കുറഞ്ഞ വേതന നിരക്കുകളിൽ മാറ്റം: നോർത്ത് വെസ്റ്റ് ടെറിട്ടറിയിലും നുനാവട്ടിലും വേതന വർദ്ധന സെപ്റ്റംബർ ഒന്നു മുതൽ പ്രാബല്യത്തിൽ

 

 കാനഡയിലെ വിവിധ മേഖലകളിൽ തൊഴിലാളികളുടെ മിനിമം വേതനം വർദ്ധിപ്പിക്കുന്നതിന്റെ ഭാഗമായി അടുത്ത മാസം മുതൽ മാറ്റങ്ങൾ പ്രാബല്യത്തിൽ വരുന്നു. ജീവിതച്ചെലവ് ക്രമാതീതമായി ഉയർന്ന സാഹചര്യത്തിൽ തൊഴിലാളികളുടെ വരുമാനത്തിൽ ആശ്വാസം നൽകുകയെന്ന ലക്ഷ്യത്തോടെയാണ് നടപടി. രാജ്യത്തെ നോർത്ത് വെസ്റ്റ് ടെറിട്ടറി, നുനാവട്ട് എന്നീ  പ്രദേശങ്ങളിലാണ് സെപ്റ്റംബർ ഒന്നു മുതൽ പുതിയ നിരക്കുകൾ നടപ്പിലാക്കുന്നത്.
പുതിയ പരിഷ്കരണത്തോടെ നുനാവട്ടിൽ മണിക്കൂറിന് 19.75 ഡോളറായിരുന്ന വേതനം 20.17 ഡോളറായി ഉയരും. നോർത്ത് വെസ്റ്റ് ടെറിട്ടറിയിലും ഇതര പണപ്പെരുപ്പ സൂചികയുടെ അടിസ്ഥാനത്തിലുള്ള വേതന വർദ്ധനവ് നിലവിൽ വരും. കാനഡയിലെ മറ്റ് ചില പ്രവിശ്യകളായ ഒന്റാറിയോ, മണിറ്റോബ, സസ്‌കാച്ചെവൻ, നോവ സ്കോട്ടിയ എന്നിവിടങ്ങളിൽ ഒക്ടോബർ ഒന്ന് മുതലാണ് വേതന വർദ്ധന പ്രാബല്യത്തിൽ വരുന്നത്.
ബാങ്കിംഗ്, വിമാന ഗതാഗതം, ടെലികമ്മ്യൂണിക്കേഷൻ തുടങ്ങിയ ഫെഡറൽ ഭരണത്തിന് കീഴിലുള്ള മേഖലകളിലെ തൊഴിലാളികളുടെ മിനിമം വേതനം ഈ വർഷം ഏപ്രിൽ ഒന്നിന് മണിക്കൂറിന് 18.15 ഡോളറായി വർദ്ധിപ്പിച്ചിരുന്നു. ബ്രിട്ടീഷ് കൊളംബിയയിൽ ജൂണിലും വേതന വർദ്ധനവ് നടപ്പിലാക്കി. പണപ്പെരുപ്പത്തിന്റെ തോത് അനുസരിച്ച് പ്രവിശ്യകളിലും ഫെഡറൽ തലത്തിലും ഓരോ വർഷവും ക്രമീകരിക്കുന്ന കുറഞ്ഞ വേതന നിരക്കുകൾ സാധാരണക്കാരായ തൊഴിലാളികൾക്ക് വലിയ ആശ്വാസമാണ് നൽകുന്നത്.