വിൻഡ്‌സറിലെ പുതിയ കോസ്റ്റ്‌കോ ഔട്ട്‌ലെറ്റിലേക്ക് വൻ ഉദ്യോഗാർത്ഥി തിരക്ക്

ഒൻ്റാരിയോയിലെ ഈസ്റ്റ് വിൻഡ്‌സറിൽ പുതുതായി പ്രവർത്തനമാരംഭിക്കുന്ന പ്രമുഖ റീട്ടെയിൽ നെറ്റ്‌വർക്കായ 'കോസ്റ്റ്‌കോ'യിലെ  ഒഴിവുകളിലേക്ക് ഉദ്യോഗാർത്ഥികളുടെ വൻ പങ്കാളിത്തം. സെർബിയൻ സെൻ്ററിൽ സംഘടിപ്പിച്ച തൊഴിൽ മേളയിൽ വലിയ തിരക്കാണ് അനുഭവപ്പെട്ടത്. വരാനിരിക്കുന്ന പുതിയ ഔട്ട്‌ലെറ്റിലെ ഒഴിവുകളിലേക്ക് അപേക്ഷിക്കാനും പ്രാഥമിക അഭിമുഖങ്ങളിൽ പങ്കെടുക്കാനുമായി ആയിരത്തിലധികം ആളുകളാണ് രാവിലെ ഏഴ് മണിക്ക് ആരംഭിച്ച മേളയ്ക്ക് മണിക്കൂറുകൾക്ക് മുൻപേ തന്നെ എത്തിയത്. വരികൾ തൊട്ടടുത്ത പ്രധാന റോഡുകളിലേക്കും പാർക്കിംഗ് ഇടങ്ങളിലേക്കും നീണ്ടത് പ്രാദേശിക തൊഴിൽ വിപണിയിലെ കടുത്ത മത്സര അന്തരീക്ഷത്തെ വ്യക്തമാക്കുന്നു.

സുരക്ഷിതമായ തൊഴിൽ അന്തരീക്ഷം, ആകർഷകമായ വേതന ഘടന, ഹെൽത്ത് ഇൻഷുറൻസ് ഉൾപ്പെടെയുള്ള ആനുകൂല്യങ്ങൾ എന്നിവയാണ് ഇത്രയധികം അപേക്ഷകരെ ആകർഷിക്കാൻ പ്രധാന കാരണം. റീട്ടെയിൽ, കസ്റ്റമർ സർവീസ്, മെയിന്റനൻസ് തുടങ്ങിയ വിവിധ വിഭാഗങ്ങളിലായി ഏകദേശം 200 മുതൽ 400 വരെ പുതിയ തസ്തികകളിലേക്കാണ് നിലവിൽ നിയമനം നടക്കുന്നത്. ഓൺലൈൻ രജിസ്ട്രേഷൻ പൂർത്തിയാക്കിയ അപേക്ഷകരെ കൃത്യമായ ഘട്ടങ്ങളിലായി തരംതിരിച്ച്, പ്രാഥമിക സ്ക്രീനിംഗിനും അഭിമുഖങ്ങൾക്കുമായി ഹാളിലേക്ക് പ്രവേശിപ്പിച്ചു. നിലവിൽ മറ്റ് സ്ഥാപനങ്ങളിൽ ജോലി ചെയ്യുന്നവരും കൂടുതൽ മെച്ചപ്പെട്ട തൊഴിൽ ആനുകൂല്യങ്ങൾ ലക്ഷ്യമാക്കി ഈ മേളയിൽ പങ്കെടുത്തു.

തൊഴിൽ മേളയിലെ അപ്രതീക്ഷിത പങ്കാളിത്തം പ്രാദേശിക സാമ്പത്തിക പുനരുജ്ജീവനത്തിന്റെ സൂചനയാണെന്ന് ‘വർക്ക്ഫോഴ്സ് വിൻഡ്‌സർ-എസെക്സ്’ അധികൃതർ വിലയിരുത്തി. 1,58,000 ചതുരശ്ര അടി വിസ്തീർണ്ണത്തിൽ ആധുനിക സൗകര്യങ്ങളോടെ നിർമ്മിച്ചിട്ടുള്ള പുതിയ കോസ്റ്റ്‌കോ കേന്ദ്രത്തിന്റെ പ്രവർത്തനം പൂർണ്ണസജ്ജമാകുന്നതോടെ പ്രദേശത്ത് കൂടുതൽ പരോക്ഷ തൊഴിലവസരങ്ങളും സൃഷ്ടിക്കപ്പെടുമെന്നാണ് പ്രതീക്ഷിക്കുന്നത്. തിരഞ്ഞെടുക്കപ്പെടുന്നവർക്കായുള്ള  പരിശീലന നടപടികൾ ഉൾപ്പെടെ വരും ദിവസങ്ങളിൽ നടക്കും.