വോട്ടർ പട്ടിക ചോർച്ച: ആൽബർട്ടയിൽ താത്കാലിക നിയന്ത്രണങ്ങളുമായി സർക്കാർ, പുതിയ നിയമനിർമ്മാണത്തിന് സാധ്യത

ആൽബർട്ടയിൽ വോട്ടർമാരുടെ വ്യക്തിവിവരങ്ങൾ ചോർന്നതിനെ തുടർന്ന്  വോട്ടർ പട്ടിക നിയമങ്ങളിൽ സർക്കാർ താത്കാലിക മാറ്റങ്ങൾ വരുത്തി. രാഷ്ട്രീയ പാർട്ടികൾക്കും സ്ഥാനാർത്ഥികൾക്കും നൽകുന്ന വോട്ടർ പട്ടികയിൽ ഇനി മുതൽ വോട്ടർമാരുടെ പേര്, മേൽവിലാസം, ഫോൺ നമ്പർ എന്നിവയ്ക്ക് പകരം അതത് പ്രദേശത്തെ വോട്ടർമാരുടെ എണ്ണം മാത്രമായിരിക്കും ഉൾപ്പെടുത്തുക. മുൻപ് നടന്ന വിവരച്ചോർച്ച അന്വേഷിച്ച ഉദ്യോഗസ്ഥർ ഒരു പ്രാദേശിക രാഷ്ട്രീയ പാർട്ടിക്ക് നൽകിയ പട്ടികയിൽ നിന്നാണ് ഏകദേശം 30 ലക്ഷത്തോളം ജനങ്ങളുടെ വിവരങ്ങൾ പരസ്യമായതെന്ന് കണ്ടെത്തിയിരുന്നു.

ഈ വർഷാവസാനം വരെ പ്രാബല്യത്തിലുണ്ടാകുന്ന ഈ പുതിയ നയം ജനങ്ങളുടെ സ്വകാര്യത സംരക്ഷിക്കുന്നതിനാണെന്ന്  മന്ത്രി മിക്കി അമേറിയുടെ ഓഫീസ് വ്യക്തമാക്കി. കൂടാതെ, തിരഞ്ഞെടുപ്പ് പ്രക്രിയയുടെ സുതാര്യതയും ഡാറ്റാ സുരക്ഷയും ഉറപ്പാക്കാൻ വരുന്ന  സമ്മേളനത്തിൽ പുതിയ നിയമനിർമ്മാണം കൊണ്ടുവരാനും സർക്കാർ ലക്ഷ്യമിടുന്നു. വോട്ടർമാരുടെ വിവരങ്ങൾ സുരക്ഷിതമാണെന്ന് സർക്കാർ ആവർത്തിക്കുമ്പോഴും ഈ തീരുമാനത്തിനെതിരെ പ്രതിപക്ഷം രംഗത്തെത്തിയിട്ടുണ്ട്.

വരാനിരിക്കുന്ന റെഫറണ്ടത്തിന് തൊട്ടുമുമ്പ് കൊണ്ടുവന്ന ഈ തിടുക്കത്തിലുള്ള മാറ്റം തിരഞ്ഞെടുപ്പ് തട്ടിപ്പുകൾക്ക് വഴിതുറക്കുമെന്ന് പ്രതിപക്ഷമായ എൻ.ഡി.പി ആരോപിച്ചു. വോട്ടർമാരുടെ വ്യക്തമായ വിവരങ്ങൾ ലഭിക്കാതെ ക്രമക്കേടുകൾ തടയാൻ സാധിക്കില്ലെന്നാണ് പ്രതിപക്ഷ നിലപാട്. എന്നാൽ തിരഞ്ഞെടുപ്പ് കമ്മീഷൻ തങ്ങളുടെ കൈവശമുള്ള പൂർണ്ണമായ പട്ടിക ഉപയോഗിച്ച് തന്നെയാകും വോട്ടെടുപ്പ് നടത്തുകയെന്നും പ്രക്രിയ തികച്ചും സുതാര്യമായിരിക്കുമെന്നും അധികൃതർ അറിയിച്ചു.