കസ്റ്റഡി തര്‍ക്കം: ഹൂസ്റ്റണില്‍ നാല് വയസ്സുകാരി മകളെ വെടിവെച്ചുകൊന്ന ശേഷം അമ്മയും ജീവനൊടുക്കി
By: 600002 On: Oct 2, 2026, 10:03 AM
പി പി ചെറിയാന്‍
ഹൂസ്റ്റണ്‍: ഹൂസ്റ്റണില്‍ നാല് വയസ്സുകാരിയായ മകളെ വെടിവെച്ചുകൊന്ന ശേഷം അമ്മയും ജീവനൊടുക്കിയതായി . ഒക്ടോബര്‍ 1-ന് പുറത്തുവന്ന റിപ്പോര്‍ട്ടുകള്‍ സൂചിപ്പിക്കുന്നു. ഹ്യൂസ്റ്റണിലെ മെമ്മോറിയല്‍ ഏരിയയിലെ ഒരു വീട്ടിലാണ് ദാരുണ സംഭവം നടന്നത്. നാല് വയസ്സുള്ള വിവിയന്‍ സവെല്ല എന്ന കുട്ടിയെ അമ്മ വെടിവെച്ചു കൊലപ്പെടുത്തുകയായിരുന്നു. തുടര്‍ന്ന് ഇവര്‍ സ്വയം വെടിയുതിര്‍ത്ത് ജീവനൊടുക്കാന്‍ ശ്രമിക്കുകയും, പിന്നീട് ബുധനാഴ്ച ആശുപത്രിയില്‍ വെച്ച് മരിക്കുകയും ചെയ്തു
കുട്ടിയുടെ മാതാപിതാക്കള്‍ തമ്മില്‍ കസ്റ്റഡി കേസ് നിലവിലുണ്ടായിരുന്നു. സംഭവത്തിന് തൊട്ടുമുമ്പ്, കുട്ടിയുടെ വിദ്യാഭ്യാസവും ആരോഗ്യകാര്യങ്ങളും തീരുമാനിക്കാനുള്ള താല്‍ക്കാലിക പ്രത്യേക അവകാശം കോടതി പിതാവായ ആരോണ്‍ സവെല്ലയ്ക്ക് അനുവദിച്ചിരുന്നു. അമ്മയ്ക്ക് കോടതിയുടെ മേല്‍നോട്ടത്തില്‍ മാത്രമേ കുട്ടിയെ കാണാന്‍ അനുവാദമുണ്ടായിരുന്നുള്ളൂ.
തങ്ങളുടെ കുടുംബം തീര്‍ത്തും തകര്‍ന്നുപോയെന്നും, വിവിയനെ അവളുടെ പിതാവും മറ്റുള്ളവരും അളവിലധികം സ്‌നേഹിച്ചിരുന്നുവെന്നും കുടുംബം പുറത്തിറക്കിയ പ്രസ്താവനയില്‍ വ്യക്തമാക്കി.
വെടിവെയ്പ്പ് നടക്കുന്ന സമയത്ത് കുട്ടിയുടെ രണ്ടാനച്ഛനും ബേബി സിറ്ററും വീട്ടിലുണ്ടായിരുന്നു. വൈകുന്നേരം 6 മണിക്ക് തൊട്ടുമുമ്പ് വെടിയൊച്ച കേട്ടാണ് സംഭവം പുറത്തറിയുന്നത്.
ഹാരിസ് കൗണ്ടി ഇന്‍സ്റ്റിറ്റ്യൂട്ട് ഓഫ് ഫോറന്‍സിക് സയന്‍സസ് കുടുംബാംഗങ്ങളെ ഔദ്യോഗികമായി അറിയിക്കുന്നതുവരെ അമ്മയുടെ പേര് പോലീസ് പുറത്തുവിട്ടിട്ടില്ല.