യു.എസ് വിപണിയെ അമിതമായി ആശ്രയിക്കുന്നത് കാനഡയിലെ ചെറുകിട സംരംഭങ്ങൾക്ക് തിരിച്ചടിയാകുന്നതായി സർവേ റിപ്പോർട്ട്

കാനഡയിലെ ചെറുകിട വ്യവസായ സ്ഥാപനങ്ങളിൽ 70 ശതമാനത്തോളവും പ്രവർത്തനങ്ങൾക്കായി അമേരിക്കയെ നേരിട്ടോ അല്ലാതെയോ ആശ്രയിക്കുന്നതായി പുതിയ സർവേ റിപ്പോർട്ട്. 'മെർച്ചന്റ് ഗ്രോത്ത്' നടത്തിയ സർവേ പ്രകാരം, ഉൽപന്നങ്ങളുടെ കയറ്റുമതി, നിർമ്മാണത്തിനാവശ്യമായ അസംസ്‌കൃത വസ്തുക്കളുടെ ഇറക്കുമതി, വിതരണ ശൃംഖല എന്നിവയ്‌ക്കെല്ലാം ഭൂരിഭാഗം കനേഡിയൻ കമ്പനികളും പ്രധാനമായും യു.എസ് വിപണിയെ തന്നെയാണ് ആശ്രയിക്കുന്നത്.

എന്നാൽ, ഇരു രാജ്യങ്ങളും തമ്മിലുള്ള വ്യാപാര തർക്കങ്ങളും പുതിയ നികുതി വ്യവസ്ഥകളും ഈ ചെറുകിട സ്ഥാപനങ്ങൾക്ക് വലിയ വെല്ലുവിളിയാണ് ഉയർത്തുന്നത്. പ്രവർത്തനച്ചെലവ് കുത്തനെ കൂടിയതും ലാഭം കുറഞ്ഞതും പല സ്ഥാപനങ്ങളുടെയും നിലനിൽപ്പ് തന്നെ അപകടത്തിലാക്കിയിട്ടുണ്ട്. വലിയ കോർപ്പറേറ്റ് കമ്പനികൾക്ക് ഇത്തരം പ്രതിസന്ധികളെ മറികടക്കാനോ പ്രവർത്തനം മറ്റ് വിദേശ രാജ്യങ്ങളിലേക്ക് വ്യാപിപ്പിക്കാനോ ഉള്ള സാമ്പത്തിക ശേഷിയുണ്ട്. എന്നാൽ പരിമിതമായ മൂലധനം മാത്രമുള്ള ചെറുകിട വ്യവസായങ്ങൾക്ക് വിപണിയിലുണ്ടാകുന്ന ഇത്തരം പെട്ടെന്നുള്ള മാറ്റങ്ങൾ താങ്ങാനാവുന്നില്ല.

അമേരിക്കൻ വിപണിയെ അമിതമായി ആശ്രയിക്കുന്നതിൻ്റെ ആഘാതം കുറയ്ക്കാൻ ബദൽ അന്താരാഷ്ട്ര വിപണികൾ കണ്ടെത്താനും പ്രാദേശിക ഉൽപ്പാദനം കൂട്ടാനും സംരംഭകർ നിർബന്ധിതരാവുകയാണ്. എങ്കിലും, ദശാബ്ദങ്ങളായുള്ള ഉഭയകക്ഷി ബന്ധവും ഭൂമിശാസ്ത്രപരമായ അടുപ്പവും കാരണം യു.എസ് വിപണിയിൽ നിന്ന് പെട്ടെന്നൊരു മാറ്റം സാധ്യമല്ല. ഈ സാഹചര്യത്തിൽ, പ്രതിസന്ധി തരണം ചെയ്യാൻ സർക്കാരിന്റെ ഭാഗത്തുനിന്ന് അടിയന്തര സാമ്പത്തിക സഹായങ്ങളും അനുകൂലമായ നയരൂപീകരണവും ഉണ്ടാകണമെന്ന് വ്യാപാരികൾ ആവശ്യപ്പെടുന്നു.