ആൽബർട്ട റെഫറണ്ടം: തപാൽ വോട്ടുകളിലെ 'സെൽഫ് ഡിക്ലറേഷൻ' വിവാദത്തിൽ; ആശങ്ക പരിഹരിച്ച് ഇലക്ഷൻസ് ആൽബർട്ട

കാനഡയിലെ ആൽബർട്ടയിൽ വരാനിരിക്കുന്ന റെഫറണ്ടത്തിനുള്ള  തപാൽ വോട്ടിംഗ് പാക്കറ്റുകളിലെ ചില നിബന്ധനകൾ വോട്ടർമാർക്കിടയിൽ വലിയ ആശയക്കുഴപ്പത്തിന് ഇടയാക്കുന്നു. വോട്ടെടുപ്പ് ദിവസങ്ങളിലോ അതിന് മുൻപോ നേരിട്ടെത്തി വോട്ട് ചെയ്യാൻ കഴിയില്ലെന്ന് പ്രഖ്യാപിക്കണമെന്ന നിബന്ധനയാണ് ആളുകളെ ആശങ്കയിലാക്കിയത്.

വ്യാജ സത്യപ്രസ്താവന നടത്തിയാൽ 50,000 ഡോളർ വരെ പിഴയോ രണ്ട് വർഷം വരെ തടവോ ലഭിക്കാമെന്ന മുന്നറിയിപ്പും ഇതിലുണ്ടായിരുന്നു. നേരിട്ടെത്തി വോട്ട് ചെയ്യുമ്പോൾ ഉണ്ടാകുന്ന നീണ്ട ക്യൂ ഒഴിവാക്കാൻ തപാൽ വോട്ടിന് അപേക്ഷിച്ച പലരും, ഈ കടുപ്പമേറിയ വ്യവസ്ഥ കണ്ടതോടെ വോട്ട് ചെയ്യാൻ തന്നെ ഭയക്കുകയാണ്.

എന്നാൽ, വിഷയം ശ്രദ്ധയിൽപ്പെട്ടതോടെ വ്യക്തത വരുത്തി 'ഇലക്ഷൻസ് ആൽബർട്ട' രംഗത്തെത്തി. മുൻകാല നിയമത്തിലെ പഴയ നിബന്ധന അബദ്ധവശാൽ പുതിയ പാക്കറ്റുകളിൽ ഉൾപ്പെട്ടതാണെന്നും, വോട്ടെടുപ്പ് ദിനത്തിൽ നേരിട്ടെത്താൻ കഴിയില്ലെന്ന വരി ഒഴിവാക്കിത്തന്നെ ആളുകൾക്ക് വോട്ട് ചെയ്യാമെന്നും അധികൃതർ അറിയിച്ചു. ഫോമിലെ ആ നിർദ്ദിഷ്ട വരി പേന കൊണ്ട് വെട്ടിക്കളഞ്ഞ ശേഷം ബാക്കി ഭാഗം പൂരിപ്പിച്ച് വോട്ട് അയക്കാവുന്നതാണ്. അതേസമയം, കനേഡിയൻ പൗരത്വവും 18 വയസ്സ് തികഞ്ഞയാളുമാണെന്ന കാര്യങ്ങൾ വോട്ടർമാർ നിർബന്ധമായും സാക്ഷ്യപ്പെടുത്തണം.

ആൽബർട്ട കാനഡയിൽ തുടരണമോ എന്നതടക്കം 10 പ്രധാന വിഷയങ്ങളിലാണ് ഒക്ടോബർ 19-ന് റെഫറണ്ടം നടക്കുന്നത്. ഇതുവരെ 2,25,000-ത്തിലധികം ആളുകളാണ് തപാൽ വോട്ടിനായി അപേക്ഷിച്ചിട്ടുള്ളത്. 2023-ലെ തിരഞ്ഞെടുപ്പിനെ അപേക്ഷിച്ച് നാലിരട്ടിയോളം വർദ്ധനവാണിത്. തപാൽ വോട്ടിനായി അപേക്ഷിക്കാനുള്ള അവസാന തീയതി സെപ്റ്റംബർ 25 ആയി ഇലക്ഷൻസ് ആൽബർട്ട പുതുക്കി നിശ്ചയിച്ചിട്ടുണ്ട്.