കാനഡയിലെ സുരക്ഷിത നഗരങ്ങളുടെ പട്ടികയിൽ കാൽഗറി എട്ടാമത്; ക്യുബെക് സിറ്റി ഒന്നാമതെന്ന് സർവേ

 

കാനഡയിലെ ഏറ്റവും സുരക്ഷിതമായ നഗരങ്ങളെ കണ്ടെത്താൻ ലൈസൺ സ്ട്രാറ്റജീസ് (Liaison Strategies) നടത്തിയ പുതിയ ദേശീയ സർവേയിൽ കാൽഗറി എട്ടാം റാങ്ക് നേടി. രാജ്യത്തെ 15 പ്രധാന നഗരങ്ങളെ ഉൾപ്പെടുത്തി, 1,500 ആളുകൾക്കിടയിലാണ് സർവേ സംഘടിപ്പിച്ചത്. ജനങ്ങളുടെ അനുകൂലവും പ്രതികൂലവുമായ അഭിപ്രായങ്ങൾ കണക്കാക്കിയുള്ള 'നെറ്റ് സേഫ്റ്റി സ്‌കോറിൽ' +24 പോയിന്റോടെയാണ് കാൽഗറി ഈ നേട്ടം കൈവരിച്ചത്. സർവേയിൽ പങ്കെടുത്ത 59 ശതമാനം ആളുകളും കാൽഗറിയെ സുരക്ഷിതമായ നഗരമായാണ് വിലയിരുത്തിയത്.

പട്ടികയിൽ ക്യുബെക് സിറ്റി രാജ്യത്തെ ഏറ്റവും സുരക്ഷിതമായ നഗരമായി തെരഞ്ഞെടുക്കപ്പെട്ടപ്പോൾ തലസ്ഥാനമായ ഓട്ടവ രണ്ടാമതെത്തി. അതേസമയം വാൻകൂവർ, ടൊറന്റോ, എഡ്മണ്ടൺ, വിന്നിപെഗ് തുടങ്ങിയ പ്രമുഖ നഗരങ്ങൾ നെഗറ്റീവ് സ്‌കോറോടെ സുരക്ഷാ നിർണ്ണയത്തിൽ ഏറെ പിന്നിലായി.

ഔദ്യോഗിക കുറ്റകൃത്യ കണക്കുകളേക്കാൾ വാർത്താ മാധ്യമങ്ങളിലെ റിപ്പോർട്ടുകളും വ്യക്തിപരമായ അനുഭവങ്ങളുമാണ് നഗര സുരക്ഷയെക്കുറിച്ചുള്ള പൊതുജനങ്ങളുടെ ധാരണ രൂപപ്പെടുത്തുന്നത് എന്ന് സർവേ വ്യക്തമാക്കുന്നു. അതുകൊണ്ടുതന്നെ, ഒരു നഗരത്തിന്റെ സുരക്ഷിതത്വം എന്നത് കേവലം ക്രമസമാധാന പാലനം മാത്രമല്ല, മറിച്ച് ആ നഗരത്തിന്റെ പൊതു പ്രതിച്ഛായയുമായിക്കൂടി ബന്ധപ്പെട്ടിരിക്കുന്നു. കാൽഗറി പോലെയുള്ള വളരുന്ന നഗരങ്ങൾക്ക് സാമ്പത്തിക-സാംസ്‌കാരിക മേഖലകളിൽ ഇത്തരം ഒരു നല്ല പ്രതിച്ഛായ നിലനിർത്തേണ്ടത് അത്യാവശ്യമാണെന്നും റിപ്പോർട്ട് ചൂണ്ടിക്കാണിക്കുന്നു.