക്കണക്കിന് ആളുകള്‍ക്ക് തങ്ങളുടെ പദവി നിയമവിധേയമാക്കാനും സമൂഹത്തിന്റെ മുഖ്യധാരയിലേക്ക് കടന്നുവരാനും അവസരമൊരുക്കി. ഇത്തരം അവസരങ്ങള്‍ അക്കാലത്ത് പലര്‍ക്കും ഒരു 'ക്ലീന്‍ സ്ലേറ്റ്' ആയി മാറി ഔദ്യോഗികമായി ജീവിതം പടുത്തുയര്‍ത്താന്‍ സഹായകമായി തീര്‍ന്നു.

എന്നാല്‍, ചരിത്രത്തിലെ വലിയൊരു വഴിത്തിരിവായി മാറിയ സെപ്റ്റംബര്‍ 11 (9/11) ഭീകരാക്രമണം ലോകത്തിന്റെ സുരക്ഷാ സങ്കല്‍പ്പങ്ങളെയാകെ മാറ്റിമറിച്ചു. അതിനുശേഷം അമേരിക്ക തന്റെ ദേശീയ സുരക്ഷയ്ക്കും അതിര്‍ത്തികളുടെ സംരക്ഷണത്തിനും അങ്ങേയറ്റത്തെ മുന്‍ഗണനയാണ് നല്‍കിതുടങ്ങിയത്. രാജ്യത്തിന്റെ ആഭ്യന്തര സുരക്ഷയും പൊതുസമൂഹത്തിന്റെ സുരക്ഷിതത്വവും മുന്‍നിര്‍ത്തി ഇമിഗ്രേഷന്‍ നടപടികള്‍ കൂടുതല്‍ സങ്കീര്‍ണ്ണവും കര്‍ശനവുമാക്കി മാറ്റാന്‍ ഇത് കാരണമായി. ഇന്നത്തെ കാലത്ത് വിസ പരിശോധനകളും പശ്ചാത്തല പരിശോധനകളും കൃത്യതയും അതുകൊണ്ടുതന്നെ വളരെ നിര്‍ണ്ണായകമാണ്. 

1990-ല്‍ പാസാക്കിയ 'ഇമിഗ്രേഷന്‍ ആക്ട്' (Immigration Act) പ്രകാരം 1991 ഒക്ടോബര്‍ 1 മുതലാണ് H-1B വിസ ഔദ്യോഗികമായി ഇഷ്യൂ ചെയ്യാന്‍ തുടങ്ങിയത്. യുഎസിലെ കമ്പനികള്‍ക്ക് സ്വന്തം രാജ്യത്ത് ലഭ്യമല്ലാത്ത, ഉയര്‍ന്ന സാങ്കേതിക വൈദഗ്ധ്യമുള്ള വിദേശ തൊഴിലാളികളെ  നിയമിക്കുന്നതിനാണ് ഈ വിസ സംവിധാനം കൊണ്ടുവന്നത്. ഈ വിസയുടെ ഏറ്റവും വലിയ ഗുണഭോക്താവ് ഇന്ത്യയാണ്. യുഎസിലെ ടെക്‌നോളജി മേഖലയിലേക്ക് കുടിയേറിയ ലക്ഷക്കണക്കിന് ഇന്ത്യന്‍ ഐ.ടി പ്രൊഫഷണലുകള്‍ക്ക് ഇത് വലിയ അവസരങ്ങള്‍ നല്‍കി.   

നിയമവിരുദ്ധമായി അമേരിക്കയില്‍ കഴിയുന്ന ആളുകളുടെ എണ്ണം ഔദ്യോഗിക കണക്കുകള്‍ പ്രകാരം ഇതില്‍ കൃത്യമായ തിട്ടപ്പെടുത്തല്‍ ബുദ്ധിമുട്ടാണെങ്കിലും, പ്യൂ റിസര്‍ച്ച് സെന്റര്‍ (Pew Research) പോലെയുള്ള പ്രമുഖ ഏജന്‍സികളുടെ പഠനപ്രകാരം അമേരിക്കയില്‍ രേഖകളില്ലാതെ  കഴിയുന്ന ഇന്ത്യന്‍ പൗരന്മാരുടെ എണ്ണം ഏകദേശം 2,20,000 മുതല്‍ 7,00,000 വരെ വരും.ടൂറിസ്റ്റ് വിസ കാലാവധി കഴിഞ്ഞു നില്‍ക്കുന്നവരും, മറ്റു മാര്‍ഗ്ഗത്തിലൂടെ എത്തിയവരും. മൊത്തം ഇന്ത്യന്‍ കുടിയേറ്റക്കാരുമായി താരതമ്യം ചെയ്യുമ്പോള്‍ ഭൂരിഭാഗം പേരും നിയമപരമായ മാര്‍ഗ്ഗങ്ങളിലൂടെ എത്തിയവരാണ്. എങ്കിലും അനധികൃതമായി എത്തുന്നവരുടെ എണ്ണത്തിലും ഇന്ത്യക്കാര്‍ ഇപ്പോള്‍ മുന്‍പന്തിയിലുള്ള ചില രാജ്യങ്ങളില്‍ ഒന്നാണ്. 2025ല്‍ ഇന്ത്യയില്‍ ഏകദേശം 14,55,255 നോണ്‍-ഇമിഗ്രന്റ് വിസ അപേക്ഷകള്‍ ലഭിച്ചതായാണ് കണക്ക്. എന്നാല്‍ മാനുഷിക പരിഗണനകള്‍ പരിഗണിച്ച് ഇതേസമയം,  2021 ഓഗസ്റ്റില്‍ അഫ്ഗാന്‍ പ്രതിസന്ധിയെത്തുടര്‍ന്ന് സ്‌പെഷ്യല്‍ ഇമ്മിഗ്രന്റ് വീസകളും (SIV) പ്രത്യേക പരോളും വഴി 1,80,000-ത്തധികം അഫ്ഗാന്‍ പൗരന്മാരെയും, 2022 ഫെബ്രുവരിയിലെ റഷ്യന്‍ അധിനിവേശത്തിന് ശേഷം 'യൂണൈറ്റിംഗ് ഫോര്‍ യുക്രെയ്ന്‍' (U4U) പദ്ധതിയിലൂടെ ഏകദേശം 2,20,000-ത്തിലധികം യുക്രെയ്ന്‍ പൗരന്മാരെയും അമേരിക്ക പുനരധിവസിപ്പിച്ചു. അമേരിക്കയില്‍ നിലവിലുള്ള വിദേശത്ത് ജനിച്ച കുടിയേറ്റക്കാരില്‍ ഏറ്റവും കൂടുതലുള്ള ആദ്യ 10 രാജ്യങ്ങളുടെ പട്ടിക താഴെ നല്‍കുന്നു:

മെക്‌സിക്കോ (ഏകദേശം 1.11 കോടി)
ഇന്ത്യ (ഏകദേശം 32 ലക്ഷം)
ചൈന (ഏകദേശം 30 ലക്ഷം)
ഫിലിപ്പീന്‍സ് (ഏകദേശം 21 ലക്ഷം)
ക്യൂബ (ഏകദേശം 17 ലക്ഷം)
എല്‍ സാല്‍വഡോര്‍ (ഏകദേശം 16 ലക്ഷം)
ഗ്വാട്ടിമാല (ഏകദേശം 14 ലക്ഷം)
ഡൊമിനിക്കന്‍ റിപ്പബ്ലിക് (ഏകദേശം 14 ലക്ഷം)
കൊളംബിയ (ഏകദേശം 12 ലക്ഷം)
ഹോണ്ടുറാസ് (ഏകദേശം 11 ലക്ഷം)

ഒരു രാജ്യത്ത് ജീവിക്കുമ്പോള്‍ അവിടത്തെ നിയമപരമായ മാറ്റങ്ങളെയും വ്യവസ്ഥകളെയും ഉള്‍ക്കൊണ്ട് ജീവിക്കേണ്ടത് ഓരോ പൗരന്റെയും അല്ലെങ്കില്‍ പ്രവാസിയുടെയും ഉത്തരവാദിത്തമാണ് . വീടോ വിലാസമോ മാറുമ്പോള്‍ നിശ്ചിത ദിവസങ്ങള്‍ക്കുള്ളില്‍ അതത് വകുപ്പുകളെ (ഡ്രൈവിംഗ് ലൈസന്‍സ്, ടാക്‌സ്, സോഷ്യല്‍ സെക്യൂരിറ്റി തുടങ്ങിയവ) കൃത്യസമയത്ത് അറിയിക്കണമെന്ന നിയമങ്ങള്‍ പാലിക്കുന്നത് സുഗമമായ പ്രവാസ ജീവിതത്തിന് അത്യാവശ്യമാണ്.

മാറുന്ന ലോകസാഹചര്യങ്ങളില്‍ സുരക്ഷാ മുന്‍കരുതലുകളെയും നിയമപരമായ മാറ്റങ്ങളെയും മാനിച്ചുകൊണ്ട് മുന്നോട്ട് പോകുമ്പോഴാണ് പ്രവാസലോകത്ത് നമ്മുടെ വ്യക്തിത്വവും വിജയവും കൂടുതല്‍ അര്‍ത്ഥവത്താകുന്നത്.

 
(ഇന്ത്യ പ്രസ് ക്ലബ് ഓഫ് നോര്‍ത്ത് ടെക്‌സാസിന്റെ 'മാറുന്ന കുടിയേറ്റ നിയമങ്ങള്‍'  എന്ന വിഷയത്തെ ആസ്പദമാക്കി നടത്തിയ മീറ്റിങ്ങില്‍,  ചര്‍ച്ചയ്ക്കായി വന്ന പ്രധാന പോയിന്റുകളാണ് മുകളില്‍ ചേര്‍ത്തിരിക്കുന്നത്)