മേപ്പിൾ റിഡ്ജിൽ വ്യാജ കറൻസികൾ വ്യാപിക്കുന്നു: ജാഗ്രതാ നിർദേശവുമായി പൊലീസ്

 

കാനഡയിലെ ബ്രിട്ടീഷ് കൊളംബിയയിലുള്ള മേപ്പിൾ റിഡ്ജ് പ്രദേശത്ത് വ്യാജ ബാങ്ക് നോട്ടുകൾ വൻതോതിൽ പ്രചരിക്കുന്നതായി ആർ.സി.എം.പി  മുന്നറിയിപ്പ് നൽകി. പ്രാദേശിക കച്ചവട സ്ഥാപനങ്ങളെ ലക്ഷ്യമിട്ടാണ് വ്യാജ നോട്ടുകൾ വിതരണം ചെയ്യുന്ന സംഘങ്ങൾ പ്രവർത്തിക്കുന്നത്. അടുത്തകാലത്തായി ഇത്തരത്തിലുള്ള നിരവധി പരാതികൾ റിപ്പോർട്ട് ചെയ്തതിനെ തുടർന്നാണ് അധികൃതർ വ്യാപാരികൾക്കും പ്രദേശവാസികൾക്കും പ്രത്യേക മുന്നറിയിപ്പ് നൽകിയത്.

റിപ്പോർട്ടുകൾ പ്രകാരം, പ്രധാനമായും 20, 50, 100 ഡോളറിന്റെ കനേഡിയൻ നോട്ടുകളുടെ വ്യാജ രൂപങ്ങളാണ് വിപണിയിൽ എത്തിയിട്ടുള്ളത്. നോട്ടുകളിലെ സുരക്ഷാ സവിശേഷതകളും ഹോളോഗ്രാമുകളും കൃത്യമായി പരിശോധിച്ച് മാത്രം പണമിടപാടുകൾ നടത്താൻ പോലീസ് ആവശ്യപ്പെട്ടിട്ടുണ്ട്. സംശയാസ്പദമായ രീതിയിൽ വ്യാജ നോട്ടുകൾ ശ്രദ്ധയിൽപ്പെട്ടാൽ ഉടനടി പോലീസിനെ വിവരമറിയിക്കണമെന്നും, ഇത്തരം നോട്ടുകൾ കൈപ്പറ്റുന്നത് സാമ്പത്തിക നഷ്ടത്തിന് ഇടയാക്കുമെന്നും കച്ചവടക്കാർക്ക് ജാഗ്രതാ നിർദേശം നൽകിയിട്ടുണ്ട്.

സംഭവത്തിന് പിന്നിൽ പ്രവർത്തിക്കുന്ന കുറ്റവാളികളെ കണ്ടെത്തുന്നതിനായി പോലീസ് പ്രദേശത്തെ സി.സി.ടി.വി ദൃശ്യങ്ങൾ കേന്ദ്രീകരിച്ച് വിപുലമായ അന്വേഷണം ആരംഭിച്ചിട്ടുണ്ട്. കള്ളനോട്ട് മാഫിയക്കെതിരെ ശക്തമായ നടപടികൾ സ്വീകരിക്കുമെന്നും, വ്യാപാരികൾ നിർബന്ധമായും കറൻസികളുടെ സുരക്ഷാ പരിശോധനാ ഉപകരണങ്ങൾ ഉപയോഗിക്കണമെന്നും അധികൃതർ കൂട്ടിച്ചേർത്തു