വേനൽ ചൂടിൽ നിന്ന് തണുപ്പിലേക്ക്: ആൽബർട്ടയിൽ 'ഫാൾ സീസൺ' എത്തുന്നു; സെപ്റ്റംബറോടെ താപനില കുത്തനെ കുറയും

വേനലിൻ്റെ ചൂടിന് വിട നൽകി ഫാൾ സീസണിൻ്റെ തണുപ്പിലേക്ക് മാറാനൊരുങ്ങി ആൽബർട്ട . എൻവിറോൺമെൻ്റ് ആൻ്റ് ക്ലൈമറ്റ് ചേഞ്ച് കാനഡ പുറത്തുവിട്ട പുതിയ പ്രവചനമനുസരിച്ച്, സെപ്റ്റംബർ മാസത്തോടെ പ്രവിശ്യയിലുടനീളം താപനില ഗണ്യമായി കുറയുകയും കാലാവസ്ഥയിൽ പ്രകടമായ മാറ്റങ്ങൾ ദൃശ്യമാവുകയും ചെയ്യും.

സെപ്റ്റംബറിൻ്റെ തുടക്കത്തിൽ കാൽഗറി, എഡ്മൻ്റൺ തുടങ്ങിയ പ്രധാന നഗരങ്ങളിൽ പകൽ താപനില 19°C മുതൽ 20°C വരെ മിതമായി തുടരുമെന്നാണ് വിലയിരുത്തൽ. എന്നാൽ മാസത്തിൻ്റെ രണ്ടാം പകുതിയിലേക്ക് കടക്കുന്നതോടെ രാത്രികാല താപനില 5°C വരെയോ അതിൽ താഴെയോ ആയി കുത്തനെ താഴാൻ സാധ്യതയുണ്ട്. പ്രവിശ്യയുടെ തെക്കൻ മേഖലകളിൽ ചില ദിവസങ്ങളിൽ നേരിയ ചൂട് തുടരുമെങ്കിലും, വടക്കൻ പ്രദേശങ്ങളിൽ തണുത്ത കാറ്റും മേഘാവൃതമായ അന്തരീക്ഷവും അനുഭവപ്പെടും.

ഉച്ചയ്ക്കു ശേഷമുള്ള ചെറിയ മഴയ്ക്കും അപൂർവ്വമായി നേരിയ മഞ്ഞുവീഴ്ചയ്ക്കും സാധ്യതയുണ്ട്. പെട്ടെന്നുണ്ടാകുന്ന ഈ അന്തരീക്ഷ വ്യതിയാനങ്ങൾ സാധാരണ ജീവിതത്തെ ബാധിക്കാതിരിക്കാൻ ആവശ്യമായ മുൻകരുതലുകൾ സ്വീകരിക്കണമെന്ന് കാലാവസ്ഥാ വിദഗ്ദ്ധരും പ്രാദേശിക ഭരണകൂടവും മുന്നറിയിപ്പ് നൽകി.