കാൽഗറിയിലെ കിൻജോ സുഷി റെസ്റ്റോറൻ്റിൽ ഭക്ഷ്യവിഷബാധ; നാല് പേർക്ക് രോഗബാധ സ്ഥിരീകരിച്ചു

 

കാൽഗറിയിലെ 'കിൻജോ സുഷി & ഗ്രിൽ' (Kinjo Sushi & Grill) റെസ്റ്റോറൻ്റിൽ നിന്ന് ഭക്ഷണം കഴിച്ചവർക്ക് വയറ്റിൽ അണുബാധയുണ്ടായ സംഭവത്തിൽ ആൽബെർട്ട ആരോഗ്യ വകുപ്പ് അധികൃതർ അന്വേഷണം ആരംഭിച്ചു. കഴിഞ്ഞ മാസം ഇവിടെ നിന്ന് ഭക്ഷണം കഴിച്ച നിരവധി ആളുകൾക്കാണ് അസുഖം ബാധിച്ചത്.

ആൽബെർട്ട ഹെൽത്ത് സർവീസസ് നാല് പേർക്ക് രോഗബാധ സ്ഥിരീകരിച്ചു. രണ്ട് പേർക്ക് കൂടി രോഗം ബാധിച്ചതായി സംശയിക്കുന്നുണ്ട്. രോഗബാധിതരായ എല്ലാവരും ഈ റെസ്റ്റോറൻ്റിൻ്റെ Mahogany ശാഖയിൽ നിന്നാണ് ഭക്ഷണം കഴിച്ചതെന്ന് വ്യക്തമാക്കിയിട്ടുണ്ട്. സെപ്റ്റംബർ 18-നോ അതിനടുത്ത ദിവസങ്ങളിലോ ആണ് ഇവർ റെസ്റ്റോറൻ്റ് സന്ദർശിച്ചത്. സെപ്റ്റംബർ 18, 19 തീയതികളിൽ ഇവിടെ നിന്ന് ഭക്ഷണമോ പാനീയങ്ങളോ കഴിച്ചവർക്ക് രോഗബാധ ഏറ്റിരിക്കാൻ സാധ്യതയുണ്ടെന്ന് ആരോഗ്യ ഉദ്യോഗസ്ഥർ മുന്നറിയിപ്പ് നൽകി.

പരിശോധനകളിൽ ഇ-കോളി'  ബാക്ടീരിയയാണ് രോഗത്തിന് കാരണമായതെന്ന് കണ്ടെത്തി. ആമാശയ-കുടൽ സംബന്ധമായ രോഗങ്ങൾക്ക് കാരണമാകുന്ന ബാക്ടീരിയയാണ് ഇത്. ഓക്കാനം, ഛർദ്ദി, വയറിളക്കം, കഠിനമായ വയറുവേദന എന്നിവയാണ് ഇതിൻ്റെ പ്രധാന ലക്ഷണങ്ങൾ. മിക്ക ആളുകളും പ്രത്യേക ചികിത്സകളില്ലാതെ തന്നെ സുഖം പ്രാപിക്കാറുണ്ടെങ്കിലും, നിർജ്ജലീകരണം ഇതിൻ്റെ ഒരു പ്രധാന പ്രശ്നമായി മാറാറുണ്ട്.

സംഭവത്തെ തുടർന്ന് സെപ്റ്റംബർ 28-ന് ഹെൽത്ത് ഇൻസ്പെക്ടർമാർ റെസ്റ്റോറൻ്റിൽ നേരിട്ടെത്തി പരിശോധന നടത്തി. എന്നാൽ പരിശോധനയിൽ ഗുരുതരമായ ആരോഗ്യ-ശുചിത്വ വീഴ്ചകളൊന്നും കണ്ടെത്താനായില്ല. നിലവിൽ മറ്റാർക്കും രോഗബാധ റിപ്പോർട്ട് ചെയ്തിട്ടില്ല. അന്വേഷണം തുടരുന്നതിനിടയിലും റെസ്റ്റോറൻ്റ് തുടർന്നും പ്രവർത്തിക്കുന്നുണ്ട്.