ഉയരുന്ന ജീവിതച്ചെലവിനിടെ ആശ്വാസം; കാനഡയിലെ അഞ്ച് പ്രവിശ്യകളിൽ കുറഞ്ഞ വേതനം വർധിപ്പിച്ചു

 

 

വർദ്ധിച്ചുവരുന്ന ജീവിതച്ചെലവുകൾക്കും പണപ്പെരുപ്പത്തിനും ആശ്വാസമേകാൻ ലക്ഷ്യമിട്ട് കാനഡയിലെ അഞ്ച് പ്രവിശ്യകൾ കുറഞ്ഞ വേതന നിരക്കുകളിൽ  വർദ്ധനവ് നടപ്പിലാക്കി. ഒക്ടോബർ 1 മുതൽ പ്രാബല്യത്തിൽ വന്ന പുതിയ ഘടനയനുസരിച്ച് ഒൻ്റാരിയോ, പ്രിൻസ് എഡ്വേർഡ് ഐലൻഡ്, നോവ സ്കോഷ്യ, മണിറ്റോബ, സസ്കാച്ചെവൻ എന്നീ പ്രവിശ്യകളിലാണ് വേതന പരിഷ്കരണം നടപ്പിലാക്കിയത്. വാർഷിക ഉപഭോക്തൃ വിലസൂചികയെയും സാമ്പത്തിക മാനദണ്ഡങ്ങളെയും അടിസ്ഥാനമാക്കി മണിക്കൂറിന് 25 സെൻ്റ് മുതൽ 40 സെൻ്റ് വരെയാണ് നിലവിലെ നിരക്കുകളിൽ വർദ്ധനവ് വരുത്തിയിട്ടുള്ളത്.

പരിഷ്കരിച്ച നിരക്കുകൾ പ്രകാരം ഒൻ്റാരിയോയിൽ മണിക്കൂറിന് 17.95 ഡോളറായും, പ്രിൻസ് എഡ്വേർഡ് ഐലൻഡിൽ 17.30 ഡോളറായും വേതനം ഉയർന്നു. നോവ സ്കോഷ്യയിൽ 17.00 ഡോളറും, മണിറ്റോബയിൽ 16.40 ഡോളറും, സസ്കാച്ചെവനിൽ 15.70 ഡോളറുമാണ് പുതിയ കുറഞ്ഞ നിരക്ക്. രാജ്യത്തെ ഭൂരിഭാഗം പ്രവിശ്യകളും തദ്ദേശീയ പണപ്പെരുപ്പത്തിന് അനുസൃതമായി വേതനം പുനർനിർണ്ണയിച്ചപ്പോൾ, 2019 മുതൽ വേതന ഘടന മാറ്റമില്ലാതെ തുടരുന്ന അൽബെർട്ടയിലാണ് നിലവിൽ ഏറ്റവും കുറഞ്ഞ നിരക്കുള്ളത്. മണിക്കൂറിന് 20.00 ഡോളറിലധികം നൽകുന്ന നുനാവുട് ടെറിട്ടറിയാണ് ദേശീയതലത്തിൽ വേതന നിരക്കിൽ മുൻപന്തിയിലുള്ളത്.

തൊഴിലാളികളുടെ ജീവിതം മെച്ചപ്പെടുത്താനും പ്രാദേശിക സാമ്പത്തിക വ്യവസ്ഥയ്ക്ക് ഉന്മേഷം പകരുന്നതിനും ഈ നടപടി സഹായകരമാകുമെന്നാണ് സാമ്പത്തിക വിദഗ്ധരുടെ പ്രാഥമിക വിലയിരുത്തൽ.  ജീവിതച്ചെലവിൽ ഉണ്ടാകുന്ന ദ്രുതഗതിയിലുള്ള വർദ്ധനവുമായി താരതമ്യം ചെയ്യുമ്പോൾ ഈ തുക മതിയാകില്ലെന്ന അഭിപ്രായവും തൊഴിൽ സംഘടനകൾ ഉന്നയിക്കുന്നുണ്ട്.