മുന് കാമുകിയെ കാണാതായെന്ന് പരാതി നല്കി ഇന്ത്യയിലേക്ക് കടന്ന കൊലക്കേസ് പ്രതി അര്ജുന് ശര്മ്മ ഇന്ത്യയില് പിടിയില്
By: 600002 On: Aug 28, 2026, 12:29 PM
പ്രസാദ് തീയാടിക്കല്
മേരിലാന്ഡ്: മുന് കാമുകിയെ കാണാതായെന്ന് പോലീസില് പരാതി നല്കിയതിന് പിന്നാലെ ഇന്ത്യയിലേക്ക് കടന്ന യുവാവ് കൊലക്കേസില് ഇന്ത്യയില് പിടിയിലായതായി ഹോവാര്ഡ് കൗണ്ടി പോലീസ് അറിയിച്ചു. കൊളംബിയ സ്വദേശിയായ അര്ജുന് ശര്മ്മ (26)യാണ് ഇന്ത്യന് അധികൃതരുടെ കസ്റ്റഡിയിലുള്ളത്.
എലിക്കോട്ട് സിറ്റി സ്വദേശിനിയായ നികിത ഗോദിശാല (27)യുടെ കൊലപാതകവുമായി ബന്ധപ്പെട്ടാണ് അര്ജുന് ശര്മ്മയെ പോലീസ് പ്രതിയാക്കിയിരിക്കുന്നത്.
ജനുവരിയില് നികിതയെ കാണാനില്ലെന്ന് അര്ജുന് പോലീസില് പരാതി നല്കിയിരുന്നു. പുതുവത്സരത്തലേന്നാണ് നികിതയെ അവസാനമായി കണ്ടതെന്നാണ് ഇയാള് പോലീസിനോട് പറഞ്ഞത്. എന്നാല് പരാതി നല്കിയ അതേ ദിവസം തന്നെ അര്ജുന് ഇന്ത്യയിലേക്ക് വിമാനമാര്ഗം പോയതായി അന്വേഷണത്തില് കണ്ടെത്തി.
തുടര്ന്ന് നികിതയുടെ സുഹൃത്തുക്കളില് നിന്നും കുടുംബാംഗങ്ങളില് നിന്നും ലഭിച്ച വിവരങ്ങളുടെ അടിസ്ഥാനത്തില് അര്ജുനെ കേന്ദ്രീകരിച്ച് പോലീസ് അന്വേഷണം ആരംഭിച്ചു. ജനുവരി 3-ന് അര്ജുന്റെ അപ്പാര്ട്ട്മെന്റില് നടത്തിയ പരിശോധനയിലാണ് നികിതയെ നിരവധി കുത്തേറ്റ മുറിവുകളോടെ മരിച്ച നിലയില് കണ്ടെത്തിയത്.
അര്ജുന് ഇന്ത്യയിലേക്ക് പോയതിന് ശേഷമാണ് കൊലപാതകവുമായി ഇയാള്ക്ക് ബന്ധമുണ്ടെന്ന സംശയം ശക്തമായതെന്ന് ഹോവാര്ഡ് കൗണ്ടി പോലീസ് നേരത്തെ വ്യക്തമാക്കിയിരുന്നു.
നികിതയെ കാണാതായതായി അര്ജുന് തന്നെ പോലീസില് പരാതി നല്കിയത് എന്തിനാണെന്നും കൊലപാതകത്തിന്റെ കാരണമെന്താണെന്നും ഇതുവരെ വ്യക്തമായിട്ടില്ല. തനിക്ക് സംഭവവുമായി ബന്ധമില്ലെന്ന പ്രതീതി സൃഷ്ടിക്കാനായിരിക്കാം പരാതി നല്കിയതെന്ന സാധ്യത പോലീസ് തള്ളിക്കളയുന്നില്ലെങ്കിലും, ഇക്കാര്യത്തില് അന്വേഷണം തുടരുകയാണ്.
ഇന്ത്യയില് കസ്റ്റഡിയിലുള്ള അര്ജുന് ശര്മ്മയെ മേരിലാന്ഡിലേക്ക് കൈമാറുന്നതിനുള്ള നടപടികള് സംബന്ധിച്ച് നിലവില് വ്യക്തമായ സമയക്രമം പ്രഖ്യാപിച്ചിട്ടില്ല.