'സൂപ്പർ എൽ നിനോ': ഒൻ്റാരിയോയിൽ ശരത്കാല താപനിലയിൽ പ്രകടമായ വർദ്ധനവ്; സ്വാഭാവിക ഇലപൊഴിച്ചിൽ വൈകാൻ സാധ്യത

പസഫിക് സമുദ്രത്തിലെ താപവ്യതിയാനങ്ങൾ മൂലമുണ്ടാകുന്ന 'സൂപ്പർ എൽ നിനോ' പ്രതിഭാസത്തെ തുടർന്ന് ഒൻ്റാരിയോ പ്രവിശ്യയിൽ ശരത്കാല താപനില ക്രമാതീതമായി ഉയരുന്നതായി കാലാവസ്ഥാ നിരീക്ഷണ കേന്ദ്രം റിപ്പോർട്ട് ചെയ്തു. സാധാരണ ഈ സീസണിൽ അനുഭവപ്പെടാറുള്ള മരംകോച്ചുന്ന തണുപ്പിന് പകരം ഉയർന്ന ചൂടാണ് നിലവിൽ പ്രവിശ്യയിലുടനീളം അനുഭവപ്പെടുന്നത്. സമീപകാല ചരിത്രത്തിലെ ഏറ്റവും ശക്തമായ എൽ നിനോ പ്രതിഭാസങ്ങളിലൊന്നാണിതെന്നാണ് വിലയിരുത്തപ്പെടുന്നത്.

ഉയർന്ന താപനിലയും രാത്രികാലങ്ങളിലെ തണുപ്പിന്റെ കുറവും സസ്യജാലങ്ങളുടെ സ്വാഭാവിക ജീവശാസ്ത്രപരമായ മാറ്റങ്ങളെ സങ്കീർണ്ണമാക്കിയിട്ടുണ്ട്. ഇതിന്റെ ഫലമായി ഒന്റാറിയോയിലെ പ്രശസ്തമായ ശരത്കാല ഇലപൊഴിച്ചിലും  വനമേഖലകളിലെ വർണ്ണമാറ്റങ്ങളും ഏതാനും ആഴ്ചകൾ വൈകുമെന്നാണ് പരിസ്ഥിതി ശാസ്ത്രജ്ഞർ ചൂണ്ടിക്കാണിക്കുന്നത്. ഇലകളിൽ ചുവപ്പ്, മഞ്ഞ വർണ്ണങ്ങൾ രൂപപ്പെടുന്നതിന് ആവശ്യമായ രാസപ്രവർത്തന മന്ദതയാണ് ഈ കാലതാമസത്തിന് പ്രധാന കാരണം.

എങ്കിലും ഒക്ടോബർ അവസാനത്തോടെ വർണ്ണമാറ്റം പൂർണ്ണതയിലെത്തുമെന്നും കാഴ്ചയുടെ ഭംഗിയെ ഇത് ദോഷകരമായി ബാധിക്കില്ലെന്നും മക്മാസ്റ്റർ സർവ്വകലാശാലയിലെ സസ്യശാസ്ത്ര വിഭാഗം വ്യക്തമാക്കുന്നു. ശൈത്യകാലത്തിന്റെ വരവ് വൈകുന്നത് ഔട്ട്ഡോർ വിനോദങ്ങൾക്കും വിനോദസഞ്ചാര മേഖലയ്ക്കും താൽക്കാലികമായി അനുകൂല സാഹചര്യമൊരുക്കുമെങ്കിലും, ആഗോള കാലാവസ്ഥാ വ്യതിയാനത്തിന്റെ പ്രകടമായ സൂചനയായാണ് വിദഗ്ദ്ധർ ഈ പ്രതിഭാസത്തെ വിലയിരുത്തുന്നത്.