ബ്രിട്ടീഷ് കൊളംബിയയിൽ 2027-ലെ വാടക വർധന പരിധി 2.2 ശതമാനമായി നിശ്ചയിച്ചു

 

ബ്രിട്ടീഷ് കൊളംബിയയിൽ  ഉടമകൾക്ക് ഈടാക്കാവുന്ന വാടക വർധനവിൻ്റെ പരമാവധി പരിധി  2027 വർഷത്തേക്ക് 2.2 ശതമാനമാണെന്ന് പ്രൊവിൻഷ്യൽ സർക്കാർ പ്രഖ്യാപിച്ചു . 2026-ൽ പ്രാബല്യത്തിലുണ്ടായിരുന്ന 2.3 ശതമാനത്തേക്കാൾ നേരിയ കുറവാണിത്. പ്രതിവർഷ പണപ്പെരുപ്പ നിരക്കിന് അനുസൃതമായാണ് പുതിയ പരിധി നിശ്ചയിച്ചിട്ടുള്ളതെന്നും, ഇത് 2027 ജനുവരി 1 മുതൽ പ്രാബല്യത്തിൽ വരുമെന്നും ഹൗസിംഗ് ആൻഡ് മുനിസിപ്പൽ അഫയേഴ്‌സ് മിനിസ്റ്റർ ക്രിസ്റ്റീൻ ബോയ്ലി വ്യക്തമാക്കി.

ജീവിതച്ചെലവുകൾ കുതിച്ചുയരുന്ന പശ്ചാത്തലത്തിൽ, വാടക വർധനവ് പണപ്പെരുപ്പ നിരക്കിലേക്ക് മാത്രമായി പരിമിതപ്പെടുത്തുന്നത് വാടകക്കാർക്ക് സാമ്പത്തിക ആശ്വാസം നൽകുമെന്ന് മന്ത്രാലയം വിലയിരുത്തുന്നു. 2018-ന് മുൻപ് പണപ്പെരുപ്പ നിരക്കിനൊപ്പം അധികമായി രണ്ട് ശതമാനം കൂടി ചേർത്ത് വാടക കൂട്ടാൻ ഭൂവുടമകൾക്ക് നിയമപരമായ അനുമതിയുണ്ടായിരുന്നു. എന്നാൽ ആ നയം റദ്ദാക്കിയത് വാടകക്കാർക്ക് കാര്യമായ ലാഭമുണ്ടാക്കാൻ സഹായകരമായെന്നും, മുൻവർഷങ്ങളെ അപേക്ഷിച്ച് വാടക നിരക്കിലെ വർധനവിൽ ശരാശരി 4.5 ശതമാനത്തിന്റെ കുറവുണ്ടായിട്ടുണ്ടെന്നും സർക്കാർ  അറിയിച്ചു.

നിയമപ്രകാരം വർഷത്തിൽ ഒരിക്കൽ മാത്രമാണ് വാടക പരിഷ്കരിക്കാൻ അനുമതിയുള്ളത്. നിരക്ക് വർധന നടപ്പാക്കുന്നതിന് കുറഞ്ഞത് മൂന്ന് മാസം മുമ്പ് ഭൂവുടമകൾ വാടകക്കാർക്ക് ഔദ്യോഗികമായി നോട്ടീസ് നൽകേണ്ടതുണ്ട്. പുതിയ നിർദ്ദേശം സാമ്പത്തിക കാര്യങ്ങൾ മുൻകൂട്ടി പ്ലാൻ ചെയ്യാൻ വാടകക്കാരെ സഹായിക്കും. അതേസമയം, കമേഴ്‌സ്യൽ കെട്ടിടങ്ങൾ, നോൺ-പ്രൊഫിറ്റ് സബ്‌സിഡൈസ്ഡ് ഹൗസിംഗ്, കോ-ഓപ്പറേറ്റീവ് ഹൗസിംഗ് എന്നിവയ്ക്ക് ഈ നിയന്ത്രണം ബാധകമല്ലെന്ന് അധികൃതർ വ്യക്തമാക്കി.