ജനിച്ചപ്പോൾ മാറിപ്പോയ കുഞ്ഞുങ്ങൾക്ക് 60 വർഷത്തിന് ശേഷം നഷ്ടപരിഹാരം; മാനിറ്റോബ സർക്കാർ 2.5 ലക്ഷം ഡോളർ വീതം നൽകി

 

ജനിച്ചയുടൻ ആശുപത്രിയിൽ വെച്ച് മാറിപ്പോകുകയും, 60 വയസ്സ് പിന്നിട്ട ശേഷം മാത്രം യഥാർത്ഥ മാതാപിതാക്കളെക്കുറിച്ച് തിരിച്ചറിയുകയും ചെയ്ത രണ്ട് മുതിർന്ന പൗരന്മാർക്ക് നഷ്ടപരിഹാരം നൽകി കാനഡയിലെ മാനിറ്റോബ സർക്കാർ. എഡ്വേർഡ് അംബ്രോസ്, റിച്ചാർഡ് ബോവെയ്സ് എന്നിവർക്കാണ് പ്രവിശ്യാ സർക്കാർ 2,50,000 കാനഡിയൻ ഡോളർ (ഏകദേശം 2.5 ലക്ഷം ഡോളർ) വീതം നൽകിയത്. 2025-26 സാമ്പത്തിക വർഷത്തെ ഔദ്യോഗിക കണക്കുകൾ പുറത്തുവിട്ടപ്പോഴാണ് മാനിറ്റോബ സർക്കാർ ഈ വിവരങ്ങൾ വ്യക്തമാക്കിയത്.

1955-ൽ മാനിറ്റോബയിലെ ആർബർഗിൽ ഒരേ ദിവസമാണ് രണ്ടുപേരും ജനിച്ചത്. എന്നാൽ ആശുപത്രി അധികൃതരുടെ പിഴവുമൂലം കുഞ്ഞുങ്ങൾ മാറിപ്പോവുകയും, ഇരുവരും വെവ്വേറെ മാതാപിതാക്കളുടെ അടുത്ത് വളരുകയുമായിരുന്നു. "നടന്നത് തികഞ്ഞ നീതികേടാണ്. അവർക്ക് നഷ്ടപ്പെട്ട വിലപ്പെട്ട വർഷങ്ങൾ തിരികെ നൽകാൻ ആർക്കും കഴിയില്ല. എങ്കിലും ഈ സാമ്പത്തിക ആശ്വാസം അവർക്ക് സഹായകരമാകുമെന്ന് പ്രതീക്ഷിക്കുന്നു," എന്ന് പ്രവിശ്യാ നീതി ന്യായ മന്ത്രി മാറ്റ് വീബ് പ്രസ്താവനയിലൂടെ അറിയിച്ചു. 2024-ൽ മാനിറ്റോബ പ്രീമിയർ വാബ് കിന്യൂ പ്രവിശ്യാ നിയമസഭയിൽ വെച്ച് ഇരുവരോടും പരസ്യമായി മാപ്പപേക്ഷിച്ചിരുന്നു.

മെറ്റിസ് വംശജരുടെ ഇടയിൽ വളർന്ന റിച്ചാർഡ് ബോവെയ്സ്, 2022-ൽ നടത്തിയ ഡി.എൻ.എ പരിശോധനയിലൂടെയാണ് താൻ യഥാർത്ഥത്തിൽ ഉക്രേനിയൻ, ജൂത പാരമ്പര്യമുള്ള ആളാണെന്ന് തിരിച്ചറിഞ്ഞത്. അതേസമയം, റെംബ്രാന്റിലെ ഒരു ഉക്രേനിയൻ കർഷക കുടുംബത്തിലാണ് എഡ്വേർഡ് അംബ്രോസ് വളർന്നത്.  സർക്കാരിൻ്റെ ഔദ്യോഗിക മാപ്പപേക്ഷയിലും നഷ്ടപരിഹാര തുകയിലും ഇരുവരും സംതൃപ്തരാണെന്ന് ഇവരുടെ അഭിഭാഷകൻ ബിൽ ഗാംജ് അറിയിച്ചു.