ആഗസ്റ്റിൽ മഞ്ഞ്!  ആൽബർട്ടയിൽ വിസ്മയമായി 'സർപ്രൈസ് വിൻ്റർ'

 

 ശരത്കാലത്തിൻ്റെ കൊഴിഞ്ഞുപോക്കിനായി കാത്തുനിൽക്കാതെ, ഓഗസ്റ്റിൻ്റെ ഒടുവിൽ തന്നെ  ആൽബർട്ടയെ തേടിയെത്തിയിരിക്കുകയാണ് അപ്രതീക്ഷിത ശൈത്യകാലം! പർവ്വതനിരകൾ വെള്ളപ്പട്ടുടുത്തതുപോലെയുള്ള മനോഹരമായ കാഴ്ചയാണ് ഞായറാഴ്ച പുലർച്ചെ ഉറക്കമുണർന്ന പ്രദേശവാസികളെയും സഞ്ചാരികളെയും ഒരേപോലെ വിസ്മയിപ്പിച്ചത്. വൻനഗരങ്ങളെ തൽക്കാലം ഒഴിവാക്കി, ഉയർന്ന മലനിരകളിൽ മാത്രം തമ്പടിച്ചിരിക്കുന്ന ഈ 'വേനൽക്കാല മഞ്ഞുവീഴ്ച' പർവ്വതപ്രദേശങ്ങളെ  വിൻ്റർ വണ്ടർലാൻഡാക്കി മാറ്റിയിരിക്കുകയാണ്. നക്കിസ്ക റിഡ്ജ്‌ടോപ്പ് കേന്ദ്രത്തിൽ താപനില മൈനസ് 0.1 ഡിഗ്രി സെൽഷ്യസിലേക്ക് കൂപ്പുകുത്തുകയും, കൊടും തണുപ്പ് രേഖപ്പെടുത്തുകയും ചെയ്തു.

ലോകപ്രശസ്തമായ ബാൻഫ് സൺഷൈൻ , ലേക്ക് ലൂയിസ് എന്നീ സ്കീ റിസോർട്ടുകളിലെ തത്സമയ ക്യാമറകളിൽ പതിഞ്ഞ ദൃശ്യങ്ങൾ മഞ്ഞുമൂടിയ ഒരു സ്വപ്നലോകത്തിൻ്റെ പ്രതീതിയാണ് സൃഷ്ടിക്കുന്നത്.  ബാൻഫ് സൺഷൈൻ പങ്കുവെച്ച ഫേസ്ബുക്ക് പോസ്റ്റ് ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. കാനനാസ്കിസ് മേഖലയിൽ മഞ്ഞുവീഴ്ചയുടെ ഉയരം വരും മണിക്കൂറുകളിൽ 2200 മീറ്ററിൽ നിന്ന് 2700 മീറ്ററിലേക്ക് ഉയരുമെന്നാണ് കാലാവസ്ഥാ നിരീക്ഷകരുടെ കണക്കുകൂട്ടൽ.

പെട്ടെന്നുണ്ടായ ഈ മഞ്ഞുവീഴ്ച ശൈത്യകാലത്തെക്കുറിച്ചുള്ള പ്രവചനങ്ങളിലും വലിയ ചർച്ചകൾക്ക് തുടക്കമിട്ടിട്ടുണ്ട്. പ്രമുഖ കാലാവസ്ഥാ ഏജൻസിയായ 'ഓപ്പൺസ്നോ'യുടെ പ്രവചനപ്രകാരം എഡ്മണ്ടൺ, കാൽഗറി തുടങ്ങിയ പ്രധാന നഗരങ്ങളിൽ വരാനിരിക്കുന്ന മാസങ്ങളിൽ സാധാരണയേക്കാൾ ഉയർന്ന താപനിലയായിരിക്കും അനുഭവപ്പെടുക. എന്നാൽ, 2026–2027 കാലയളവിലെ ശൈത്യകാലം അതിതീവ്രവും തികച്ചും വൈവിധ്യമാർന്നതുമായ മാറ്റങ്ങളാൽ സമ്പന്നമായിരിക്കുമെന്നാണ് 'ഫാർമേഴ്‌സ് അൽമാനാക്ക്' മുന്നറിയിപ്പ് നൽകുന്നത്. സെപ്റ്റംബറിൽ ആൽബർട്ടയെ കാത്തിരിക്കുന്നത് എന്തൊക്കെയാണെന്ന് വ്യക്തമാക്കുന്ന അന്തിമ റിപ്പോർട്ട് ഉടൻ പുറത്തുവിടുമെന്ന് എൻവയോൺമെൻ്റ് ആൻഡ് ക്ലൈമറ്റ് ചേഞ്ച് കാനഡ അറിയിച്ചിട്ടുണ്ട്.