ഹ്യൂസ്റ്റണില്‍ പൊതുസ്ഥലങ്ങളില്‍ മൃതദേഹങ്ങള്‍, ആശങ്കയില്‍ നഗരവാസികള്‍

 

പ്രസാദ് തീയാടിക്കല്‍

ഹ്യൂസ്റ്റണ്‍: അമേരിക്കയിലെ ഹ്യൂസ്റ്റണ്‍ നഗരത്തില്‍ ബയൂകള്‍ ഉള്‍പ്പെടെയുള്ള പൊതുസ്ഥലങ്ങളില്‍ തുടര്‍ച്ചയായി മൃതദേഹങ്ങള്‍ കണ്ടെത്തുന്നത് വീണ്ടും ആശങ്ക ഉയര്‍ത്തുന്നു. ജൂലൈ 29 മുതല്‍ ഓഗസ്റ്റ് 20 വരെയുള്ള ഏകദേശം നാലാഴ്ചയ്ക്കിടെ നഗരത്തിന്റെ വിവിധ ഭാഗങ്ങളില്‍ നിന്ന് കുറഞ്ഞത് ഏഴ് മൃതദേഹങ്ങളാണ് കണ്ടെത്തിയത്. ബയൂകള്‍, റിട്ടന്‍ഷന്‍ പോണ്ട്, ഹൈവേ മേല്‍പ്പാലത്തിനടിയിലെ സ്ഥലം, സ്‌കൂള്‍ ക്യാമ്പസ് എന്നിവിടങ്ങളില്‍ നിന്നാണ് മൃതദേഹങ്ങള്‍ കണ്ടെത്തിയത്.

ഹ്യൂസ്റ്റണ്‍ മേഖലയിലെ ബയൂകളില്‍ മൃതദേഹങ്ങള്‍ കണ്ടെത്തുന്നത് പുതിയ സംഭവമല്ല. Harris County Medical Examiner's Office-ല്‍ നിന്ന് ലഭിച്ച കണക്കുകള്‍ പ്രകാരം 2017 മുതല്‍ 2026 ഫെബ്രുവരി വരെ 208 മൃതദേഹങ്ങള്‍ ഹ്യൂസ്റ്റണ്‍ മേഖലയിലെ ബയൂകളില്‍ നിന്ന് കണ്ടെത്തിയിട്ടുണ്ട്. ഇതില്‍ പല മരണങ്ങളുടെയും സാഹചര്യങ്ങള്‍ വ്യത്യസ്തമാണെന്നും എല്ലാം കുറ്റകൃത്യങ്ങളുമായി ബന്ധപ്പെട്ടതല്ലെന്നും അധികൃതര്‍ വ്യക്തമാക്കിയിട്ടുണ്ട്.

നാലാഴ്ചയ്ക്കിടെ ഏഴ് കണ്ടെത്തലുകള്‍

ജൂലൈ 29-ന് Sims Bayou സമീപത്ത് പുല്ലുവെട്ടുന്നതിനിടെ തൊഴിലാളികളാണ് 33 വയസ്സുള്ള Yvonne Lopez എന്ന യുവതിയുടെ ഭാഗികമായി കത്തിയ മൃതദേഹം കണ്ടെത്തിയത്. മരണകാരണം സംബന്ധിച്ച അന്വേഷണം തുടരുകയാണ്.

ഓഗസ്റ്റ് 10-ന് മാത്രം ഹ്യൂസ്റ്റണിലെ വിവിധ ഭാഗങ്ങളില്‍ മൂന്ന് മൃതദേഹങ്ങള്‍ കണ്ടെത്തി. Brays Bayou-യില്‍ ഒരു പുരുഷന്റെ മൃതദേഹം ഒഴുകിനടക്കുന്ന നിലയില്‍ കണ്ടെത്തിയപ്പോള്‍, North Eldridge Parkway സമീപം അഴുകിയ നിലയില്‍ മറ്റൊരു മൃതദേഹവും കണ്ടെത്തി. അതേ ദിവസം Interstate 45 മേല്‍പ്പാലത്തിനടിയില്‍ കത്തിയ നിലയില്‍ ഒരു സ്ത്രീയുടെ മൃതദേഹവും കണ്ടെത്തി. ഈ കേസില്‍ ദുരൂഹ സാഹചര്യം സംശയിക്കുന്നതായി പൊലീസ് അറിയിച്ചു.

ഓഗസ്റ്റ് 11-ന് Memorial Hermann Southeast Hospital സമീപത്തെ റിട്ടന്‍ഷന്‍ പോണ്ടില്‍ മറ്റൊരു മൃതദേഹം കണ്ടെത്തി. പ്രാഥമിക അന്വേഷണത്തില്‍ കുറ്റകൃത്യത്തിന്റെ വ്യക്തമായ സൂചനകളൊന്നും കണ്ടെത്തിയിട്ടില്ലെന്ന് അധികൃതര്‍ അറിയിച്ചു. അതേ ദിവസം Buffalo Bayou കരയില്‍ അഴുകിയ നിലയില്‍ ഒരു പുരുഷന്റെ മൃതദേഹവും കണ്ടെത്തി; ശരീരത്തില്‍ വ്യക്തമായ പരിക്കുകളുടെ അടയാളങ്ങള്‍ ഉണ്ടായിരുന്നില്ല.

ഏറ്റവും ഒടുവില്‍ ഓഗസ്റ്റ് 20-ന് Houston ISD-യുടെ Attucks Middle School ക്യാമ്പസിലെ ആളൊഴിഞ്ഞ ഭാഗത്ത് ഒരു പുരുഷന്റെ മൃതദേഹം കണ്ടെത്തി. സ്‌കൂള്‍ ജീവനക്കാരനാണ് മൃതദേഹം ആദ്യം കണ്ടത്. സംഭവം സ്‌കൂളുമായി ബന്ധപ്പെട്ടതല്ലെന്നും വിദ്യാര്‍ത്ഥികള്‍ക്കും ജീവനക്കാര്‍ക്കും ഭീഷണി ഉണ്ടായിരുന്നില്ലെന്നും HISD വ്യക്തമാക്കി.

തുടര്‍ച്ചയായി മൃതദേഹങ്ങള്‍ കണ്ടെത്തുന്നത് സോഷ്യല്‍ മീഡിയയില്‍ 'ഹ്യൂസ്റ്റണില്‍ സീരിയല്‍ കില്ലര്‍ ഉണ്ടോ?' എന്ന തരത്തിലുള്ള സംശയങ്ങള്‍ക്കും ചര്‍ച്ചകള്‍ക്കും വഴിവെച്ചിട്ടുണ്ട്. എന്നാല്‍ ഇപ്പോഴത്തെ ഏഴ് മരണങ്ങളും തമ്മില്‍ ബന്ധമുണ്ടെന്ന് സൂചിപ്പിക്കുന്ന വിവരങ്ങളൊന്നും Houston Police പുറത്തുവിട്ടിട്ടില്ല. ഓരോ കേസും പ്രത്യേകം അന്വേഷിക്കുകയാണ്.

മുന്‍പ് ബയൂകളില്‍ മൃതദേഹങ്ങള്‍ തുടര്‍ച്ചയായി കണ്ടെത്തിയപ്പോഴും സമാനമായ സീരിയല്‍ കില്ലര്‍ അഭ്യൂഹങ്ങള്‍ ഉയര്‍ന്നിരുന്നു. എന്നാല്‍ കേസുകള്‍ തമ്മില്‍ ബന്ധമുണ്ടെന്നതിന് തെളിവുകളില്ലെന്ന് പൊലീസ് അന്നും വ്യക്തമാക്കിയിരുന്നു.

മരണങ്ങളുടെ യഥാര്‍ത്ഥ കാരണം കണ്ടെത്തുന്നതിനായി പോസ്റ്റ്മോര്‍ട്ടം, ടോക്‌സിക്കോളജി ഉള്‍പ്പെടെയുള്ള ഫോറന്‍സിക് പരിശോധനകള്‍ നിര്‍ണായകമാണ്. വെള്ളത്തില്‍ ഏറെനാള്‍ കിടന്ന മൃതദേഹങ്ങളുടെ കാര്യത്തില്‍ മരണകാരണം കണ്ടെത്തുന്നത് കൂടുതല്‍ സങ്കീര്‍ണമാകാമെന്നും വിദഗ്ധര്‍ ചൂണ്ടിക്കാട്ടുന്നു.

അതേസമയം, നാലാഴ്ചയ്ക്കിടെ ഏഴ് മൃതദേഹങ്ങള്‍ പൊതുസ്ഥലങ്ങളില്‍ കണ്ടെത്തിയ സംഭവം ഹ്യൂസ്റ്റണില്‍ വീണ്ടും സുരക്ഷാ ആശങ്കകള്‍ക്കും സോഷ്യല്‍ മീഡിയ ചര്‍ച്ചകള്‍ക്കും കാരണമായിരിക്കുകയാണ്. കേസുകളില്‍ അന്വേഷണം തുടരുകയാണ്.