കാൽഗറിയിൽ പോലീസിൻ്റെ വെടിയേറ്റ് സ്ത്രീ കൊല്ലപ്പെട്ടു: സുരക്ഷാ വീഴ്ചയുണ്ടായ സംഭവത്തിൽ സ്വതന്ത്ര അന്വേഷണം ആരംഭിച്ചു

 

കാൽഗറിയിലെ ലെഗസി മേഖലയിൽ പോലീസുമായുണ്ടായ ഏറ്റുമുട്ടലിൽ സ്ത്രീ കൊല്ലപ്പെട്ടു. ബുധനാഴ്ച പുലർച്ചെ 1:20-ഓടെ ലെഗസി സർക്കിളിലെ വസതിയിൽ നിന്ന് ലഭിച്ച അടിയന്തര സഹായ അഭ്യർത്ഥനയെ തുടർന്ന് സ്ഥലത്തെത്തിയ പോലീസ് സംഘത്തിന് നേരെ, മാരകായുധവുമായി പുറത്തുവന്ന സ്ത്രീ ഭീഷണി ഉയർത്തുകയായിരുന്നു. സ്ഥിതിഗതികൾ ശാന്തമാക്കാനും സംഘർഷം ഒഴിവാക്കാനും ഉദ്യോഗസ്ഥർ നടത്തിയ ശ്രമങ്ങൾ പരാജയപ്പെട്ടതിനെ തുടർന്ന്, പോലീസ് ഉദ്യോഗസ്ഥൻ വെടിയുതിർക്കുകയായിരുന്നു. ഗുരുതരമായി പരിക്കേറ്റ സ്ത്രീ സംഭവസ്ഥലത്തുതന്നെ മരണപ്പെട്ടതായി സുരക്ഷാ വിഭാഗം സ്ഥിരീകരിച്ചു.

സംഭവത്തിനിടയിൽ സമീപത്തെ ഗ്യാസ് മീറ്ററിന് കേടുപാടുകൾ സംഭവിച്ച് പ്രദേശത്ത് രൂക്ഷമായ വാതകച്ചോർച്ചയുണ്ടായത് വൻ സുരക്ഷാ ഭീഷണിയാണ് ഉയർത്തിയത്. അപകട സാധ്യത മുൻനിർത്തി പ്രദേശവാസികളെ ഉദ്യോഗസ്ഥർ അടിയന്തരമായി സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. അഗ്നിശമന സേനയെത്തി വാതകച്ചോർച്ച പൂർണ്ണമായി നിയന്ത്രണവിധേയമാക്കിയ ശേഷമാണ് എല്ലാവർക്കും വീടുകളിലേക്ക് മടങ്ങാൻ അനുമതി നൽകിയത്. വാതകം ശ്വസിച്ചതിനെ തുടർന്ന് ഒരു പോലീസ് ഉദ്യോഗസ്ഥനെ  ആശുപത്രിയിൽ പ്രവേശിപ്പിച്ചു.

പോലീസ് സേന ഉൾപ്പെട്ട വെടിവെപ്പായതിനാൽ, നിയമപരമായ നടപടികളുടെ ഭാഗമായി അന്വേഷണം അൽബെർട്ട സീരിയസ് ഇൻസിഡൻ്റ് റെസ്‌പോൺസ് ടീമിന്  കൈമാറി. ഉദ്യോഗസ്ഥർക്ക് നേരെ വർദ്ധിച്ചുവരുന്ന ആക്രമണങ്ങളിലും മാരകായുധങ്ങൾ ഉപയോഗിച്ചുള്ള ഭീഷണികളിലും കൽഗറി പോലീസ് ചീഫ് കടുത്ത ആശങ്ക പ്രകടിപ്പിച്ചു. പ്രദേശവാസികളുടെ സുരക്ഷയും ക്രമസമാധാനവും ഉറപ്പാക്കാൻ അടിയന്തര നടപടികൾ സ്വീകരിച്ചിട്ടുണ്ടെന്നും, സംഭവത്തിന് പിന്നിലെ സാഹചര്യങ്ങളെക്കുറിച്ച് സമഗ്രമായ സ്വതന്ത്ര അന്വേഷണം നടക്കുകയാണെന്നും സുരക്ഷാ ഏജൻസികൾ വ്യക്തമാക്കി.