കാനഡ നാടുകടത്തിയ ബിഷ്‌ണോയ് ഗ്യാങ് തലവൻ കരംവീർ സിംഗ് ഡൽഹിയിൽ അറസ്റ്റിൽ

 

കുപ്രസിദ്ധ കുറ്റവാളി ലോറൻസ് ബിഷ്‌ണോയിയുടെ പ്രധാന അനുയായി കരംവീർ സിംഗിനെ കാനഡ നാടുകടത്തി. ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ എത്തിയ ഉടൻ പഞ്ചാബ് പൊലീസിൻ്റെ ആൻ്റി ഗ്യാങ്സ്റ്റർ ടാസ്‌ക് ഫോഴ്‌സ് ഇയാളെ അറസ്റ്റ് ചെയ്തു. കൊലപാതകം, വധശ്രമം, കവർച്ച, ഭീഷണിപ്പെടുത്തി പണം തട്ടൽ, ആയുധക്കടത്ത് തുടങ്ങി നിരവധി കേസുകളിൽ ഇന്ത്യ തിരയുന്ന പ്രമുഖ കുറ്റവാളിയാണ് കരംവീർ. 2012-ൽ പഞ്ചാബിലെ പ്രമുഖ രാഷ്ട്രീയ നേതാവിനെ വധിച്ച കേസിൽ ഇയാൾ വിചാരണ നേരിടുന്നുണ്ട്.

പ്രശസ്ത പഞ്ചാബി ഗായകൻ എ.പി. ധില്ലന്റെ കാനഡയിലെ വീടിന് നേരെ 2024-ൽ നടന്ന വെടിവെപ്പിനും തീവെപ്പിനും പിന്നിൽ കരംവീർ സിംഗാണെന്ന് അമേരിക്കൻ അന്വേഷണ ഏജൻസിയായ എഫ്.ബി.ഐ  കണ്ടെത്തിയിരുന്നു. ബിഷ്‌ണോയിയുടെ സഹോദരൻ അൻമോൾ ബിഷ്‌ണോയിക്ക് അമേരിക്കയിൽ ഒളിത്താവളമൊരുക്കിയതും, കാനഡ കേന്ദ്രീകരിച്ച് ഗാംഗിന് ആവശ്യമായ സാമ്പത്തിക-സഹായങ്ങൾ നൽകിയതും ഇയാളാണ്.

മെക്സിക്കോ വഴി അമേരിക്കയിലേക്കും പിന്നീട് കാനഡയിലേക്കും കടന്ന ഇയാൾ, വ്യാജ രേഖകൾ ചമച്ച് അഭയം തേടാൻ ശ്രമിക്കുകയായിരുന്നു. എന്നാൽ കനേഡിയൻ അധികൃതർ അപേക്ഷ തള്ളിയതോടെയാണ് നാടുകടത്തിയത്. ദക്ഷിണേഷ്യൻ വംശജരെ കേന്ദ്രീകരിച്ച് കൊലപാതകങ്ങളും ഭീഷണിപ്പെടുത്തി പണം തട്ടലും നടത്തിവരുന്ന ബിഷ്‌ണോയ് ഗാംഗിന്റെ ശൃംഖലയെക്കുറിച്ച് പഞ്ചാബ് പൊലീസ് അന്വേഷണം ശക്തമാക്കിയിട്ടുണ്ട്.