ഹർദീപ് സിംഗ് നിജ്ജാർ വധക്കേസ്: ഗോൾഡി ബ്രാറിനെ 'മോസ്റ്റ് വാണ്ടഡ്' പട്ടികയിൽ ഉൾപ്പെടുത്തി എഫ്.ബി.ഐ

 

2023-ൽ കാനഡയിലെ സറേയിൽ സിഖ് നേതാവ് ഹർദീപ് സിംഗ് നിജ്ജാർ കൊല്ലപ്പെട്ട സംഭവത്തിന് പിന്നിൽ പ്രവർത്തിച്ച മാഫിയ തലവൻ സതീന്ദർജീത് സിംഗ് എന്ന ഗോൾഡി ബ്രാറിനെ  എഫ്.ബി.ഐ മോസ്റ്റ് വാണ്ടഡ് കുറ്റവാളികളുടെ പട്ടികയിൽ ഉൾപ്പെടുത്തി. ലോറൻസ് ബിഷ്ണോയ് ക്രിമിനൽ സംഘത്തിൻ്റെ മുതിർന്ന നേതാവായ ബ്രാറിനെക്കുറിച്ച് വിവരം നൽകുന്നവർക്ക് 10 ലക്ഷം യു.എസ് ഡോളർ പാരിതോഷികവും പ്രഖ്യാപിച്ചിട്ടുണ്ട്. കാലിഫോർണിയയിലും കാനഡയിലെ വിവിധ ഭാഗങ്ങളിലുമായി ഒളിവിൽ കഴിയുന്ന ബ്രാർ കടുത്ത ആക്രമണകാരിയാണെന്ന് അധികൃതർ മുന്നറിയിപ്പ് നൽകി.

വടക്കേ അമേരിക്ക കേന്ദ്രീകരിച്ച് പ്രവർത്തിക്കുന്ന ബിഷ്ണോയ് ഗാംഗിൻ്റെ അന്താരാഷ്ട്ര തലത്തിലുള്ള ലഹരിമരുന്ന് കടത്ത്, കൊലപാതകങ്ങൾ, അക്രമങ്ങൾ, ഭീഷണിപ്പെടുത്തി പണം തട്ടൽ തുടങ്ങിയ അനധികൃത പ്രവർത്തനങ്ങൾക്ക് നേതൃത്വം നൽകുന്നത് ഗോൾഡി ബ്രാറാണെന്ന് യു.എസ് അധികൃതർ വ്യക്തമാക്കുന്നു. അമേരിക്കയിൽ രജിസ്റ്റർ ചെയ്ത കേസിലാണ് നിജ്ജാറിന്റെ കൊലപാതകത്തിന് ആസൂത്രണം ചെയ്തതും ഉത്തരവിട്ടതും ബിഷ്ണോയ് സംഘവും ബ്രാറുമാണെന്ന് എഫ്.ബി.ഐ ചൂണ്ടിക്കാണിച്ചിരിക്കുന്നത്. കുപ്രസിദ്ധ പഞ്ചാബി ഗായകൻ സിദ്ധു മൂസെവാലയുടെ വധം ഉൾപ്പെടെ ഇന്ത്യയിലും നിരവധി  കുറ്റകൃത്യങ്ങളിൽ പങ്കാളിയായ ബ്രാറിനെതിരെ നേരത്തെ തന്നെ ഇന്റർപോൾ റെഡ് നോട്ടീസ് പുറപ്പെടുവിച്ചിരുന്നു.

അമേരിക്കൻ, കനേഡിയൻ പോലീസ് ഏജൻസികളുടെ സംയുക്ത അന്വേഷണമായ 'ഓപ്പറേഷൻ ഹാർഡ് ബോളിൻ്റെ' തുടർച്ചയായാണ് ഈ നിർണായക നടപടി ഉണ്ടായിരിക്കുന്നത്. അന്താരാഷ്ട്ര തലത്തിൽ സംഘടിത കുറ്റകൃത്യങ്ങൾ നടത്തുന്ന ക്രിമിനൽ സംഘങ്ങൾക്കെതിരെ ശക്തമായ നടപടികളാണ് യു.എസും കാനഡയും സ്വീകരിച്ചു വരുന്നത്. എഫ്.ബി.ഐയുടെ ഈ പ്രഖ്യാപനം കുറ്റവാളിയെ നിയമത്തിന് മുന്നിൽ കൊണ്ടുവരുന്നതിൽ വലിയ വഴിത്തിരിവാകുമെന്ന് RCMP പ്രതികരിച്ചു.