ചൈനീസ് വാഹനങ്ങൾ ദേശീയ സുരക്ഷയ്ക്ക് ഭീഷണി; ഫോർഡിൻ്റെ നിലപാട് ശരിവെച്ച് വിദഗ്ധർ

 

ചൈനീസ് നിർമ്മിത ഇലക്ട്രിക് വാഹനങ്ങൾ രാജ്യത്തിൻ്റെ സുരക്ഷയ്ക്ക് വലിയ ഭീഷണിയാണെന്ന ഒൻ്റാരിയോ പ്രീമിയർ ഡഗ് ഫോർഡിൻ്റെ മുന്നറിയിപ്പ് ശരിവെക്കുന്ന പുതിയ റിപ്പോർട്ടുകൾ പുറത്ത്. ആധുനിക സാങ്കേതികവിദ്യ ഉപയോഗിച്ച് പ്രവർത്തിക്കുന്ന ഈ വാഹനങ്ങൾക്ക് ഉപഭോക്താക്കളുടെ വ്യക്തിഗത വിവരങ്ങൾ, ക്യാമറ-ജിപിഎസ് ദൃശ്യങ്ങൾ, യാത്രാവിവരങ്ങൾ എന്നിവ നിരന്തരം ശേഖരിച്ച് വിദേശ സെർവറുകളിലേക്ക് അയക്കാൻ സാധിക്കുമെന്ന് സുരക്ഷാ വിദഗ്ധർ ചൂണ്ടിക്കാട്ടുന്നു. 

Spy cars on wheels  എന്ന് വിശേഷിപ്പിക്കാവുന്ന ഈ വാഹനങ്ങൾ വഴി കാനഡയിലെ റോഡുകളുടെയും തന്ത്രപ്രധാന മേഖലകളുടെയും വിവരങ്ങൾ ചോരാൻ സാധ്യതയേറെയാണെന്ന് പ്രമുഖ പത്രമായ ടൊറോൻ്റോ സണ്ണിൽ പ്രസിദ്ധീകരിച്ച ലേഖനത്തിൽ വ്യക്തമാക്കുന്നു. വാഹന വിപണിയിലെ സാധാരണ മത്സരത്തിനപ്പുറം, ഇത് രാജ്യത്തിൻ്റെ സാമ്പത്തിക സുരക്ഷയെയും പരമാധികാരത്തെയും നേരിട്ട് ബാധിക്കുന്ന വിഷയമാണെന്ന് ഡഗ് ഫോർഡും പ്രാദേശിക വാഹന നിർമ്മാണ മേഖലയിലെ പ്രമുഖരും ആരോപിക്കുന്നു.

ചൈനീസ് സർക്കാർ വൻതോതിൽ സബ്‌സിഡി നൽകി കുറഞ്ഞ വിലയ്ക്ക് വാഹനങ്ങൾ അന്താരാഷ്ട്ര വിപണിയിൽ ഇറക്കുന്നത് പ്രാദേശിക വ്യവസായത്തെ തകർക്കാൻ മാത്രമായിട്ടല്ല, മറിച്ച് തന്ത്രപ്രധാന മേഖലകളിൽ സാന്നിധ്യം ഉറപ്പിക്കാൻ കൂടിയാണെന്നാണ് വിമർശനം. അമേരിക്ക അടക്കമുള്ള സഖ്യരാജ്യങ്ങൾ ചൈനീസ് നിർമ്മിത വാഹനങ്ങളിലെ സോഫ്റ്റ്‌വെയറുകൾക്കും ഹാർഡ്‌വെയറുകൾക്കും നിരോധനം ഏർപ്പെടുത്താൻ നീക്കം നടത്തുന്ന സാഹചര്യത്തിൽ കാനഡയും സമാനമായ കർശന നിലപാടുകളിലേക്ക് കടക്കണമെന്ന ആവശ്യം ശക്തമാകുകയാണ്. സാധാരണ ഉപഭോക്താക്കൾ കുറഞ്ഞ വില കണ്ട് ഇത്തരം വാഹനങ്ങളിലേക്ക് ആകർഷിക്കപ്പെടുമ്പോൾ, അത് ഉയർത്തുന്ന സുരക്ഷാ വെല്ലുവിളികൾ ഗൗരവമായി കാണേണ്ടതുണ്ട്.