കാനഡയിൽ വർദ്ധിച്ചുവരുന്ന വീട്ട് ചെലവ്: നാലിലൊന്ന് കുടുംബങ്ങളും ദുരിതത്തിലെന്ന് റിപ്പോർട്ട്

കാനഡയിൽ പാർപ്പിടച്ചെലവുകൾ കുതിച്ചുയരുന്നതിനെ തുടർന്ന് രാജ്യത്തെ ഭവന പ്രതിസന്ധി കൂടുതൽ രൂക്ഷമാകുന്നു. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം, രാജ്യത്തെ നാലിൽ ഒന്ന് കുടുംബങ്ങൾ  തങ്ങൾക്ക് താങ്ങാനാവാത്ത തുക പാർപ്പിട ആവശ്യങ്ങൾക്കായി ചെലവഴിക്കാൻ നിർബന്ധിതരാകുന്നു. വരുമാനത്തിന്റെ 30 ശതമാനത്തിലധികം തുക വാടകയ്ക്കോ മോർട്ട്ഗേജ് തിരിച്ചടവുകൾക്കോ മാറ്റിവെക്കേണ്ടി വരുന്ന അവസ്ഥയെയാണ് സാമ്പത്തിക വിദഗ്ധർ താങ്ങാനാവാത്ത പാർപ്പിട സാഹചര്യമായി കണക്കാക്കുന്നത്.

സ്വന്തമായി വീടുള്ളവരെ അപേക്ഷിച്ച് വാടകയ്ക്ക് താമസിക്കുന്നവരാണ് ഈ പ്രതിസന്ധി ഏറ്റവും കൂടുതൽ നേരിടുന്നത്. റിപ്പോർട്ട് അനുസരിച്ച് വാടകക്കാരിൽ 33.7 ശതമാനം പേരും ഉയർന്ന ചെലവുകളാൽ വലയുമ്പോൾ, വീടുടമസ്ഥരിൽ ഇത് 17.4 ശതമാനമാണ്. എന്നിരുന്നാലും, വായ്പയെടുത്ത് വീട് വാങ്ങിയവരിൽ ഒരു ദശാംശത്തിലധികം പേരും നിലവിൽ സമാനമായ സാമ്പത്തിക പ്രതിസന്ധി അനുഭവിക്കുന്നുണ്ടെന്ന് കണക്കുകൾ സൂചിപ്പിക്കുന്നു. ബാങ്ക് പലിശനിരക്കുകൾ ഉയർന്നതാണ് വായ്പയെടുത്ത വീട്ടുടമകളെ പ്രതിസന്ധിയിലാക്കിയത്.

വീട് മാറുന്ന വാടകക്കാരെയാണ് പുതിയ ചെലവുകൾ ഏറ്റവും കൂടുതൽ ബാധിക്കുന്നത്. കഴിഞ്ഞ രണ്ട് വർഷത്തിനിടെ പുതിയ വീടുകളിലേക്ക് മാറിയവരുടെ ശരാശരി പ്രതിമാസ വാടക 1,740 ഡോളർ ആയി ഉയർന്നപ്പോൾ, പഴയ വാടകക്കാർക്ക് ഇത് 1,290 ഡോളർ മാത്രമായിരുന്നു. രാജ്യത്തെ വർദ്ധിച്ചുവരുന്ന ജീവിതച്ചെലവും പലിശ നിരക്കുകളുമാണ് തങ്ങളുടെ പ്രതിമാസ ബജറ്റിനെ താളംതെറ്റിച്ചതെന്ന് സർവേയിൽ പങ്കെടുത്ത ഭൂരിഭാഗം കനേഡിയൻ പൗരന്മാരും വ്യക്തമാക്കി.