വാൻകൂവർ മേയർ തിരഞ്ഞെടുപ്പ്: വോട്ട് ചെയ്യുന്നതിന് മുൻപെ കോടികളുടെ ബെറ്റിങ്

ഒക്ടോബർ 17-ന് നടക്കാനിരിക്കുന്ന വാൻകൂവർ മേയർ തിരഞ്ഞെടുപ്പ് അടുത്തിരിക്കെ, നിയമം ലംഘിച്ചുള്ള ഓൺലൈൻ വാതുവെപ്പ് തകൃതിയായി നടക്കുന്നതായി റിപ്പോർട്ട്. 'പോളിമാർക്കറ്റ്'  എന്ന ക്രിപ്റ്റോകറൻസി പ്ലാറ്റ്‌ഫോം വഴി ഇതുവരെ രണ്ട് ലക്ഷത്തിലധികം യു.എസ് ഡോളറിന്റെ വാതുവെപ്പാണ് നടന്നിട്ടുള്ളത്. ഇത് ജനാധിപത്യ പ്രക്രിയയുടെ സുതാര്യതയെ ബാധിക്കുമെന്ന കടുത്ത ആശങ്കയിലാണ് നിയമ വിദഗ്ധർ.

നിലവിലെ മേയറായ കെൻ സിമ്മിനാണ്  വാതുവെപ്പ് വിപണിയിൽ കൂടുതൽ ജയസാധ്യത (47 ശതമാനം) കൽപ്പിക്കപ്പെടുന്നത്. ഗ്രീൻ പാർട്ടി സ്ഥാനാർത്ഥി പീറ്റ് ഫ്രൈ 44 ശതമാനവുമായി തൊട്ടുപിന്നിലുണ്ട്. മൂന്നാം സ്ഥാനത്തുള്ള കരീം അല്ലാമിന് ഒൻപത് ശതമാനം സാധ്യത മാത്രമാണ് കൽപ്പിക്കുന്നത്. എന്നാൽ ഇവയൊന്നും ഔദ്യോഗിക അഭിപ്രായ സർവേകളല്ലെന്നും, ആളുകൾ നടത്തുന്ന സാമ്പത്തിക ഇടപാടുകളുടെ കണക്കുകൾ മാത്രമാണെന്നും അധികൃതർ വ്യക്തമാക്കുന്നു.

കാനഡയിൽ തിരഞ്ഞെടുപ്പുകളിൽ പണംവെച്ച് വാതുവെക്കുന്നത് പൂർണ്ണമായും നിരോധിച്ചതാണ്. എന്നാൽ വി.പി.എൻ വഴി ആളുകൾ ഈ നിരോധനം മറികടക്കുകയാണെന്ന് ബ്രിട്ടീഷ് കൊളംബിയ സർവകലാശാലയിലെ പ്രൊഫസർ ഡോ. ക്രിസ്റ്റി ഫോർഡ് പറയുന്നു. ഇത്തരം പ്രവചന വിപണികൾ വോട്ടർമാരെ തെറ്റായ രീതിയിൽ സ്വാധീനിക്കാമെന്ന് വിദഗ്ധർ മുന്നറിയിപ്പ് നൽകുന്നു:

പണക്കാരായ ആളുകൾക്ക് വൻതുക മുടക്കി സ്ഥാനാർത്ഥികളുടെ ജയസാധ്യതകളിൽ കൃത്രിമം കാണിക്കാൻ സാധിക്കും. പണം ലഭിക്കാനായി ജനങ്ങൾക്കിടയിൽ വ്യാജ പ്രചാരണങ്ങൾ നടത്താൻ സാധ്യതയേറെയാണ്. സ്ഥാനാർത്ഥിക്ക് സാധ്യത കുറവാണെന്ന് തോന്നുമ്പോൾ അനുകൂലികൾ വോട്ട് ചെയ്യാൻ മടിക്കുകയും, വലിയ സാധ്യതയുണ്ടെന്ന വാർത്തകൾ വോട്ടർമാരിൽ അലംഭാവം ഉണ്ടാക്കുകയും ചെയ്യും.  ജനാധിപത്യ സംവിധാനത്തിൻ്റെ വിശ്വസനീയത തകർക്കാൻ ഇത്തരം പ്രവണതകൾ കാരണമാകുമെന്ന് ഡോ. ഫോർഡ് വ്യക്തമാക്കി.