വ്യാപാര യുദ്ധത്തിൽ അമേരിക്കയ്ക്കെതിരെ എണ്ണ ആയുധമാക്കാൻ കാനഡ; എതിർപ്പുമായി സാമ്പത്തിക വിദഗ്ദ്ധർ

 

കാനഡയിൽ നിന്നും അമേരിക്കയിലേക്കുള്ള എണ്ണവിതരണം പരിമിതപ്പെടുത്തുന്നത് അപ്രായോഗികമാണോ എന്ന വിഷയത്തിൽ ചർച്ചകൾ ശക്തമാകുന്നു. കാനഡയും അമേരിക്കയും തമ്മിലുള്ള വ്യാപാര തർക്കങ്ങൾ മുറുകുന്ന സാഹചര്യത്തിൽ, എണ്ണ കയറ്റുമതി തടഞ്ഞ് അമേരിക്കയെ സമ്മർദ്ദത്തിലാക്കണമെന്ന് ഒരു വിഭാഗം വാദിക്കുന്നുണ്ട്.എന്നാൽ അത്തരം നീക്കങ്ങൾ തിരിച്ചടിയാകുമെന്ന് സാമ്പത്തിക വിദഗ്ദ്ധർ മുന്നറിയിപ്പ് നൽകുന്നു.

1970-കളിൽ ആഗോള എണ്ണ പ്രതിസന്ധി ഉണ്ടായപ്പോൾ, കാനഡ എണ്ണ കയറ്റുമതിക്ക് നികുതി ചുമത്തുകയും സ്വന്തമായി ഒരു ദേശീയ ഊർജ്ജ നയം (NEP) നടപ്പിലാക്കുകയും ചെയ്തിരുന്നു. എന്നാൽ ഇത് ആൽബെർട്ട പ്രവിശ്യയും ഫെഡറൽ സർക്കാരും തമ്മിൽ രൂക്ഷമായ അഭിപ്രായവ്യത്യാസങ്ങൾക്കും സാമ്പത്തിക തർക്കങ്ങൾക്കും കാരണമായി.

എണ്ണ കയറ്റുമതി തടഞ്ഞാൽ അതിന്റെ ഏറ്റവും വലിയ തിരിച്ചടി നേരിടേണ്ടി വരുന്നത് ആൽബെർട്ടയായിരിക്കും. ഇത്  പ്രാദേശികമായി വൻ പ്രതിഷേധങ്ങൾക്ക് ഇടയാക്കുമെന്ന് വിദഗ്ദ്ധർ ചൂണ്ടിക്കാണിക്കുന്നു. മുൻകാല ഊർജ്ജ നയങ്ങൾ രാജ്യത്ത് ഉണ്ടാക്കിയ വിഭജനം ആവർത്തിക്കില്ലെന്നും ആൽബെർട്ടയുമായി സഹകരിച്ച് ഊർജ്ജ മേഖല വികസിപ്പിക്കാനാണ് മുൻഗണന നൽകുന്നതെന്നും പ്രധാനമന്ത്രി മാർക്ക് കാർണി വ്യക്തമാക്കിയിട്ടുണ്ട്.

അമേരിക്കയിലേക്കുള്ള എണ്ണ വിതരണം തടസ്സപ്പെടുത്തുന്നത് ഇരുരാജ്യങ്ങളും തമ്മിലുള്ള ബന്ധം കൂടുതൽ സങ്കീർണ്ണമാക്കുമെന്നും, അതിനാൽ എണ്ണ കയറ്റുമതി തടയുന്നത് കാനഡയുടെ താല്പര്യങ്ങൾക്ക് ഗുണം ചെയ്യില്ലെന്നുമാണ് വിദഗ്ദ്ധരുടെ വിലയിരുത്തൽ.