കിങ്സ്റ്റണിലെ തീപിടിത്തത്തിൽ രണ്ട് പേർ മരിച്ച സംഭവത്തിൽ സുരക്ഷാ വീഴ്ച വരുത്തിയ കെട്ടിട ഉടമയ്ക്ക് 30,000 ഡോളർ പിഴ

 

കാനഡയിലെ കിങ്സ്റ്റണിൽ 2023-ലുണ്ടായ തീപിടിത്തത്തിൽ രണ്ടുപേർ മരിച്ച സംഭവത്തിൽ, കെട്ടിടത്തിലെ സുരക്ഷാ മാനദണ്ഡങ്ങൾ പാലിക്കാത്ത ഉടമയ്ക്ക് 30,000 ഡോളർ (ഏകദേശം 25 ലക്ഷത്തോളം രൂപ) പിഴ ചുമത്തി. കെട്ടിട ഉടമയായ പൃഥ്വിപാൽ ദാദിയാലയ്ക്കാണ് കോടതി ശിക്ഷ വിധിച്ചത്.

2023 മാർച്ച് 30-നാണ് സംഭവം നടന്നത്. മോൺട്രിയൽ സ്ട്രീറ്റിലെ കെട്ടിടത്തിൽ ഉണ്ടായ തീപിടിത്തത്തിൽ ബോണി ഡെമിൽ (35), പങ്കാളി ആദം ക്രോളി (34) എന്നിവരാണ് മരിച്ചത്. എട്ടുപേർ ഉണ്ടായിരുന്ന കെട്ടിടത്തിന്റെ അടുക്കളയിൽ നിന്നാണ് തീ പടർന്നത്. തീപിടിത്തത്തെ പ്രതിരോധിക്കുന്ന വാതിലുകൾ ഇല്ലാതിരുന്നത്, കാർബൺ മോണോക്സൈഡ് അലാറം വയ്ക്കാതിരുന്നത്, തീ അണയ്ക്കാനുള്ള ഫയർ എക്സ്റ്റിംഗുഷർ ലഭ്യമാക്കാതിരുന്നത് തുടങ്ങി മൂന്ന് വലിയ സുരക്ഷാ വീഴ്ചകൾ ദാദിയാല കോടതിയിൽ സമ്മതിച്ചു.

കേസിൽ ദാദിയാലയ്ക്ക് 30 ദിവസത്തെ തടവുശിക്ഷ നൽകണമെന്ന് നഗരസഭയുടെ അഭിഭാഷകൻ ആവശ്യപ്പെട്ടിരുന്നു. എന്നാൽ, 78 വയസ്സുള്ള ആദ്യമായി കുറ്റം ചുമത്തപ്പെടുന്ന ഇയാളെ ജയിലിലടയ്ക്കുന്നത് ഉചിതമല്ലെന്ന് വിലയിരുത്തിയ കോടതി, ഒരോ നിയമലംഘനത്തിനും 10,000 ഡോളർ വീതം ആകെ 30,000 ഡോളർ പിഴയും ഒരു വർഷത്തെ പ്രൊബേഷനും വിധിക്കുകയായിരുന്നു.

അതേസമയം, കോടതി വിധിക്കെതിരെ മരിച്ച ബോണിയുടെ കുടുംബം രംഗത്തെത്തി. തങ്ങൾക്ക് നീതി ലഭിച്ചില്ലെന്നും ഇത്തരം ചെറിയ പിഴകൾ മറ്റു കെട്ടിട ഉടമകൾക്ക് മുന്നറിയിപ്പാകില്ലെന്നും അവർ പറഞ്ഞു. കെട്ടിടത്തിൽ ഒരു ഫയർ എക്സ്റ്റിംഗുഷർ എങ്കിലും ഉണ്ടായിരുന്നെങ്കിൽ തന്റെ മകൾക്ക് രക്ഷപ്പെടാൻ അല്പം സമയം എങ്കിലും ലഭിക്കുമായിരുന്നുവെന്ന് ബോണിയുടെ അമ്മ കൂട്ടിച്ചേർത്തു.