പ്രോപ്പർട്ടി ടാക്സ് കുത്തനെ കൂട്ടിയേക്കുമെന്ന രഹസ്യ രേഖകൾ ചോർന്നതോടെ കാൽഗറിയിൽ കൌൺസിലർമാർ തമ്മിൽ പോര് മുറുകുന്നു

 

 

പ്രോപ്പർട്ടി ടാക്സ് കുത്തനെ കൂട്ടാൻ നീക്കം നടക്കുന്നതായി വ്യക്തമാക്കുന്ന രഹസ്യ ബജറ്റ് രേഖകൾ ചോർന്നതോടെ കാൽഗറി സിറ്റി ഹാളിൽ കൗൺസിലർമാർ തമ്മിൽ കടുത്ത ഭിന്നത. വരും വർഷങ്ങളിൽ വലിയ നികുതി വർദ്ധനവ് നടപ്പിലാക്കാൻ ആലോചനയുണ്ടെന്നാണ് പുറത്തുവന്ന രേഖകൾ വ്യക്തമാക്കുന്നത്.

രേഖകൾ ചോർത്തിയത് താൻ തന്നെയാണെന്ന് വാർഡ് 14 കൗൺസിലർ ലാൻഡൻ ജോൺസ്റ്റൺ തുറന്നുസമ്മതിച്ചു. 2026-ൽ 20 ശതമാനവും, 2027-ൽ 15 ശതമാനവും നികുതി വർദ്ധിപ്പിക്കാൻ അടച്ചിട്ട മുറിയിൽ ചർച്ച നടന്ന കാര്യം ജനങ്ങൾ അറിയേണ്ടതുണ്ടെന്നതിനാലാണ് രേഖ പുറത്തുവിട്ടതെന്ന് അദ്ദേഹം പറഞ്ഞു.

എന്നാൽ ഈ വിഷയത്തിൽ അന്തിമ തീരുമാനമൊന്നും എടുത്തിട്ടില്ലെന്ന് മേയർ ജെറോമി ഫാർകസ് വ്യക്തമാക്കി. പുറത്തുവന്ന വിവരങ്ങൾ പ്രാഥമികമായ നിർദ്ദേശങ്ങൾ മാത്രമാണെന്നും, രഹസ്യ രേഖകൾ ചോർത്തുന്നത് നിയമപരമായ പ്രത്യാഘാതങ്ങൾ ഉണ്ടാക്കുമെന്നും മേയർ മുന്നറിയിപ്പ് നൽകി.

അതേസമയം, നികുതി വർദ്ധനവിനെക്കുറിച്ചുള്ള വാർത്തകൾ പുറത്തുവന്നതോടെ വലിയ ആശങ്കയിലാണ് കാൽഗറിയിലെ ജനങ്ങൾ. ബജറ്റ് ചർച്ചകളിൽ സുതാര്യത ഉറപ്പാക്കാൻ വരും ദിവസങ്ങളിൽ സിറ്റി കൗൺസിലിന് മേൽ കടുത്ത സമ്മർദ്ദമുണ്ടാകും.