കാൽഗറി ഹോട്ട് എയർ ബലൂൺ ഫെസ്റ്റ്; ടിക്കറ്റ് വിൽപ്പന ആരംഭിച്ചു

 

രാവും പകലും വർണ്ണാഭമാക്കാൻ പോകുന്ന പ്രശസ്തമായ 'ഹോട്ട് എയർ ബലൂൺ ഗ്ലോ'ഫെസ്‌റ്റിനായുള്ള ടിക്കറ്റുകൾ വിൽപ്പനയ്‌ക്കെത്തി. ഹൈ റിവറിലെ വിശാലമായ ആകാശത്തിന് താഴെ, കൂറ്റൻ ബലൂണുകൾ പ്രകാശിച്ചുയരുന്ന അത്യപൂർവ്വ ദൃശ്യാനുഭവം നേരിട്ട് കാണാൻ കാത്തിരിക്കുകയാണ് ആയിരക്കണക്കിന് കാണികൾ. ഓരോ വർഷവും കാനഡയിലുടനീളമുള്ള സഞ്ചാരികളെ ആകർഷിക്കുന്ന ഈ രാജ്യാന്തര ഫെസ്റ്റിവൽ ഇത്തവണയും ആകർഷകമായ ഒട്ടേറെ കാഴ്ചകളോടെയാണ് എത്തുന്നത്.

സന്ധ്യ മയങ്ങുന്നതോടെ ഭീമാകാരങ്ങളായ ബലൂണുകളിലേക്ക് അഗ്നിജ്വാലകൾ പകരുമ്പോൾ, ഇരുട്ടിൽ കൂറ്റൻ അലങ്കാര വിളക്കുകൾ പോലെ അവ മിന്നിത്തിളങ്ങുന്ന ദൃശ്യം അതിമനോഹരമാണ്. ലോകത്തിന്റെ വിവിധ ഭാഗങ്ങളിൽ നിന്നുള്ള വിദഗ്ദ്ധരായ ബലൂൺ പൈലറ്റുമാർ തങ്ങളുടെ വർണ്ണാഭമായ ബലൂണുകളുമായി ആകാശത്ത് വിസ്മയം തീർക്കും. കണ്ണഞ്ചിപ്പിക്കുന്ന ലൈറ്റ് ഷോയ്ക്ക് പുറമെ  കൊതിപ്പിക്കുന്ന വിഭവങ്ങളുമായി ഫുഡ് ട്രക്കുകളും, തത്സമയ സംഗീത പരിപാടികളും, കുട്ടികൾക്കുള്ള വിനോദ പരിപാടികളും  സംഘാടകർ ഇതിനോട് അനുബന്ധിച്ച് ഒരുക്കുന്നുണ്ട്.

കഴിഞ്ഞ വർഷങ്ങളിൽ മുൻകൂട്ടി ടിക്കറ്റ് എടുക്കാതെ എത്തിയ നൂറുകണക്കിന് ആളുകൾക്ക് നിരാശരായി മടങ്ങേണ്ടി വന്നതിനാൽ, ഇത്തവണ പ്രവേശനം പൂർണ്ണമായും ഓൺലൈൻ ടിക്കറ്റുകൾ വഴി പരിമിതപ്പെടുത്തിയിരിക്കുകയാണ്. പ്രദേശത്തെ ടൂറിസം മേഖലയ്ക്ക് വൻ കുതിപ്പേകുന്ന ഈ ഫെസ്റ്റിൽ പങ്കാളികളാകാൻ ദിവസങ്ങൾക്ക് മുമ്പേ ടിക്കറ്റുകൾ വിറ്റഴിയും.  രാത്രിയിലെ ഈ പ്രകാശ വിസ്മയത്തിന് സാക്ഷിയാകാൻ ആഗ്രഹിക്കുന്നവർ എത്രയും വേഗം ടിക്കറ്റുകൾ സ്വന്തമാക്കണമെന്ന് സംഘാടകർ നിർദ്ദേശിക്കുന്നു.