കാൽനടയായി കാനഡ കണ്ട്  ജാപ്പനീസ് യാത്രികൻ; വാൻകൂവറിൽ യാത്രയ്ക്ക് വിജയകരമായ സമാപനം

 

യാതൊരുവിധ ചാരിറ്റി ലക്ഷ്യങ്ങളോ ധനസമാഹരണ പ്രചാരണങ്ങളോ ഇല്ലാതെ, കേവലം  സന്തോഷവും അനുഭൂതിയും മാത്രം മുന്നിൽ കണ്ട് കാനഡ ഭൂഖണ്ഡം കാൽനടയായി താണ്ടി ശ്രദ്ധേയനാവുകയാണ് ജാപ്പനീസ് സ്വദേശിയായ നോബുആക്കി ഒകുമുറ. 'നോബി' എന്ന് വിളിക്കപ്പെടുന്ന ഇദ്ദേഹം, നോവ സ്കോഷ്യയിലെ ഹാലിഫാക്സിൽ നിന്ന് നാലര മാസങ്ങൾക്ക് മുൻപ് ആരംഭിച്ച ഈ അപൂർവ്വ  യാത്ര, ആയിരക്കണക്കിന് കിലോമീറ്ററുകൾ പിന്നിട്ട് ബ്രിട്ടീഷ് കൊളംബിയയിലെ വാൻകൂവറിൽ എത്തിച്ചേർന്നിരിക്കുകയാണ്. സ്വന്തം ജന്മനാടായ ജപ്പാൻ അതിവേഗം കാൽനടയായി നടന്ന് ഗിന്നസ് വേൾഡ് റെക്കോർഡ് സ്വന്തമാക്കിയിട്ടുള്ള ഒകുമുറ, ഇത്തരത്തിൽ പ്രത്യേക ലക്ഷ്യങ്ങളൊന്നുമില്ലാതെ നടന്നുതീർക്കുന്ന അഞ്ചാമത്തെ രാജ്യമാണ് കാനഡ. 

അത്യാവശ്യ സാധനങ്ങൾ അടങ്ങിയ ചെറിയൊരു കാർട്ടുമായി  യാത്ര പുറപ്പെട്ട ഇദ്ദേഹം, വഴിയിലുടനീളം കാനഡയുടെ വന്യമായ പ്രകൃതി സൗന്ദര്യവും വൈവിധ്യമാർന്ന കാലാവസ്ഥയും ആസ്വദിച്ചാണ് നടന്നത്. സാമ്പത്തിക സഹായങ്ങൾ അഭ്യർത്ഥിച്ചോ റെക്കോർഡുകൾ സ്ഥാപിക്കാനോ ഉള്ള ശ്രമമല്ല ഇതെന്നും, തൻ്റെ സന്തോഷത്തിന് വേണ്ടിയാണ്  നടക്കുന്നത് എന്നും നോബി പറയുന്നു. യാത്രയിലുടനീളം പ്രാദേശികവാസികളിൽ നിന്നും കാനഡയിലെ ജനങ്ങളിൽ നിന്നും ലഭിച്ച അളവറ്റ പിന്തുണയും ഊഷ്മളമായ സ്വീകരണവുമാണ് ഈ സംരംഭത്തെ അർത്ഥവത്താക്കിയതെന്ന് ഒകുമുറ ചൂണ്ടിക്കാണിക്കുന്നു.

വഴിയോരങ്ങളിൽ കണ്ടുമുട്ടിയ അപരിചിതർ ഭക്ഷണവും താമസസൗകര്യവും നൽകി സഹായിച്ചതായി അദ്ദേഹം ഓർത്തെടുക്കുന്നു. വാൻകൂവറിൽ യാത്ര പൂർത്തിയാക്കുമ്പോൾ, കാനഡയുടെ പ്രകൃതിസൗന്ദര്യത്തേക്കാൾ ഉപരി അവിടുത്തെ ജനങ്ങളുടെ സ്നേഹവും കരുതലുമാണ് തൻ്റെ ഏറ്റവും വലിയ നേട്ടമെന്നും അദ്ദേഹം കൂട്ടിച്ചേർത്തു. സ്വന്തം സന്തോഷത്തിനായി നടത്തുന്ന ഈ യാത്ര മറ്റുള്ളവർക്ക് അവരുടെ ലക്ഷ്യങ്ങൾ പിന്തുടരാൻ പ്രചോദനമാണെന്നും അദ്ദേഹം  പറയുന്നു.