സ്റ്റാര്ലിങ്ക് അനുമതിക്കായി വീണ്ടും അപേക്ഷ നല്കി ഇലോണ് മസ്ക്; ഗ്രാമീണ മേഖലകളില് ഇന്റര്നെറ്റ് സേവനമെത്തിക്കുമെന്ന് വാഗ്ദാനം
By: 600002 On: Aug 24, 2026, 2:15 PM
പി പി ചെറിയാന്
ന്യൂയോര്ക്: ഇന്ത്യയില് സാറ്റലൈറ്റ് ഇന്റര്നെറ്റ് സേവനങ്ങള് ലഭ്യമാക്കുന്നതിനായി ഇലോണ് മസ്കിന്റെ സ്റ്റാര്ലിങ്ക് വീണ്ടും അനുമതി തേടി അപേക്ഷ സമര്പ്പിച്ചു. മൊബൈല് ഫോണുകളിലേക്ക് നേരിട്ട് സാറ്റലൈറ്റ് കണക്റ്റിവിറ്റി (Direct-to-Device) നല്കുന്ന അത്യാധുനിക 'ജെന് 2' (Gen 2) സാറ്റലൈറ്റ് ശൃംഖലയ്ക്കാണ് കമ്പനി അംഗീകാരം ആവശ്യപ്പെട്ടിരിക്കുന്നത്.
30,000 സാറ്റലൈറ്റുകള് ഉള്പ്പെടുന്ന ഉപഗ്രഹ ശൃംഖലയ്ക്കായി സ്റ്റാര്ലിങ്ക് മുന്പ് സമര്പ്പിച്ച അപേക്ഷ, ചില സാങ്കേതിക സവിശേഷതകളുടെയും സ്പെക്ട്രം ബാന്ഡുകളുടെയും മാനദണ്ഡങ്ങള് പാലിക്കാത്തതിനെ തുടര്ന്ന് ഇന്ത്യന് നാഷണല് സ്പേസ് പ്രൊമോഷന് ആന്ഡ് ഓതറൈസേഷന് സെന്റര് നിരസിച്ചിരുന്നു. തുടര്ന്നാണ് പുതിയ സാങ്കേതികവിദ്യകളോടെ സ്റ്റാര്ലിങ്ക് വീണ്ടും അപേക്ഷ നല്കിയത്.
ഇന്ത്യന് വിപണി ലക്ഷ്യമിട്ടുകൊണ്ട്, ഓഗസ്റ്റ് 21-ന് സോഷ്യല് മീഡിയ പ്ലാറ്റ്ഫോമായ 'എക്സി'ലൂടെ (X) ഇലോണ് മസ്ക് തന്റെ നിലപാട് വ്യക്തമാക്കി. ഇന്ത്യയില് ഇന്റര്നെറ്റ് സേവനങ്ങള് ഒട്ടും ലഭ്യമാകാത്ത ഗ്രാമീണ മേഖലകളില് ഡിജിറ്റല് കണക്റ്റിവിറ്റി ഉറപ്പാക്കാന് സ്റ്റാര്ലിങ്കിന് സാധിക്കുമെന്ന് മസ്ക് കുറിച്ചു.
ഇന്ത്യയിലെ ഗ്രാമീണ-നഗര മേഖലകള് തമ്മിലുള്ള ഇന്റര്നെറ്റ് വ്യത്യാസം ചൂണ്ടിക്കാണിക്കുന്ന പോസ്റ്റിന് മറുപടിയായാണ് മസ്ക് ഈ പ്രതികരണം നടത്തിയത്. 2026 മേയ് മാസത്തെ കണക്കനുസരിച്ച് രാജ്യത്തെ 11,256 ഗ്രാമങ്ങളില് ഇപ്പോഴും 4G കവറേജ് ലഭ്യമല്ല.