കാനഡയിലെ നാല് പ്രധാന വിമാനത്താവളങ്ങളിൽ സ്വകാര്യ നിക്ഷേപത്തിന് വഴിതുറക്കുന്നു

കാനഡയിലെ ഏറ്റവും വലിയ നാല് വിമാനത്താവളങ്ങളുടെ പ്രവർത്തനത്തിൽ സ്വകാര്യ പങ്കാളിത്തവും നിക്ഷേപവും ഉറപ്പാക്കാൻ സർക്കാർ ഒരുങ്ങുന്നതായി പ്രധാനമന്ത്രി മാർക്ക് കാർണി പ്രഖ്യാപിച്ചു. ടൊറൻ്റോ പിയേഴ്‌സൺ, വാൻകൂവർ, മോൺട്രിയൽ ട്രൂഡോ, കാൽഗറി എന്നീ വിമാനത്താവളങ്ങളിലാണ്  ദീർഘകാല കരാറുകൾ വഴി സ്വകാര്യ മൂലധനം ആകര്‍ഷിക്കാൻ കനേഡിയൻ ഭരണകൂടം ലക്ഷ്യമിടുന്നത്. ടൊറന്റോയിൽ നടന്ന കാനഡ ഇൻവെസ്റ്റ്‌മെൻ്റ് ഉച്ചകോടിയിൽ സംസാരിക്കവേയാണ് കാർണി ഈ നിർണായക നയപരമായ പ്രഖ്യാപനം നടത്തിയത്.

വിമാനത്താവളങ്ങൾ സ്ഥിതി ചെയ്യുന്ന ഭൂമിയുടെയും മറ്റ് അടിസ്ഥാന സ്വത്തുക്കളുടെയും പൂർണ്ണ ഉടമസ്ഥാവകാശം ഫെഡറൽ സർക്കാരിൽ തന്നെ നിലനിൽക്കുമെന്നും പ്രധാനമന്ത്രി പറഞ്ഞു.  സ്വകാര്യ മേഖലയിൽ നിന്നുള്ള പുതിയ മൂലധനവും പ്രവർത്തന മികവും കൊണ്ടുവരുന്നതിലൂടെ വിമാനത്താവളങ്ങളുടെ വളർച്ച വേഗത്തിലാക്കാനും, സേവനങ്ങളുടെ ഗുണനിലവാരം ഉയർത്താനും സാധിക്കും. രാജ്യാന്തര തലത്തിൽ മറ്റ് പല രാജ്യങ്ങളും വിജയകരമായി നടപ്പാക്കിയ മാതൃക പിന്തുടർന്നാണ് കാനഡയും ഈ നീക്കത്തിന് തുടക്കമിടുന്നത്.

നിലവിൽ പ്രാദേശിക എയർപോർട്ട് അതോറിറ്റികളാണ് ലാഭേച്ഛയില്ലാതെ ഈ വിമാനത്താവളങ്ങൾ നടത്തിക്കൊണ്ടുപോകുന്നത്. എന്നാൽ സ്വകാര്യ നിക്ഷേപം എത്തുന്നതോടെ യാത്രക്കാർക്ക് കൂടുതൽ മികച്ച യാത്രാനുഭവം ലഭ്യമാകുമെന്നും, വിമാനത്താവള അടിസ്ഥാന സൗകര്യങ്ങൾ നവീകരിക്കാൻ ആവശ്യമായ തുക കണ്ടെത്താനാകുമെന്നും സർക്കാർ പ്രതീക്ഷിക്കുന്നു. ആഗോളതലത്തിൽ വിമാനത്താവള മാനേജ്‌മെന്റിൽ വൈദഗ്ധ്യമുള്ള കനേഡിയൻ പെൻഷൻ ഫണ്ടുകളുടെ കഴിവ് സ്വന്തം രാജ്യത്തെ വിമാനത്താവളങ്ങളുടെ വികസനത്തിനായി പ്രയോജനപ്പെടുത്തുക കൂടിയാണ് ഈ പുതിയ തീരുമാനത്തിലൂടെ ലക്ഷ്യമിടുന്നത്.