യു.എസ് താരിഫ് നയം കനേഡിയൻ സമ്പദ്‌വ്യവസ്ഥയ്ക്ക് ഭീഷണി: 87,200 തൊഴിലുകൾ നഷ്ടപ്പെടാൻ സാധ്യതയെന്ന് പഠന റിപ്പോർട്ട്

 

അമേരിക്കൻ പ്രസിഡന്റ് ഡൊണാൾഡ് ട്രംപ്  നിർദ്ദേശിച്ച താരിഫ് വർദ്ധനവ് നടപ്പിലായാൽ കാനഡയിലെ തൊഴിൽ മേഖലയിൽ വൻ തിരിച്ചടിയുണ്ടാകുമെന്ന് കാൽഗറി സർവ്വകലാശാലയുടെ പുതിയ പഠന റിപ്പോർട്ട്. യൂണിവേഴ്സിറ്റി ഓഫ് കാൽഗറിയിലെ സാമ്പത്തിക ശാസ്ത്ര പ്രൊഫസറായ ട്രെവർ ടോംബ് നടത്തിയ വിശകലനമനുസരിച്ച്, പ്രഖ്യാപിത താരിഫ് നിരക്കുകൾ കാനഡയിലുടനീളം ഏകദേശം 87,200 തൊഴിലുകളെ നേരിട്ട് പ്രതിസന്ധിയിലാക്കും. വടക്കേ അമേരിക്കൻ രാജ്യങ്ങൾ തമ്മിലുള്ള വ്യാപാര ബന്ധത്തിൽ കടുത്ത അനിശ്ചിതത്വം സൃഷ്ടിക്കുന്നതാണ് ഈ പുതിയ സാമ്പത്തിക നയം.

കാർഷിക ഉൽപ്പന്നങ്ങൾ, ഇലക്ട്രോണിക്സ്, തുണിത്തരങ്ങൾ, ഫർണിച്ചർ, പ്ലാസ്റ്റിക് ഉൽപ്പാദനം എന്നീ മേഖലകൾക്കാണ് പുതിയ നയം ഏറ്റവും കൂടുതൽ തിരിച്ചടിയാകുന്നത്. രാജ്യത്തിന്റെ നിർമ്മാണ-കയറ്റുമതി കേന്ദ്രങ്ങളായ ഒന്റാറിയോ, ക്യൂബെക്ക് എന്നീ പ്രവിശ്യകളെയാണ് ഇത് ഏറ്റവും ഗുരുതരമായി ബാധിക്കുക. പ്രസ്തുത മേഖലകളിലെ തൊഴിൽ നഷ്ടവും ഉൽപ്പാദന മാന്ദ്യവും കാനഡയുടെ മൊത്തത്തിലുള്ള ആഭ്യന്തര ഉൽപ്പാദനത്തെയും  വിപണി സുസ്ഥിരതയെയും സാരമായി സ്വാധീനിക്കുമെന്ന് റിപ്പോർട്ടിൽ വ്യക്തമാക്കുന്നു.

വ്യാപാര തടസ്സങ്ങൾ ഒഴിവാക്കുന്നതിനും പ്രാദേശിക വിപണിയെയും വ്യവസായങ്ങളെയും സംരക്ഷിക്കുന്നതിനും കേന്ദ്ര സർക്കാർ തലത്തിൽ അടിയന്തര നയതന്ത്ര ഇടപെടലുകൾ അനിവാര്യമാണെന്ന് സാമ്പത്തിക വിദഗ്ദ്ധർ അഭിപ്രായപ്പെടുന്നു. അമേരിക്കൻ നയമാറ്റങ്ങൾ സൃഷ്ടിക്കുന്ന പ്രതിസന്ധി മറികടക്കാൻ ബദൽ കയറ്റുമതി മാർഗ്ഗങ്ങൾ കണ്ടെത്താനും പ്രാദേശിക തൊഴിൽ സുരക്ഷ ഉറപ്പാക്കാനുമുള്ള പദ്ധതികൾ കനേഡിയൻ ഭരണകൂടം ഉടൻ ആവിഷ്കരിക്കുമെന്നാണ് പ്രതീക്ഷിക്കുന്നത്.