ആൽബർട്ടയെ എഐ ഹബ്ബാക്കാൻ പ്രമുഖ കമ്പനികൾ: വൻകിട ഡാറ്റാ സെൻ്ററുകൾ നിർമ്മിക്കാൻ പദ്ധതി

 

ആൽബർട്ടയെ ആഗോള ആർട്ടിഫിഷ്യൽ ഇൻ്റലിജൻസ് ഹബ്ബാക്കി മാറ്റുന്നതിൻ്റെ ഭാഗമായി ലോകോത്തര എഐ പ്രമുഖർ  കോടികളുടെ നിക്ഷേപത്തിനൊരുങ്ങുന്നു. ഇതിൻ്റെ ഭാഗമായി അത്യാധുനിക ഡാറ്റാ സെൻ്ററുകൾ സ്ഥാപിക്കാൻ വൻകിട ടെക് കമ്പനികൾ താല്പര്യം പ്രകടിപ്പിച്ചിട്ടുണ്ടെന്ന് ആൽബർട്ട  വ്യക്തമാക്കി. സാങ്കേതികവിദ്യ, ഊർജ്ജ മേഖലകളിൽ മുൻപന്തിയിൽ നിൽക്കുന്ന ആൽബർട്ടയിലേക്ക് വൻതോതിലുള്ള വിദേശ നിക്ഷേപം ആകർഷിക്കുന്നതിനും ഡിജിറ്റൽ മേഖലയിൽ വൻ കുതിച്ചുചാട്ടം നടത്തുന്നതിനും ഈ നീക്കം വഴിയൊരുക്കും.

ഈ പദ്ധതി യാഥാർത്ഥ്യമാകുന്നതോടെ പ്രവിശ്യയിൽ ആയിരക്കണക്കിന് പുതിയ തൊഴിലവസരങ്ങൾ സൃഷ്ടിക്കപ്പെടും. നിർമ്മാണ ഘട്ടത്തിലും അതിനുശേഷമുള്ള പ്രവർത്തനങ്ങൾക്കുമായി വൻ തോതിൽ തൊഴിലാളികളെ ആവശ്യമായി വരും. അടിസ്ഥാന സൗകര്യ വികസനം ഉറപ്പാക്കുന്നതിനൊപ്പം പ്രവിശ്യയുടെ സാമ്പത്തിക രംഗത്തിന് വലിയൊരു ഉണർവ് നൽകാൻ എഐ ഇൻഫ്രാസ്ട്രക്ചർ പദ്ധതികൾക്ക് സാധിക്കുമെന്നാണ് സാമ്പത്തിക വിദഗ്ധരുടെ വിലയിരുത്തൽ. പ്രവിശ്യയിലെ സമൃദ്ധമായ ഊർജ്ജ വിഭവങ്ങൾ പ്രയോജനപ്പെടുത്തി കുറഞ്ഞ ചെലവിൽ ഡാറ്റാ സെന്ററുകൾ പ്രവർത്തിപ്പിക്കാം എന്നതാണ് പ്രമുഖ ടെക് കമ്പനികളെ ഇങ്ങോട്ട് ആകർഷിക്കുന്ന പ്രധാന ഘടകം.

അതേസമയം, പദ്ധതിക്ക് അനുകൂലമായ നിലപാടുകളുമായി സർക്കാർ മുന്നോട്ടുപോകുമ്പോഴും പ്രദേശവാസികളിൽ നിന്നും പരിസ്ഥിതി പ്രവർത്തകരിൽ നിന്നും ചില ആശങ്കകൾ ഉയരുന്നുണ്ട്. വൻകിട ഡാറ്റാ സെന്ററുകൾക്ക് ആവശ്യമായി വരുന്ന അമിതമായ വൈദ്യുതി ഉപയോഗവും ജലസ്രോതസ്സുകളുടെ ഉപയോഗവുമാണ് പ്രധാന ചർച്ചാവിഷയം. ഇവരുടെ ആശങ്കകൾ പരിഹരിക്കുന്നതിനായി സർക്കാരും ടെക് കമ്പനികളും വിവിധ മേഖലകളിൽ ടൗൺഹാൾ മീറ്റിംഗുകളും ചർച്ചകളും സംഘടിപ്പിച്ചുവരികയാണ്.