ബാങ്ക് കാർഡുകൾ നേരിട്ടെത്തി കൈക്കലാക്കുന്ന വ്യാജ ഫോൺ തട്ടിപ്പുകൾക്കെതിരെ മുന്നറിയിപ്പുമായി ആർ‌സി‌എം‌പി

ബ്രിട്ടീഷ് കൊളംബിയയിലെ മേപ്പിൾ റിഡ്ജ് പ്രദേശത്ത് സാമ്പത്തിക സ്ഥാപനങ്ങളുടെ പേരിൽ വ്യാജ ഫോൺ സന്ദേശങ്ങൾ അയച്ച് ബാങ്ക്-ക്രെഡിറ്റ് കാർഡുകൾ നേരിട്ടെത്തി ശേഖരിക്കുന്ന  തട്ടിപ്പുകൾ വർദ്ധിച്ചുവരുന്നതായി റോയൽ കനേഡിയൻ മൗണ്ടഡ് പോലീസ് വെളിപ്പെടുത്തി. ബാങ്ക് അക്കൗണ്ടുകളിൽ ക്രമക്കേട് നടന്നിട്ടുണ്ടെന്ന് തെറ്റിദ്ധരിപ്പിച്ചാണ് തട്ടിപ്പുസംഘം ഉപഭോക്താക്കളുമായി ബന്ധപ്പെടുന്നത്.

ഇരകളുടെ വ്യക്തിവിവരങ്ങൾ മുൻകൂട്ടി ശേഖരിച്ച് വിശ്വസനീയമായ രീതിയിൽ സംസാരിക്കുന്ന തട്ടിപ്പുകാർ, സിസ്റ്റം സുരക്ഷിതമാക്കുന്നതിനായി കാർഡുകൾ റദ്ദാക്കണമെന്ന വ്യാജേന താമസസ്ഥലത്ത് നേരിട്ടെത്തുകയാണ് ചെയ്യുന്നത്. തുടർന്ന് വിവരങ്ങൾ പരിശോധിക്കാനെന്ന പേരിൽ കാർഡുകളും രഹസ്യ പിൻ നമ്പറുകളും കൈക്കലാക്കി വൻതുക തട്ടിയെടുക്കുന്നതാണ് ഇതിൻ്റെ പ്രവർത്തനരീതി. ബാങ്കുകളോ ക്രെഡിറ്റ് കാർഡ് ഏജൻസികളോ ഒരിക്കലും ഉപഭോക്താക്കളുടെ വസതികളിൽ നേരിട്ടെത്തി കാർഡുകളോ രഹസ്യ കോഡുകളോ ശേഖരിക്കാറില്ലെന്ന് പോലീസ് വ്യക്തമാക്കി.

ഇത്തരം സംശയാസ്പദമായ കോളുകൾ ലഭിച്ചാൽ ഉടനടി സംഭാഷണം അവസാനിപ്പിക്കണമെന്നും, ബാങ്കുകളുടെ ഔദ്യോഗിക ഹെൽപ്പ് ലൈൻ നമ്പറുകളിലേക്ക് നേരിട്ട് വിളിച്ച് വിവരങ്ങളുടെ സത്യാവസ്ഥ ഉറപ്പുവരുത്തണമെന്നും അന്വേഷണ ഉദ്യോഗസ്ഥർ നിർദ്ദേശിച്ചു. ഡിജിറ്റൽ സാമ്പത്തിക ഇടപാടുകളിൽ ജാഗ്രത കാണിക്കണമെന്നും  ഇത്തരം സന്ദേശങ്ങൾ മുതിർന്ന പൗരന്മാരിലേക്ക് പങ്കുവെച്ച് കൂടുതൽ ആളുകൾ വഞ്ചിക്കപ്പെടുന്നത് തടയാൻ സഹകരിക്കണമെന്നും പൊലീസ് അഭ്യർത്ഥിച്ചു