ഡിജിറ്റൽ ഐഡി സ്കാനിംഗ് സിസ്റ്റത്തിൽ പിഴവ്:  സ്വകാര്യതാ ലംഘനത്തിനെതിരെ പ്രതിഷേധം

 

 

കാനഡയിലെ ബാറുകളിൽ ഉപയോഗിക്കുന്ന ഡിജിറ്റൽ ഐഡി സ്കാനിംഗ് ശൃംഖലയിൽ സംഭവിച്ച സാങ്കേതിക പിഴവിനെ തുടർന്ന്, വ്യക്തിപരമായ വിവരങ്ങൾ തെറ്റായി രേഖപ്പെടുത്തിയ സംഭവം കാനഡയിൽ വലിയ സ്വകാര്യതാ നിയമ തർക്കങ്ങൾക്ക് വഴിതുറന്നിരിക്കുന്നു. മോൺട്രിയൽ സ്വദേശിയായ അഭിഭാഷക അലക്സാണ്ട്ര, വിനിപെഗിലെ 'റിവർസൈഡ്' ബാറിൽ വെച്ച് ശാരീരിക അസ്വസ്ഥതയെ തുടർന്ന് പുരുഷന്മാരുടെ വിശ്രമമുറി ഉപയോഗിച്ചതിനെ തുടർന്നാണ് പ്രശ്നങ്ങളുടെ തുടക്കം.

ജീവനക്കാരുടെ നിർദ്ദേശപ്രകാരം ബാറിൽ നിന്ന് പുറത്തുപോയ അലക്സാണ്ട്രയെ, 'പാട്രൺസ്കാൻ' 
 എന്ന ഐഡി സ്കാനിംഗ് സിസ്റ്റം വഴി Public Safety Concern എന്ന ഗൗരവതരമായ വിഭാഗത്തിൽപ്പെടുത്തുകയായിരുന്നു. എന്നാൽ, ആഴ്ചകൾക്ക് ശേഷം കാൽഗറി സ്റ്റാംപീഡിലെ മറ്റൊരു വിനോദകേന്ദ്രത്തിൽ പ്രവേശിക്കാൻ ശ്രമിച്ചപ്പോഴാണ്, മുൻ ബാറിലെ ഈ തെറ്റായ രേഖപ്പെടുത്തൽ കാരണം പ്രവേശനം നിഷേധിക്കപ്പെട്ട വിവരവും ദേശീയതലത്തിൽ വിലക്ക് നേരിടുന്ന കാര്യവും അലക്സാണ്ട്ര അറിയുന്നത്.

വിഷയം വിവാദമായതോടെ അന്വേഷണം നടത്തിയ വിനിപെഗ് ബാർ അധികൃതർ, വിവരങ്ങൾ ബാറുകൾക്കിടയിലുള്ള പൊതു ശൃംഖലയിലേക്ക് കൈമാറിയത് ജീവനക്കാരുടെ ഭാഗത്തുനിന്നുണ്ടായ അഡ്മിനിസ്ട്രേറ്റീവ് പിഴവാണെന്ന് സമ്മതിക്കുകയും സിസ്റ്റത്തിൽ നിന്ന് മുന്നറിയിപ്പ് നീക്കം ചെയ്യുകയും ചെയ്തു. എങ്കിലും, വ്യക്തികളുടെ യാതൊരുവിധ മുൻകൂർ അനുമതിയോ സുതാര്യതയോ ഇല്ലാതെ തേർഡ് പാർട്ടി  ആപ്ലിക്കേഷനുകൾ വഴി ഇത്തരം ഡാറ്റ കൈമാറ്റം ചെയ്യപ്പെടുന്നത് തികച്ചും ആശങ്കാജനകമാണെന്ന് അലക്സാണ്ട്ര വ്യക്തമാക്കി.

 അവകാശ ലംഘനത്തിനെതിരെ ഓഫീസ് ഓഫ് ദി പ്രൈവസി കമ്മീഷണർ ഓഫ് കാനഡയ്ക്ക്  ഔദ്യോഗികമായി പരാതിയും നൽകിയിട്ടുണ്ട്. വ്യക്തിഗത വിവരങ്ങൾ ശേഖരിക്കുമ്പോഴും പങ്കുവെക്കുമ്പോഴും അത് ഏത് ആവശ്യത്തിനാണെന്ന് വ്യക്തികളെ വ്യക്തമായി ധരിപ്പിക്കണമെന്ന് കാനഡയിലെ ഫെഡറൽ സ്വകാര്യതാ നിയമങ്ങൾ അനുശാസിക്കുന്നുണ്ടെന്ന് പ്രമുഖ നിയമ വിദഗ്ദ്ധർ ചൂണ്ടിക്കാണിക്കുന്നു.

സാങ്കേതികവിദ്യയുടെയും ഡിജിറ്റൽ നിരീക്ഷണ സംവിധാനങ്ങളുടെയും അതിപ്രസരമുള്ള കാലഘട്ടത്തിൽ, ഏതെങ്കിലും ഒരു വ്യക്തിയുടെ ഏകപക്ഷീയമായ വിലയിരുത്തലുകൾ മാത്രം മുൻനിർത്തി സ്വകാര്യ ഡാറ്റ വിതരണം ചെയ്യുന്നത് പൗരന്മാരുടെ മൗലികാവകാശങ്ങളുടെയും സ്വകാര്യതയുടെയും നഗ്നമായ ലംഘനമാണെന്ന് വിലയിരുത്തപ്പെടുന്നു. ഇത്തരം ആപ്ലിക്കേഷനുകളുടെ ഉപയോഗവും വിവരശേഖരണ പരിധിയും സംബന്ധിച്ച് കർശനമായ നിയമനിർമ്മാണം വേണമെന്ന ആവശ്യവും ശക്തമായിട്ടുണ്ട്.