30 ലക്ഷം ആളുകളുടെ വിവരങ്ങൾ ചോർന്നു, വോട്ടർ പട്ടിക കൈമാറുന്നതിൽ കടുത്ത നിയന്ത്രണവുമായി ആൽബർട്ട സർക്കാർ

ആൽബെർട്ടയിൽ വോട്ടർമാരുടെ വ്യക്തിഗത വിവരങ്ങൾ ചോർന്നതിന് പിന്നാലെ വോട്ടർ പട്ടിക കൈമാറുന്നതിൽ കടുത്ത നിയന്ത്രണങ്ങളുമായി സർക്കാർ. വിവര ചോർച്ച തടയുന്നതിനും പൗരന്മാരുടെ സ്വകാര്യത സംരക്ഷിക്കുന്നതിനുമായി വരും മാസങ്ങളിൽ പുതിയ നിയമനിർമ്മാണം നടത്തുമെന്ന് സർക്കാർ വ്യക്തമാക്കി. 2026 അവസാനം വരെ നിലവിലെ താൽക്കാലിക നിയന്ത്രണങ്ങൾ തുടരും.

 ഏകദേശം 30 ലക്ഷത്തോളം ആൽബെർട്ടക്കാരുടെ സ്വകാര്യ വിവരങ്ങൾ അടങ്ങിയ ഡാറ്റാബേസ് ഒരു സെപ്പറേറ്റിസ്റ്റ് ഗ്രൂപ്പ് പരസ്യമാക്കിയതാണ് ഈ കടുത്ത തീരുമാനത്തിലേക്ക് സർക്കാരിനെ നയിച്ചത്. ഒരു പ്രാദേശിക രാഷ്ട്രീയ പാർട്ടിക്ക് നൽകിയ വോട്ടർ പട്ടികയുടെ പകർപ്പിൽ നിന്നാണ് ഈ വിവരങ്ങൾ ചോർന്നതെന്ന് അന്വേഷണത്തിൽ കണ്ടെത്തിയിരുന്നു. ഇതേ തുടർന്ന് ഇനിമുതൽ വോട്ടർമാരുടെ പേര്, വീട്ടു വിലാസം, ഫോൺ നമ്പർ, വോട്ടർ ഐഡി തുടങ്ങിയ വ്യക്തിഗത വിവരങ്ങൾ രാഷ്ട്രീയ പാർട്ടികൾക്കോ സ്ഥാനാർത്ഥികൾക്കോ നൽകില്ല. പകരം, ഓരോ വോട്ടിംഗ് കേന്ദ്ര പരിധിയിലെയും മുനിസിപ്പാലിറ്റിയിലെയും വോട്ടർമാരുടെ എണ്ണം മാത്രമായിരിക്കും പാർട്ടികൾക്ക് ലഭിക്കുക.

പൊതുജനങ്ങളുടെ വിവര സുരക്ഷ ഉറപ്പാക്കാൻ ഈ വരുന്ന ശരത്കാലത്ത്  പുതിയ നിയമം സഭയിൽ കൊണ്ടുവരുമെന്ന് ജസ്റ്റിസ് മിനിസ്റ്റർ മിക്കി അമേരിയുടെ ഓഫീസ് അറിയിച്ചു. ഭാവിയിൽ ഇത്തരത്തിലുള്ള സുരക്ഷാ വീഴ്ചകൾ ഉണ്ടാകാതിരിക്കാൻ ഇലക്ഷൻസ് ആൽബെർട്ട അന്വേഷണ ഉദ്യോഗസ്ഥരുമായും സർക്കാരുമായും ചേർന്ന് നടപടികൾ ശക്തമാക്കും.

വിശദമായ വോട്ടർ വിവരങ്ങൾ ലഭിക്കാത്തത് രാഷ്ട്രീയ പാർട്ടികളുടെ പ്രചാരണ തന്ത്രങ്ങളെ ബാധിക്കുമെങ്കിലും, പൊതുജനങ്ങളുടെ വിശ്വാസം വീണ്ടെടുക്കാൻ ഇത്തരം നിയന്ത്രണങ്ങൾ അത്യന്താപേക്ഷിതമാണെന്നാണ് വിലയിരുത്തൽ. ഡിജിറ്റൽ യുഗത്തിൽ വോട്ടർമാരുടെ വിവരങ്ങൾ എങ്ങനെ സംരക്ഷിക്കണമെന്നതിനെക്കുറിച്ചുള്ള വലിയൊരു ചർച്ചയ്ക്കാണ് ഈ സംഭവം കാനഡയിലുടനീളം തുടക്കമിട്ടിരിക്കുന്നത്.