ടംബ്ലർ റിഡ്ജ് വെടിവെപ്പ്: ഓപ്പൺഎഐക്കെതിരെ നിയമനടപടിയുമായി ബി.സി. സർക്കാർ

 

ടംബ്ലർ റിഡ്ജിൽ നടന്ന കൂട്ടവെടിവെപ്പിൽ  ഓപ്പൺഎഐക്ക്  പങ്കുണ്ടെന്ന് ആരോപിച്ച്  ബ്രിട്ടീഷ് ബി.സി. സർക്കാർ നിയമനടപടി സ്വീകരിച്ചു. കാലിഫോർണിയൻ കോടതിയിലാണ് ബി.സി. അറ്റോർണി ജനറൽ നികി ശർമ്മ ഹർജി ഫയൽ ചെയ്തത്. വെടിവെപ്പിന് മുമ്പ് പ്രതി ചാറ്റ്ജിപിടിയിലൂടെ നടത്തിയ അക്രമഭീഷണികളെക്കുറിച്ച് പൊലീസിനെ അറിയിക്കുന്നതിൽ കമ്പനി പരാജയപ്പെട്ടുവെന്നും സുരക്ഷിതമല്ലാത്ത പ്രൊഡക്റ്റാണ് രൂപകൽപ്പന ചെയ്തതെന്നും പ്രൊവിൻഷ്യൽ സർക്കാർ കുറ്റപ്പെടുത്തുന്നു. കമ്പനിയുടെ സി.ഇ.ഒ സാം ആൾട്ട്മാനെയും കേസിൽ പ്രതിചേർത്തിട്ടുണ്ട്.

ഫെബ്രുവരി 10-ന് നടന്ന ദാരുണമായ വെടിവെപ്പിൽ ആറ് കുട്ടികളും രണ്ട് മുതിർന്നവരും ഉൾപ്പെടെ എട്ട് പേരാണ് കൊല്ലപ്പെട്ടത്. ആക്രമണത്തിന് മുമ്പ് പ്രതി പ്രതികരിച്ച സന്ദേശങ്ങൾ ഭയപ്പെടുത്തുന്നതായിരുന്നുവെന്നും എന്നാൽ ഈ വിവരങ്ങൾ  പൊലീസിന് (RCMP) കൈമാറാൻ കമ്പനി തയ്യാറായില്ലെന്നും അറ്റോർണി ജനറൽ വാർത്താസമ്മേളനത്തിൽ വ്യക്തമാക്കി. ഇതിന് പുറമെ പ്രതിയുമായുള്ള ചാറ്റ് വിവരങ്ങൾ പുറത്തുവിടാൻ കമ്പനി ഇപ്പോഴും വിസമ്മതിക്കുകയാണെന്ന് ബി.സി. സർക്കാർ ആരോപിക്കുന്നു.

വെടിവെപ്പിനെ തുടർന്ന് പൊളിച്ചുമാറ്റിയ സ്കൂളിന്റെ പുനർനിർമ്മാണച്ചെലവുകളും തകർച്ചയിൽ പ്രൊവിൻസിനുണ്ടായ മറ്റ് സാമ്പത്തിക നഷ്ടങ്ങളും ഓപ്പൺഎഐയിൽ നിന്ന് ഈടാക്കാനാണ് സർക്കാർ ലക്ഷ്യമിടുന്നത്. പീസ് റിവർ സൗത്ത് സ്കൂൾ ഡിസ്ട്രിക്റ്റുമായി ചേർന്നാണ് സർക്കാർ ഈ സംയുക്ത ഹർജി നൽകിയിരിക്കുന്നത്. ഭാവിയിൽ ഇത്തരം ദുരന്തങ്ങൾ ആവർത്തിക്കാതിരിക്കാൻ നിർമ്മിതബുദ്ധി കമ്പനികൾക്ക് മേൽ ശക്തമായ  നിയന്ത്രണങ്ങൾ ഏർപ്പെടുത്തണമെന്നും ഹർജിയിൽ ആവശ്യപ്പെടുന്നു.