യുകെ വീസ വൈകി; പൂവച്ചലില് 25കാരി മരിച്ച നിലയില്
By: 600002 On: Sep 5, 2026, 9:59 AM
പ്രസാദ് തീയാടിക്കല്
തിരുവനന്തപുരം: പൂവച്ചല് മുളമൂട് സ്വദേശിനിയായ അഞ്ജന (25)യെ വീട്ടിലെ കിടപ്പുമുറിയില് മരിച്ച നിലയില് കണ്ടെത്തി. മുളമൂട് ബി.എസ്. ഭവനില് ബാബുസിന്ധു ദമ്പതികളുടെ മകളാണ് അഞ്ജന.
വ്യാഴാഴ്ച രാത്രിയായിരുന്നു സംഭവം. ഏറെ നേരമായിട്ടും മുറിയില് നിന്ന് പ്രതികരണമൊന്നും ലഭിക്കാതിരുന്നതിനെ തുടര്ന്ന് വീട്ടുകാര് പരിശോധിച്ചപ്പോഴാണ് അഞ്ജനയെ മരിച്ച നിലയില് കണ്ടെത്തിയത്. തുടര്ന്ന് സ്വകാര്യ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
യുകെയില് ഉപരിപഠനം നടത്തുന്നതിനുള്ള തയ്യാറെടുപ്പിലായിരുന്നു അഞ്ജന. യുകെയിലുള്ള സഹോദരനൊപ്പം പഠനത്തിനായി പോകാന് ഒരുങ്ങിയിരുന്നെങ്കിലും വീസ ലഭിക്കുന്നതിലുണ്ടായ കാലതാമസം മൂലം യാത്ര തടസ്സപ്പെട്ടതില് അഞ്ജന മാനസിക വിഷമത്തിലായിരുന്നുവെന്നാണ് ബന്ധുക്കള് പൊലീസിനെ അറിയിച്ചത്. മരണത്തിലേക്ക് നയിച്ച സാഹചര്യം സംബന്ധിച്ച് പൊലീസ് അന്വേഷണം നടത്തിവരികയാണ്.
ചില മാധ്യമ റിപ്പോര്ട്ടുകള് പ്രകാരം അഞ്ജന പഠനവുമായി ബന്ധപ്പെട്ട കോഴ്സ് പൂര്ത്തിയാക്കിയ ശേഷമാണ് യുകെയില് ഉപരിപഠനത്തിന് ശ്രമിച്ചിരുന്നത്. ഇന്ക്വസ്റ്റ് ഉള്പ്പെടെയുള്ള നിയമനടപടികള് പൊലീസ് സ്വീകരിച്ചു.
സഹോദരന്: സഞ്ജു.
മരണകാരണം സംബന്ധിച്ച ബന്ധുക്കളുടെ മൊഴിയും പൊലീസിന്റെ പ്രാഥമിക നിഗമനവുമാണ് നിലവില് പുറത്തുവന്നിട്ടുള്ളത്. പൊലീസ് അന്വേഷണത്തിന് ശേഷമേ കൂടുതല് വ്യക്തത ലഭിക്കൂ.