എഡ്മണ്ടനും കാൽഗറിക്കുമിടയിൽ അതിവേഗ റെയിൽ പദ്ധതി: അടുത്ത ഘട്ടത്തിലേക്ക് കടന്ന് ആൽബെർട്ട

ആൽബെർട്ടയിലെ പ്രധാന നഗരങ്ങളായ എഡ്മണ്ടനെയും കാൽഗറിയെയും തമ്മിൽ ബന്ധിപ്പിക്കുന്ന അതിവേഗ റെയിൽവേ പദ്ധതിക്ക് വഴിയൊരുക്കിക്കൊണ്ട് പ്രവിശ്യാ സർക്കാർ അടുത്ത ഘട്ടത്തിലേക്ക് കടന്നു. പദ്ധതി യാഥാർത്ഥ്യമാക്കുന്നതിനായി സ്വകാര്യ പങ്കാളികളിൽ നിന്ന് ഔദ്യോഗിക നിർദ്ദേശങ്ങൾ ക്ഷണിക്കുന്നതിനുള്ള നടപടികൾ ഈ ശരത്കാലത്തോടെ ആരംഭിക്കുമെന്ന് ആൽബെർട്ട പ്രീമിയർ ഡാനിയേൽ സ്മിത്ത് പ്രഖ്യാപിച്ചു. റെഡ് ഡിയർ വഴി രണ്ട് നഗര കേന്ദ്രങ്ങളെയും അന്താരാഷ്ട്ര വിമാനത്താവളങ്ങളെയും ബന്ധിപ്പിക്കുന്നതാണ് ഈ നിർദ്ദിഷ്ട പദ്ധതി.

ഈ പദ്ധതി നടപ്പിലാക്കാൻ അനുയോജ്യമായ പങ്കാളിയെ 2027 ഏപ്രിലോടെ പ്രവിശ്യാ സർക്കാർ തിരഞ്ഞെടുക്കുമെന്നാണ് പ്രതീക്ഷിക്കുന്നത്. ഒരു സ്വകാര്യ കമ്പനിയെ അല്ലെങ്കിൽ കൺസോർഷ്യത്തെ തിരഞ്ഞെടുത്ത ശേഷം പദ്ധതിയെ ഫെഡറൽ സർക്കാരിന്റെ 'മേജർ പ്രൊജക്ട്സ് ഓഫീസിന്'  കൈമാറാൻ ഫെഡറൽ സർക്കാരും ധാരണയിലെത്തിയിട്ടുണ്ട്. ദേശീയ പ്രാധാന്യമുള്ള വൻകിട അടിസ്ഥാന സൗകര്യ പദ്ധതികളുടെ നടപടികൾ വേഗത്തിലാക്കാനാണ് ഒട്ടാവ ഫെഡറൽ മന്ത്രാലയം ഈ സംവിധാനം ഉപയോഗിക്കുന്നത്.

മണിക്കൂറിൽ 320 കിലോമീറ്റർ വരെ വേഗതയിൽ സഞ്ചരിക്കാൻ കഴിയുന്ന പുതിയ റെയിൽ പാത നിലവിൽ വന്നാൽ, കാൽഗറിയിൽ നിന്ന് എഡ്മണ്ടനിലേക്കുള്ള യാത്രാസമയം വെറും ഒരു മണിക്കൂറും 45 മിനിറ്റുമായി കുറയും. വടക്കേ അമേരിക്കയിൽ ഏറ്റവും വേഗത്തിൽ വളരുന്ന സാമ്പത്തിക ഇടനാഴികളിലൊന്നായ ഇവിടെ അതിവേഗ റെയിൽ വരുന്നത് മേഖലയുടെ ഗതാഗതത്തിനും വ്യവസായ മുന്നേറ്റത്തിനും വൻ കുതിച്ചുചാട്ടമുണ്ടാക്കുമെന്ന് കനേഡിയൻ ഗതാഗത മന്ത്രിയും വ്യക്തമാക്കിയിട്ടുണ്ട്. പദ്ധതിക്കായി കുറഞ്ഞ സാമ്പത്തിക സഹായം പ്രവിശ്യാ സർക്കാരിൽ നിന്ന് നൽകുന്ന രീതിയിലാകും സ്വകാര്യ പ്രൊപ്പോസലുകൾ വിലയിരുത്തുക.