ഇസ്ലാമിക് സ്റ്റേറ്റിന് വേണ്ടി രാസായുധ ആക്രമണത്തിന് പദ്ധതിട്ട ക്യൂബെക് സ്വദേശിക്കെതിരെ ഭീകരവിരുദ്ധ കുറ്റം ചുമത്തി

 

ക്യൂബെക് സിറ്റിയിൽ ഭീകരസംഘടനയായ ഇസ്ലാമിക് സ്റ്റേറ്റിന് വേണ്ടി രാസായുധ ആക്രമണം നടത്താൻ പദ്ധതിയിട്ട 24-കാരനായ യുവാവിനെ പോലീസ് അറസ്റ്റ് ചെയ്തു. ലൂയി ആംഗൂദ് എന്ന യുവാവിനെതിരെ റോയൽ കനേഡിയൻ മൗണ്ടഡ് പോലീസ്  രാജ്യസുരക്ഷാ നിയമപ്രകാരം വിവിധ ഭീകരവിരുദ്ധ കുറ്റങ്ങൾ ചുമത്തി കേസ് രജിസ്റ്റർ ചെയ്തു. കനേഡിയൻ പൗരന്മാരെ വിഷവാതകമോ രാസവസ്തുക്കളോ ഉപയോഗിച്ച് അപായപ്പെടുത്താൻ ആവശ്യമായ വിവരങ്ങൾ ഇയാൾ ഇന്റർനെറ്റ് വഴി ശേഖരിച്ചതായി അന്വേഷണ സംഘം കണ്ടെത്തി.

പോലീസ് നൽകുന്ന വിവരമനുസരിച്ച്, പ്രതി ഓൺലൈൻ പ്ലാറ്റ്‌ഫോമുകൾ വഴി ഇസ്ലാമിക് സ്റ്റേറ്റ് അംഗങ്ങളുമായി നിരന്തരം ബന്ധപ്പെട്ടിരുന്നു. രാജ്യത്തെ ദേശീയ സുരക്ഷാ ഭീഷണികൾ അന്വേഷിക്കുന്ന സംയോജിത ദേശീയ സുരക്ഷാ എൻഫോഴ്സ്മെന്റ് ടീം ആണ് ഈ കേസിന്റെ അന്വേഷണത്തിന് നേതൃത്വം നൽകുന്നത്. ഒരു ഭീകരസംഘടനയുടെ പ്രവർത്തനങ്ങളിൽ പങ്കാളിയാവുക, ഭീകരപ്രവർത്തനങ്ങൾക്കായി സ്വത്ത് ഉപയോഗിക്കുക അല്ലെങ്കിൽ കൈവശം വയ്ക്കുക, അപകടകരമായ ലക്ഷ്യങ്ങളോടെ ആയുധങ്ങൾ കൈവശം വയ്ക്കുക തുടങ്ങിയ ഗുരുതരമായ വകുപ്പുകളാണ് ഇയാൾക്കെതിരെ ചുമത്തിയിരിക്കുന്നത്.

വ്യാഴാഴ്ച കോടതിയിൽ ഹാജരാക്കിയ പ്രതി നിലവിൽ ജുഡീഷ്യൽ കസ്റ്റഡിയിലാണ്. പ്രതി ഒറ്റയ്ക്കാണ് ഈ പദ്ധതി തയ്യാറാക്കിയതെന്നാണ് പ്രാഥമിക നിഗമനമെന്നും, ആക്രമണത്തിനായുള്ള രാസവസ്തുക്കൾ ഇയാൾ ശേഖരിക്കുന്നതിന് മുൻപ് തന്നെ പിടികൂടാൻ കഴിഞ്ഞതിനാൽ പൊതുജനങ്ങൾക്ക് തൽക്കാലം മറ്റ് സുരക്ഷാ ഭീഷണികളില്ലെന്നും പോലീസ് വ്യക്തമാക്കി. അക്രമത്തിലേക്ക് നയിക്കുന്ന തീവ്രവാദ ചിന്താഗതികളെ ചെറുക്കുന്നതിന് കനേഡിയൻ സർക്കാർ മുൻഗണന നൽകുന്നുണ്ടെന്നും സമാനമായ ഭീഷണികൾക്കെതിരെ കർശന നടപടികൾ തുടരുമെന്നും RCMP വക്താവ് അറിയിച്ചു.