ലോസ് ഏഞ്ചല്സിലെ സൗത്ത് ബേ പ്രദേശത്ത് ഞായറാഴ്ച പുലര്ച്ചെ ഭൂചലനം
By: 600002 On: Sep 7, 2026, 9:54 AM
പി പി ചെറിയാന്
ലോസ് ഏഞ്ചല്സ്: സൗത്ത് ബേ പ്രദേശത്ത് ഞായറാഴ്ച പുലര്ച്ചെ ചെറിയ ഭൂചലനം അനുഭവപ്പെട്ടു. യു.എസ് ജിയോളജിക്കല് സര്വേയുടെ (USGS) കണക്കുകള് പ്രകാരം റിക്ടര് സ്കെയിലില് 3.2 തീവ്രത രേഖപ്പെടുത്തിയ ഭൂചലനത്തിന്റെ പ്രഭവകേന്ദ്രം കോംപ്ട്ടണില് നിന്ന് രണ്ട് മൈല് തെക്കുകിഴക്കായി ഭൂമിക്കടിയില് ഏകദേശം എട്ട് മൈല് ആഴത്തിലാണ്. അര്ദ്ധരാത്രി കഴിഞ്ഞ് 12:15-ഓടെയാണ് ഭൂചലനമുണ്ടായത്.
പ്രദേശവാസികള്ക്ക് പ്രകമ്പനം അനുഭവപ്പെട്ടെങ്കിലും ആളപായമോ നാശനഷ്ടങ്ങളോ റിപ്പോര്ട്ട് ചെയ്തിട്ടില്ല. എങ്കിലും അധികൃതര് സ്ഥിതിഗതികള് നിരീക്ഷിച്ചു വരികയാണ്.
വലിയ ഭൂകമ്പ സാധ്യതയുള്ള പ്രദേശമായ ദക്ഷിണ കാലിഫോര്ണിയയിലാണ് ഈ ചെറിയ ചലനം ഉണ്ടായിരിക്കുന്നത് എന്നത് ആശങ്ക ഉയര്ത്തുന്നുണ്ട്. സാന് ആന്ഡ്രിയാസ്, സാന് ജാസിന്റോ തുടങ്ങിയ പ്രധാന ഭൂകമ്പ മേഖലകള് സംഗമിക്കുന്ന കജോണ് പാസ് (Cajon Pass) പോലുള്ള ഭാഗങ്ങളില് ഭൂമിക്കടിയിലെ ടെക്റ്റോണിക് സമ്മര്ദ്ദം കഴിഞ്ഞ 1,000 വര്ഷത്തിനിടയിലെ ഏറ്റവും ഉയര്ന്ന നിലയിലാണെന്ന് ശാസ്ത്രജ്ഞര് മുന്നറിയിപ്പ് നല്കുന്നു.
ഭാവിയില് ഇവിടെ 7.5 തീവ്രത വരെ രേഖപ്പെടുത്താന് സാധ്യതയുള്ള വലിയ ഭൂകമ്പങ്ങള് ഉണ്ടാകാമെന്നും ഗവേഷകര് ചൂണ്ടിക്കാണിക്കുന്നു. 1994 ലെ നോര്ത്രിഡ്ജ്, 1933 ലെ ലോംഗ് ബീച്ച് ഭൂകമ്പങ്ങള് ഉള്പ്പെടെയുള്ള വലിയ ദുരന്തങ്ങളുടെ ചരിത്രമുള്ള ഈ പ്രദേശത്ത്, ചെറിയ ചലനങ്ങള് പോലും വലിയൊരു ഭീഷണിയുടെ ഓര്മ്മപ്പെടുത്തലായാണ് വിദഗ്ധര് കാണുന്നത്.